Nutaarsiassat


2021 2020 2019 Flere år...

29-10-2021

Inatsisartut Allattoqarfiata Pisortaa ulloq 9. oktober 2021 kunngikkormiut nersornaasiuttagaannik Ridderkorset af Dannebrogordenenimik saqqarmiulerneqartoq.

Ataqqinartorsuup Dronningip nunatsinnut pisortatigooortumik tikeraarneranut atatillugu Pisortaq Ellen Kolby Chemnitz ulloq 9. oktober 2021 Ataqqinartorsuarmit Dronningimit kunngikkormiut nersornaasiuttagaannik Ridderkorset af Dannebrogordenenimik saqqarmiulerneqarpoq. Saqqarmiuliineq pivoq Nuummi Ilisimatusarfimmi nalliuttorsiualaarnermi.

 

Ellen Kolby Chemnitz Inatsisartut Allattoqarfianni 1. januar 2001-imili atorfeqarpoq, siullermik ataatsimiititalianut allatseqarfimmi fuldmægtigitut, tamatumalu kingorna 1. marts 2003-mit Inatsisartunut allatsitut aammalu 1. september 2003-mit Inatsisartut Allattaanerattut. Ulloq 1. august Allattoqarfiup aaqqissuussaaneranut nutaamut atatillugu atorfimmut taaguut Allattaaneq allanngortinneqarpoq Pisortanngortillugu.

 

Nunatsinni atorfimmi tassani Ellen Kolby Chemnitzitut sivisutigisumik atorfeqartoqarnera qaqutigoorpoq. Namminersorlutik Oqartussani qaffasissumik atorfillit ilaattut atorfeqarnermini naalakkersuinikkut sulisitsisunik taarseraattunik taama amerlatigisunik sullissisinnaanerminik qaqutigoortumik piginnaaneqarnini takutissimavaa. Ellen Kolby Chemnitzip ingerlatsinermini aalajaatsuuneq, tatiginartuuneq, pimoorussineq naleqqussarsinnaassuseqarnerlu ilisarnaatigai, tamannalumi sivisuumik atorfeqarneratigut uppernarsarneqarpoq.

 

Siulittaasoqarfiup matumuuna Pisortaq Ridderkorset af Dannebrogsordenenimik nersornaatitut saqqarmiulerneqarneranik pilluaqquaat.

 

 

Hans Enoksen

Inatsisartut Siulittaasuat