Nutaarsiassat


2022 2021 2020 Flere år...

25-02-2022

2022-mi upernaakkut ataatsimiinneq

2022-mi Inatsisartut upernaakkut ataatsimiinnissaannut (UPA22) oqaluuserisassat ullumi nassiussuunneqarput.

 

Inatsisartut upernaakkut ataatsimiinnerat ataasinngornermi ulloq 21. marts 2022 nal. 11.00 aallartissaaq 20. maj 2022-llu tungaanut ingerlasussatut pilersaarutigineqarluni.

 

Siulittaasoqarfiulli ullut ataatsimiiffiusussat kingullit ulloq 7. marts 2022 apeqquteqaat aallaavigalugu oqallinnissamik siunnersuutinik tunniussivissap kingorna naleqqussarumaarpai, taamaattumillu ullut ataatsimiiffiusussat kingulliit kingusinnerusukkut iluarsineqarsinnaassallutik.

 

Taamaalilluni Inatsisartunut ilaasortanit immikkoortut nutaat katillugit 41-t Naalakkersuisunillu immikkoortut nutaat 22-t UPA22-mi suliarineqartussatut oqaluuserisassanut ilanngunneqarput. Tamatuma saniatigut aalajangiiffigisassatut siunnersuutit 17-it UKA21-mit kinguartinneqarsimasut oqaluuserisassanut ilanngunneqarput.

 

Sapaatit akunnerini ullut ataatsimiiffiusartussat imatut agguataarneqarput:

 

2022-mi upernaakkut ataatsimiinneq (UPA22)

  • 2022-mi upernaakkut ataatsimiinneq aallartissaaq ataasinngornermi ulloq 21. marts nal. 11.00
  • Sapaatip akunneranut ullut ataatsimiiffiusut pingasuussapput – marlunngorneq, pingasunngorneq aamma sisamanngorneq – piffissami nal. 11.00 – 17.00
  • Sapaatilli akunnerani 12-mi ullut ataatsimiiffiusut sisamaassapput
  • Ataasinngornerit tallimanngornerillu ataatsimiititaliani ataatsimiiffiussapput
  • Pingasunngornerit tamaasa piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni, akunnerlu apeqquteqarfik siulleq pissaaq ulloq 23. marts (Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq pisariaqarneralu malillugu nutarterneqartassalluni)
  • Ataatsimiinneq piffissami apriilip ulluisa 13-iannit 19-iannut ullut taakku ilanngullugit poorskernerani unillatsiarfiussaaq
  • Partiit siuttuisa akunnerminni apeqqarissaarnerat ulloq 20. april nal. 9.30-miit 11.00-imut ingerlanneqassaaq, tamatumalu kingorna ataatsimiinneq akunnermik apeqquteqarfiusinnaasumik nanginneqassalluni, taannalu naammasseriarpat 17.00-ip tungaanut oqaluuserisassani immikkoortut nangillugit oqaluuserineqassallutik.
  • Aningaasaqarnermut Ataatsimiititaliamik aamma Kukkunersiuinermut Ataatsimiititaliamik pilersitsineq (oqaluuserisassani imm. 4) ulloq 21. marts pissaaq
  • Ullunik 25-nik ataatsimiiffiulluni UPA22-mi ulloq ataatsimiiffik kingulliugallartoq tassaassaaq ulloq 20. maj.

 

UPA2022-mut atatillugu atortussat tamarmik www.inatsisartut.gl-imi takuneqarsinnaapput.

 

Ilaasortat Naalakkersuisullu ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarput, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput, taamaattorli suli periarfissaqarpoq atortussat tamaasa qarasaasiakkut tigusarusullugit nalunaarnissamut. Tamanna pillugu saaffiginninneq uunga ingerlanneqassaaq: lkri@inatsisartut.gl.

 

 

Inussiarnersumik inuulluaqqusillunga

 

Hans Enoksen