Samling
16. august 2002 UKA 2002 / 60
Missiliuut
Tunisassianut akisussaaffiginninneq pillugu inatsisip Kalaallit Nunaanni
atortuulersinneqarnissaanik peqqussut
Tunisassianut akisussaaffiginninneq pillugu inatsimmi nr. 371, 7. juni 1989-imeersumi § 18 naapertorlugu aalajangerneqarpoq inatsit Kalaallit Nunaanni atuutilissasoq imaattunik oqaasertalerlugu:
Kapitali 1
Inatsisip atuuffii
§ 1. Inatsit atuutissaaq tunisassiap tunisassiortumit imaluunniit akunnermiliuttutut nioqqutillip tunineqartup ajoquteqarneranik pissuteqartumik ajoqusiinerni (tunisassiap ajoqusiinera) tunisassiortup akunnermiliuttutullu nioqquteqartup akisussaaffiginninnerannut.
Kapitali 2
Nassuiaatit
Ajoqusiineq
§ 2. Inatsimmi pineqartunut ilaapput inummik ajoqusiinermi aamma pilersuigisamik annaasaqarnermi taarsiissuteqartarneq akiliuteqartarnerlu. Aammattaaq inatsimmi pineqarpoq pisuni imm. 2-mi taaneqartuni pinik ajoqusiinermi taarsiissuteqartarneq.
Imm. 2. Pinik ajoqusiineq inatsimmit pineqarpoq, pineqartoq taanna suussutsi malillugu inuussutissarsiutaanngitsunut atugassiaanerusimassappat aammalu ajoqusertumit tamatumunnga naapertuuttumik atorneqarnerusarsimappat. Inatsimmi pineqanngilaq tunisassiamut ajoqutilimmut namminermut ajoqusiineq.
Tunisassiaq
§ 3. Tunisassiamik paasineqassaaq pialuut sunaluunniit, taanna suliareqqitaagaluarpat imaluunniit pissuseqqaamisut ikkaluarpat kiisalu pialuummut allamut imaluunniit illumut ilaasutut ikkussaagaluarpat apeqqutaatinnagu. Tunisassiat pillugit malittarisassani aamma kallerup innera pineqarpoq.
_______________
UKA 2002 / 60
Sekr. j.nr. 63.09.02
Imm. 2. Inatsimmi pineqanngillat tunisassiat suliareqqitaanngitsut nunaateqarnermiit, uumasuuteqarfimmiit, aalisarnermiit piniarnermiillu pisut.
Tunisassiortoq akunnermiliuttutullu niuertoq
§ 4. Tunisassiortutut naatsorsuunneqassaaq kinaluunniit inerlugu tunisssiamik, inivinnagu (suliareqqitassatut) tunisassiamik imaluunniit suliarineqanngitsumik (nioqqutissiassamik) pilersuisoq, kinaluunniit pinngortitami pissuseqqaamisut ittumik pilersuisoq imaluunniit katersuisoq, kiisalu kinaluunniit aterminik, nalunaaqutsiussamik allatulluunniit ilisarnaammik tunisassiaminut inissiinikkut taassuminnga tunisassiortuusutut imminut nittarsaattoq.
Imm. 2. Aammattaaq tunisassiortutut naatsorsuunneqassaaq kinaluunniit inuussutissarsiutitut ingerlassami ilaatut tunisassiamik danskit naalagaaffiannut eqqussuisoq tuniniaaqqinnissaq, attartortitsinissaq allatulluunniit iliornikkut isertitanik kaaviiaartitsinissaq siunertaralugu.
Imm. 3. Akunnermiliuttutut niuertutut naatsorsuunneqassaaq kinaluunniit, inuussutissarsiutigalugu tunisassiamik tunisassiortutut naatsorsuunneqanngikkaluarluni isertitaqaataasartumik niuertoq.
Imm. 4. Ajoquserneqartup paasisinnaanngippagu tunisassiaq kimit tunisassiarineqarsimanersoq, imaluunniit ajoquserneqartup paasisinnaanngippagu, tunisassiaq kimit naalagaaffimmut eqqussaasimanersoq, tunisassiamik akunnermiliuttutut niuertuusut tamarmik tunisassiortutut naatsorsuunneqassapput.
