Kalaallit Nunaanni Politiit Naammagittaalliuutigineqarnerannut Siunnersuisoqatigiit


Kalaallit Nunaanni Eqqartuussisarnermik inatsimmi § 64, inatsisikkut nr. 572 10. maaji 2022-meersukkut allanngortinneqartoq, malillugu Kalaallit Nunaanni Politiit Naammagittaalliuutigineqarnerannut Siunnersuisoqatigiit pilersinneqarput.

 

Politiit Naammagittaalliuutigineqarnerannut Oqartussat Arlaannaannulluunniit Attuumassuteqanngitsut (Politiit Naammagittaalliutiginerannut Oqartussat) sulianik Kalaallit Nunaanni politiitut sulisunut tunngasunik suliarinninnerannut atatillugu Kalaallit Nunaanni pissutsinik naammaginartumik ilisimasaqarnissaq qulakkeerniarlugu, Kalaallit Nunaanni Politiit Naammagittaalliuutigineqarnerannut Siunnersuisoqatigiit pilersinneqarput.


Tamanna siunertaralugu suliassanik taamaattunik, tassungalu ilanngullugu naammagittaalliuutinik, nalunaarutinik pinerluttulerinermilu suliassanik Politiit Naammagittaalliutiginerannut Oqartussat paasiniaanerannut atugassatut oqaaseqaatinik ilitsersuutaasunik Kalaallit Nunaanni Politiit Naammagittaalliutiginerannut Siunnersuisoqatigiit tunniussisassapput.


Kalaallit Nunaanni Politiit Naammagittaalliutiginerannut Siunnersuisoqatigiit eqqartuussissuserisumik siulittaasuusussamik, Eqqartuussissuserisut Siunnersuisoqatigiivisa inassuteqarnerisigut justitsministerimit toqqagaasumik, kiisalu inuinnarnik marlunnik, Inatsisartut inassuteqarnerisigut justitsministerimit toqqagaasunik, inuttaqassapput.

 

Inuinnaat Kalaallit Nunaanni Politiit Naammagittaalliuutigineqarnerannut Siunnersuisoqatigiinnut ilaasortaanermik peqatigisaanik kommunalbestyrelsimut, Inatsisartunut Folketingimulluunniit ilaasortaasinnaanngillat. Aammattaaq ministerit, Naalakkersuisunut ilaasortat, eqqartuussissuserisut, eqqartuussissuserisuni fuldmægtigit kiisalu Namminersorlutik Oqartussani, qitiusumik allaffeqarfinni, eqqartuussivinni, Naalagaaffiup Sinniisoqarfiani, politiini kiisalu pinerluuteqarsimasunik isumaginnittoqarfimmi atorfillit sulisullu sinneri toqqagaasinnaanngillat.

 

Siunnersuisoqatigiit ilaasortaat tamarmik Kalaallit Nunaanni najugaqartuussapput.

 

Inatsisartut inunnik arfinilinnik inassuteqassapput, taakkunannga arnat pingasuussapput angutillu pingasut. Inuit inassutigineqartut piumasaqaatinik qulaani taaneqartunik naammassinnissapput. 

 

Inuit katillugit arfinillit Inatsisartunit inassutigineqartut ilaat marluk justitsministerimit toqqarneqassapput

 

Qinigaaffik

Kalaallit Nunaanni Politiit Naammagittaalliutiginerannut Siunnersuisoqatigiinni ilaasortat ukiuni sisamani atuuttussatut toqqagaassapput.
Inatsisartut toqqagaaffimmut 1. januaari 2023-miit 31. decembari 2027-mut inunnik arfinilinnik siullermeerlutik inassuteqassapput.  

 
Inatsisartut inassuteqarnissaat siunertaralugu Justitsministereqarfiup Inatsisartunut saaffiginnissuteqartarnera ileqquuvoq. Inatsisartut inassuteqaataat Justitsministereqarfimmut nalunaarutigineqassapput.

 

Saaffiginninneq:

Kalaallit Nunaanni Politiit Naammagittaalliuutigineqarnerannut Siunnersuisoqatigiit