Inatsisartunut ilaasortat Inatsisartullu Allattoqarfianni immikkoortortat sinnerisa sullinneqarneranni sullissinermut pisortamik (immikkoortortami pisortamik) Inatsisartut Allattoqarfiat sulisussarsiorpoq.

 

Sullisserusussuseqarpit? Kinaluunniit oqaloqatigisinnaaviuk imminullu tatigisuuit? Iliuuseqarusuttuuit akisussaaffimmillu tigusisinnaavit? Piffissap suliffiup nalinginnaasup avataatigut sulinissaq ajorinngiliuk? Taamaassimappat tassaavutit Inatsisartut Allattoqarfianni sullissinermut pisortatut atorfimmut nutaamut sulisussatut ujartugarput.

Apeqqutinut pissutsinullu isumagineqartussanut atatillugu sullissinermut pisortaq Inatsisartunut ilaasortanut Allattoqarfimmilu sulisunut ulluinnarni pingaarnertut attaveqarfiussaaq.

 

Sullissinermut pisortaq Allattoqarfiup sullissinermut immikkoortortaani aqutsinermut akisussaasuussaaq.

 

Pissutsit arlallit Inatsisartunut ilaasortat allattoqarfimmilu sulisut ulluinnarni sulineranni pingaarutillit isumaginissaat sullissinermut immikkoortortap suliassarai.

Sullissinermut immikkoortortap ilaatigut makku isumagisassarai:

. Inatsisartut ataatsimiinnerisa nalaanni ilaasortat ineqartinneqarnerat,
. Inatsisartuni Allattoqarfimmilu qarasaasiaqarnikkut pissutsit,
. Ilaasortat, partiit allattoqarfiisa allattoqarfiullu allaffeqarnikkut atugaat,
. Illutat iluisa aserfallatsaalineqarnerat eqqiarneqartarnerallu,
. Allassimasunik ilanngussanillu amerlaqisunik Inatsisartunut ilaasortanut elektroniskimik pappiaranngorlugilluunniit agguaassisarneq,
. Pisiortorneq,
. Ataatsimiittoqarnerani nerisaqartitsineq
. kiisalu
. Allattoqarfimmi allakkanik nalunaarsuiffik.

 

Suliassat ilaatigut suliffiup iluani ilaatigullu suliffiup avataani suleqatinik ikiorteqarluni ingerlanneqartarput.

 

Sullissinermut immikkoortortaq Inatsisartut Allattoqarfianut nalinginnaasumik ilaavoq. Immikkoortortami sulisut sullissinermut pisortap saniatigut maanna sisamanut amerlassusiligaapput, tamatuma saniatigut Inatsisartut ataatsimiinnerisa nalaanni ikiortit sulisorineqartarlutik. Sullissinermut pisortap Allattoqarfiup allattaanera qullersaraa.

Atorfik nutaatut pilersinneqarpoq, taamaattumillu ineriartortinnissaanut illit eqeersimaartumik anguniagaqarfiusumillu peqataasinnaassaatit, tassungalu ilanngullugu suleriaatsinik, atorfinnut nassuiaatinik, sillimasussat pilersaarusiornerannik il.il. aalajangersaanermi peqataassallutit.

 

Minnerunngitsumik immikkoortortap ilaasortanik sulisunillu sullissinerata ingerlaavartumik pitsanngorsarneqarnerani aammalu immikkoortortap iluani Allattoqarfiullu immikkoortuisa sinnerini ineriartortitsinermut peqataasinnaassaatit.

 

Inuttut piginnaasat:
Ammasuuvutit, sullissisinnaassuseqarputit aammalu suliassat assigiinngitsorpassuit ataatsikkut aqussinnaallugit. Namminersorlutit sulisinnaassuseqarputit ataqatigiissaarisinnaassuseqarluarlutillu. Inuttut nukittuujuvutit naaggaarnissamullu tunuarsimaartuunak.

Microsoft Officemik (Word aamma Excel) aammalu Outlookimik atuinermik misilittagaqarluartuuvutit. Scanjour Captiamik misilittagaqarneq iluaqutaassaaq.

 

Suliffeqarfimmi anginngitsumi ataatsimut isigalugu maligassiuerusussuseqarfiusumi aammalu annertusaanissamut isummanik siunnersuutinillu tigusaqarnissamut kissaateqarfiusumi suleqataassaatit. Nukissaqarluarputit eqinnaattuullutillu aammalu ulluinnarni qiimmassaasinnaallutit.

Siusinnerusukkut suliffigisimasanit suliassanut attuumassuteqartunit misilittagaqarnissaq aqutsinermillu misilittagaqarnissaq pingaartinneqarput.

Ilinniakkatigut aalajangersimasumik tunuliaquteqarnissaq piumasaqaatiginngilarput, ilimagaarpulli EVU-mik, NI2-mik assigisaannilluunniit ilinniagaqarsimassasutit.

Kalaallisut danskisullu oqalullutillu allassinnaanissat piumasaqaataavoq.

 

Atorfinitsitsinermi atugassarititaasut:
Immikkut isumaqatigiissutitalimmik aammalu piginnaasatit misilittakkatillu apeqqutaatillugit assersuutigalugu SIK-p niuernikkut allaffissornikkullu sulisunut isumaqatigiissutaata imaluunniit AK-p atorfimmut isumaqatigiissutaata ataanni immikkoortortami pisortanut atugassarititaasut assingi tunngavigalugit atorfinitsinneqassaatit. Piffissap nalinginnaasumik suliffiusup avataatigut suliartoqquneqaratarsinnaanermut pisussaaffimmik atorfik ilaqartinneqarpoq, tassungalu atatillugu tapisiaqartitsisoqassalluni.

 

Isumaqatigiissuteqarneq naapertorlugu sulineq aallartinneqassaaq - taamaattorli atorfimmut piukkunnartup utaqqinissaanut piareersimavugut.
Qassinik ukioqarneq aporfiunngilluinnarpoq.

 

Inissiamik pisatsersorneqanngitsumik maleruagassallu atuuttut malillugit ineqarnermut akilersorneqartussamik innersuussisoqarsinnaavoq. Atorfinikkiartorluni atorfeqarunnaarnermilu angalaneq kiisalu pisattat nuunneqarnerat kattuffiit isumaqatigiissutaat/isumaqatigiissutit atuuttut assingi malillugit atugassarititaasut naapertorlugit pissapput.

 

Attavissaq:
Atorfik pillugu apeqqutissaqaruit allattaanermut Ellen Colby Chemnitzimut, oqarasuaat nr. 34 61 04 imaluunniit e-mail ekc@ina.gl saaffiginninnissannut tikilluaqqusaavutit.

 

Qinnuteqaat:
Qinnuteqaat ilinniagarisimasat siusinnerusukkullu suliffigisimasat pillugit paasissutissanik ilalik, soraarummeersimanermut uppernarsaatit il.il. assilinerinik ilalerlugu allakkatut imaluunniit e-mailikkut nassiunneqassaaq, taamaalillugu kingusinnerpaamik ataasinngornermi ulloq 10. august 2015, nal. 12.00, uagutsinnit tiguneqareersimasussanngorlugu.