Imm. 5. Imm. 4-mi aalajangersagaq atuutissanngilaq, akunnermiliuttutut niuertup piffissaq sivisunngitsoq naatinnagu ajoquserneqartoq paasissutississappagu tunisassiortup eqqussuisulluunniit aqqanik najugaanillu imaluunniit kialuunniit tunisassiamik akunnermiliuttutut niuertumut tunniussuisuusup aqqanik najugaanillu. Akunnermiliuttutut niuertup ajoquserneqartoq innersuussinnaanngilaa akisussaaffiginnittussamut naalagaaffiup avataaniittumi eqqartuussiveqarfilimmi najugalimmut.
Ajoquteqarneq
§ 5. Tunisassiaq ajoquteqarsimassaaq ilimagisariaqartutut isumannaatsuussutsimik takutitsisinnaanngikkuni. Tamatuma naliliiffiginiarnerani pissusiusut tamarmik tunngavigineqassapput, pingaartumik:
1) tunisassiap tuniniarnerani pilerisaarutaanera,
2) tunisassiap atorneqarnera (atorsinnaassusia) nalinginnaasumik ilimagisariaqagaq, aamma
3) piffissaq (ukioq) tunisassiap nioqqutaalerfigisaa.
Imm. 2. Tunisassiaq ajoquteqartutut naatsorsuunneqassanngilaq kingusinnerusukkut pitsaanerusunngorlugu tunisassiatut nioqqutaalernera pissutigiinnarlugu.
Kapitali 3
Akisussaassuseqarneq taarsiissutissallu
Akisussaassuseqarneq
§ 6. Tunisassiortoq ajoqusiinermut, tunisassiap ajoquteqarneranik pissuteqartumut, nammineq tunisassiarisaminut imaluunniit pilersuutigisimasaminut, taarsiissuteqassaaq.
Imm. 2. Ajoquserneqartup pisussaaffigaa ajoquserneq, tunisassiaq ajoquteqarnera aammalu ajoquteqarnerup ajoqusernerullu pinerannut pissutaasut uppernarsaasissallugit.
Akisussaatitaannginnissamut pissutigisassat
§ 7. Tunisassiortoq akisussaatitaassanngilaq uppernarsarsinnaappagu:
1) nammineq tunisassiamik nioqqutissanngortitsisimanani,
2) tunisassiaq nammineq pilerisimanngikkini, saqqummiussarinngikkini, katersugarinngikkini imaluunniit inuussutissarsiutitut ingerlassami ilaatut isertitatigut kaaviiaartitassiarinngikkini,
3) ajoquteqarnermut pissutaasoq tunisassiap pisortatigoortumik peqqussusianut sanioqqunneqarsinnaanngitsunut naapertuuttuusariaqaraluarnera, imaluunniit
4) tunisassiap nioqqutissanngortinneqarnerani ilisimatusarnikkut teknikkikkullu ilisimasat tunngavigalugit ajoquteqarnerup paasinneqarnissaata ajornarsimanera.
Imm. 2. Aammattaaq tunisassiortoq akisussaatitaassanngilaq naatsorsuutigisariaqarpat tunisassiaq taassuma nioqqutissanngortimmagu ajoquteqarsimanngitsoq ajoqusiineratut ajoqusiisinnaasumik.
Imm. 3. Ineriigaanngitsumik tunisassiortoq akisussaatitaassanngilaq, taassuma uppernarsassappagu, tunisassiap ajoquteqarnera pissuteqartoq suliareqqillugu ilusiliinermik imaluunniit tunisassiamik inerlugu piliortup atuinissamut ilitsersuusiaanik pissuteqartoq.
Pinik ajoqusiineq
§ 8. Pinik ajoqusiinermut taarsiissutissat annertussusilerneranni aningaasat 4.000 kr.-iusut ilanngaatigineqartassapput.
Imm. 2. Inatsisinik atortitsinermut ministeri tamanna pillugu EF-direktivimik naammassinninniutitut imm. 1-imi taaneqartut aningaasartaannik allannguuteqartitsisinnaavoq.
Nammineq pisuuneq
§ 9. Taarsiissutissat ikilineqarlutilluunniit atorunnaarsinneqarsinnaapput, ajoquserneqartoq piaaraluneernikkut mianersuaalliornikkulluunniit ajoqusernermut pisooqataasimappat.
Imm. 2. Pinik ajoqusiinerni aningaasani, § 8-mi taaneqartut ilanngaatigereernerisigut saqqummersussani, nammineq pisuunerup nassatarisaatut ikilisitsisoqartassaaq.
