Coronamut atatillugu Inatsisartut ataatsimiittarfiannut isersinnaanermut malittarisassanik UKA21-milu oqaluuserisassanik naleqqussaaneq


Siulittaasoqarfiup aalajangerpaa ullormut ataatsimiiffiusumut 24. septemberimut malittarisassiunneqarsimasut eqqarsaatigalugit coronamut tunngatillugu
Inatsisartunut isersinnaanermut malittarisassat naleqqussarneqassasut.


Siulittaasoqarfiup paasivaa ilaasortat tamarmik ajoratillu Nuummut apuulluarsimasut tamannalu tunngavigalugu corona eqqarsaatigalugu killilersuutit Inatsisartut
ataatsimiittarfiat eqqarsaatigalugu ulloq 24. september atuutsinneqarsimasut allanngortinniarlugit maannalu corona eqqarsaatigalugu malittarisassanut
nalinginnaasumik atuuttunut naleqqussarlugit:

  • Atorfilinnut, innuttaasunut tusagassiortunullu inatsisartut
    ataatsimittarfianniinniartunut eqqaaniinniartunulluunniit coronapasimik
    takutitsisinnaanissaq piumasaqaataassasoq

 

  • Ilaasortat kaammattorneqarput kaammattuutitut malittarisassat
    eqqaamasassat atuuttut uku coronamut tunngatillugu allattoqarfimmit
    aalajangersarneqarsimasut malinniaqqullugit:
    - Assat asakulaneqassapput assannulluunniit spriti atorneqarluni
    - Talinnut/ikusivit peqittarfiannut quersortarit tangajorlutillu
    - Napparsimaguit suliartornaveersaarit

 

  • Naalakkersuisut pisarnertut ataatsimiittarfimmiissinnaalissapput qulaanili
    malittarisassat aamma malillugit

 

Taamaalilluni aamma Inatsisartut ataatsimiittarfianni qanermut kiinnamullu assiaqutit atorneqarnissaannik piumasaqaat atuukkunnaarsinneqarpoq – imaalilluguli
pisariaqartitsisoqalissagaluarpat eqquteqqinneqarsinnaalluni.

 


Inussiarnersumik inuulluaqqusillunga
Hans Enoksen