Nutaarsiassat


2022 2021 2020 Flere år...

02-03-2022

Nunanut Allanut Sillimaniarnermullu Ataatsimiititaliap Ukrainemi pisut qanimut malinnaavigai

Nunanut Allanut Sillimaniarnermullu Ataatsimiititaliap ulluni makkunani Ukrainemi pisut qanimut malinnaavigai. Sisamanngormat russit sakkutuui Ukrainemut isaammatali ataatsimiititaliaq qanimut ingerlaavartumillu Naalakkersuisunik oqaloqateqartarpoq. Ukrainemi innuttaasunik tamaanilu naqisimaneqarani innuttaasut oqartussaaqataanerannik saassussineq tamanna ataatsimiititaliap assuaraa. Taamaattumik aamma nunat tamalaat Ruslandimik pillaassutitut iliuusaat Naalakkersuisunit ilalerneqarsimasut ataatsimiititaliap isumaqatigiittup tapersersorpai.

 

Paasissutissat nalunaarutillu tusagassiorfitsigut paasissutissanillu siammarterivitsigut allatigut pissarsiarineqarsinnaalinnginnerini ataatsimiititaliamut tunniunneqartarnissaat ataatsimiititaliamut qitiulluinnarpoq. Tamanna nalitsinnisut piffissami ajornartoorfiusumi nunat tamalaat akornanni susassaqartorpassuit assigiinngitsunik soqutigisallit tamarmik immikkut iliuuseqarfigisartagaanni tamakkiisumik malitsinniarlugu ajornarsinnaasarpoq. Naalagaaffeqatigiilli iluanni pissutsit taamaattariaqanngillat. Naalagaaffeqatigiinni suleqatigiittussaavugut ataqqeqatigiilluta naligiillutalu. Taamaakkaluartorli ataatsimiititaliap misigisimavaa nutaarsiassat tusagassiorfitsigut sammineqalereersut Naalakkersuisut ataatsimiititaluarlu aatsaat ilisimatinneqartartut. Kalaallit Nunaata Danmarkillu akornanni suleqatigiinnermi pitsaasumik suleqatigiinnermut ataatsikkut ilisimatinneqartarneq tunngaviuvoq taamaattumillu tamatuma siunissami maleqqissaarneqarnissaannut ataatsimiititaliaq sakkortuumik kaammattuuteqarpoq.

 

Naak nalitsinni pisut annilaarnarsinnaagaluartut nunarsuatsinni kisimiinnginnerput ataatsimiititaliap eqqaasitsissutigissavaa. Illersoqatigiiffinnut nukittuunut peqataavugut Ruslandilu pillarniarlugu iliuutsit ikinngutivut naqisimaneqaranilu naalakkersuinermik ingerlatsiviusut peqatigalugit ataatsimoorfigalugit. Ukrainemik tapersersuinerput ersersinniarlugu pillaatitut iliuutsinut peqataavugut. Nunarsuarmioqatigiit akornanni tapersuineq nammaqatigiinnerlu maanna takutinneqartoq ima sakkortutigaaq, allaat nuna qangaaniilli arlaannaannilluunniik illersuineq ajortutut inissisimasartoq Schweiz pillaatitut iliuutsinut taakkununnga peqataalluni.

 

Ukraine eqqarsaatigalugu aaqqiagiinngissuteqarnerup piaartumik uninnissaa ataatsimiititaliap neriuutigaa.

 

 

 

 

 

Jens Napaattooq

Nunanut Allanut Sillimaniarnermullu Ataatsimiititaliap siulittaasua

Paasissutissat sukumiinerusut ataatsimiititaliap siulittaasuanut oqarasuaammut +299 25 88 66 sianerluni pissarsiarineqarsinnaapput