Kapitali 4
Akunnermiliuttutut niuertup akisussaassuseqarnera
§ 10. Akunnermiliuttutut niuertoq tunisassiaq pillugu akisussaassuseqarnermi ajoquserneqartumut toqqaannartumik akiligassatigut akisussaatitaassaaq kingusinnerusukkullu isertitatigut kaaviiaartitseqatigiinni akunnermiliuttutut niuertunut.
Kapitali 5
Akisussaassuseqartut arlallit aamma utertitsivigineqarnissamik piumasaqaatit
§ 11. Inatsit manna malillugu ajoqusiinermut taanaasumut akisussaassuseqartut marluugunik arlaliugunilluunniit akiligassatigut nammaqatigiissapput.
Imm. 2. Akisussaassuseqartut arlaliusut § 4, imm. 1, naapertorlugu tunisassiortuusimappata pisussaaffitsigut isumaqatigiissuteqarsimanatik, akisussaassuseqarneq taakkua akornanni agguataarneqassaaq ajoquteqarnermut pissutaasut, tunisassiortut ataasiakkaat tunisassiamik misissuinissamut pissutisassaat periarfissaallu, akisussaaffigisat pillugit sillimmasiissutit pissutsillumi allat tunngavigalugit.
Imm. 3. Kinaluunniit, § 4, imm. 2 imaluunniit 4, naapertorlugit akunnermiliuttutut niuertutut tunisassiortutulluunniit ajoqusertumut kingusinnerusukkulluunniit akunnermiliuttutut niuertumut taarsiissutissanik akiliisimasoq, ajoquserneqartup tunisassioqatigiinni niuertoqatigiinnilu siulliusumut piumasaqaataani inissisimalersinnaavoq. Utertitsivigineqarnissamik piumasaqaat atorunnaarsinnaavoq imaluunniit annikillisinneqarsinnaalluni, taarsiivigineqarnissamik piumasaqaateqartoq piaaraluneernikkut mianersuaalliornikkulluunniit ajoqusernerup pineranut pisooqataasimappat annertusisitsisimappalluunniit.
Kapitali 6
Aalajangersakkat allat
Inatsisip sanioqqunneqarsinnaannginnera
§ 12. Inatsit ajoquserneqartumut imaluunniit ajoquserneqartup piumasaqaataanik piumasaqarsinnaalersumut ajoqusiisussamik sanioqqunneqarsinnaanngilaq siornatigut isumaqatigiissuteqatigiissutaasimasoq aqqutigalugu.
Taarsiissutissat pillugit malittarisassanut nalinginnaasunut naleqqiullugu
§ 13. Inatsit killiliissutissartaqanngilaq ajoqusertup taarsiissuteqartarneq pillugu isumaqatigiissummi imaluunniit isumaqatigiissutip avataani malittarisassat nalinginnaasut malillugit imaluunniit malittarisassat inatsisini allani aalajangersagaasut imaluunniit inatsisit allat naapertorlugit taarsiiffigineqarsinnaaneranut.
Pisoqalisoorneq
§ 14. Tunisassiap ajoquteqarnera pissutigalugu inatsit manna malillugu imaluunniit isumaqatigiissummi taassumaluunniit avataani taarsiissuteqartarneq pillugu malittarisassat nalinginnaasut malillugit, tak § 13, taarsiiffigineqarnissamik piumasaqaat pisoqalisoorsimassaaq ullormiit ajoqusertup ajoqusernermik, ajoquteqartoqarneranik aammalu tunisassiortup susassaqartup aqqanik najugaanillu ilisimannilerfigisaaniit imaluunniit ilisimannilerfigisariaqaraluagaaniit ukiut 3 qaangiuppata.
Imm. 2. Pisoqalisoorneq imm. 1-imi malittarisassat malillugit atuutsinneqalersimanngippat, piumasaqaatit atorunnaassapput ullormiit tunisassiortup tunisassiamik ajoqusiisumik nioqqutiginnitsitsilerfianiit ukiut 10-t qaangiuppata. Oqaaseqatigiit siulliit malillugit ukiut pisoqalisoorfissaatitaasut akornginnakkut kipitinniarnissaat pillugu inatsimmi nr. 274, 22. december 1908-imeersumi § 2, oqaaseqatigiit aappaanni aalajangersagaq atortinneqassaaq. Oqaaseqatigiinni siullerni aappaannilu aalajangersakkat atuutissanngillat taarsiissuteqarnissaq pillugu isumaqatigiissummi taassumaluunniit avataani malittarisassat nalinginnaasut malillugit, tak. § 13, tunisassiap ajoqusiinera pissutigalugu taarsiiffigineqarnissamik piumasaqaatinut.