Nutaarsiassat


2021 2020 2019 Flere år...

10-09-2021

Nunat Avannarliit Killiit Siunnersuisoqatigiiffiata 2021-mi ukiumoortumik ataatsimiinnera.

Nunat Avannarliit Killiit Siunnersuisoqatigiiffiata 37-ssaannik nalinginnaasumik ukiumoortumik ataatsimiinnini, Savalimmiuni Suðuroy‘imi marlunngornermi ulloq 31. august kiisalu pingasunngornermi ulloq 1. september 2021-mi ingerlappaa. Ataatsimiinnermit immiussat uani takuneqarsinnaapput: www.vestnordisk.is

 

Nunat Avannarliit Killiit Siunnersuisoqatigiiffiata ukiumoortumik ataatsimiinnerani Kalaallit Nunaannit, Savalimmiunit Islandimiillu innuttaasut qinigaat siunnersuisoqatigiiffimmut ilaasortaasut, nunanit ilaasortaatitaqartunit ataasiakkaanit arfinilikkaarlutik katersuupput. Tamatuma saniatigut Savalimmiuni Nunanut Allanut Tunngassutilinnut Kulturimullu Naalakkersuisoq Jenis av Rana saqqummiussivoq, kingorna saqqummiussaq pillugu Savalimmiuni Naalakkersuisumik oqalliseqateqarnissamik siunnersuisoqatigiiffimmut ilaasortat periarfissinneqarlutik.

 

Ukiumoortumik ataatsimiinnermi Nunat Avannarliit Killiit Siunnersuisoqatigiiffianni 2021/2022-mut Siulittaasuuffik Kalaallit Nunaannit tiguneqarpoq, Nunallu Avannarliit Killiit Siunnersuisoqatigiiffiannut nutaatut Siulittaasunngortoq Siverth K. Heilmann ima oqaaseqarpoq:

 

”Coronap nunarsuarmi tamarmi tuniluutilernerata kingorna kiisami immitsinnut tikilluta katersuussinnaalernerput nunani avannarlerni killerni suleqatigiinnitsinnut pingaartuuvoq. Naak siunnersuisoqatigiiffik qarasaasiakkut attaveqaatitigut ataatsimiittarluni suli ingerlatsigaluartoq, Inatsisartunut ilaasortat naapillutik oqaluuserisassanik nunanut pineqartunut pingasunut pingaaruteqartunik oqallisiginnissinnaanerat Kalaallit Nunaanni Inatsisartut, Islandimi Altingip Savalimmiunilu Lagtingip akornanni naalakkersuinikkut suleqatigiinnermut pingaartuuvoq.”

 

Kaammattuutitut aalaajangersakkat nutaat

Nunat Avannarliit Killiit Siunnersuisoqatigiiffiat ukiumoortumik ataatsimiinnermini kaammattuutitut aalajangersakkanik marlunnik akuersissuteqarpoq. Nunani avannarlerni killerni Avatangiisinut Silallu Pissusaanut Naalakkersuisut suleqatigiinnerminnik annertusaaqqullugit kaammattuutikkut siullikkut kaammattorneqarput. Kaammatuutip aappaatigut nunani avannarlerni killerni ungasianiit ilinniartitsinermik pilersitsiniarlutik inerisaallutillu suleqatigiinnerminnik nukittorsaaqqullugit Kalaallit Nunaanni, Islandimi Savalimmiunilu Naalakkersuisut kaammattorneqarput.

 

2022-mi qulequtaqartitsilluni ataatsimeersuarnissat kiisalu ukiumoortumik ataatsimiinnissaq

Aammattaaq 2022-mi marloriarluni qulequtaqartitsilluni ataatsimeerssuartoqassasoq august 2022-milu ukiumoortumik ataatsimiittoqassasoq Nunat Avannarliit Killiit Siunnersuisoqatigiiffiata ukiumoortumik ataatsimiinnerani akuersissutigineqarpoq.

 

2021-mi qulequtaqartitsilluni ataatsimeersuarnissaagaluaq Qaqortumi ingerlanneqartussaagaluaq COVID-19-ip nassataanik Kalaallit Nunaannut angalasinnaanermik killilersuineq tunngavigalugu taamaatinneqarpoq 2022-mullu kinguartinneqarluni. Ukiup suliffiusup 2021-p Qaqortumi juni 2021-mi “Nunani Avannarlerni Killerni inuusuttut siunissami periarfissaat“ qulequtaralugu qulequtaqartitsilluni ataatsimeersuarnermik naggaserneqarnissaa qulequtaqartitsilluni ataatsimeersuarnermik siunertaasimavoq.

 

Taamaalillutik inuusuttut siunissami periarfissaat siunnersuisoqatigiiffiup 2020-21-mi sulinerani tamarmi qitiutinneqarsimapput. Qulequtaq ilaatigut Nunat Avannarliit Killiit Ulluanni, 2020-2021-mi ukiuunerani qarasaasiakkut attaveqaatitigut ataatsimiittarnerni, tamatumalu saniatigut oqaloqatigiittarfinni Nunat Avannarliit Killiit Siunnersuisoqatigiiffiannit alaatsinaatsutut peqataaffigineqartuni tamani Nunat Avannarliit Killiit Siunnersuisoqatigiiffiannit oqaluuserisassanngortinneqartarpoq.

 

Tamatuma saniatigut ulluni 25. -26. januar 2022, Islandimi Akureyremi nalinginnaasumik qulequtaqartitsilluni ataatsimeersuartoqassaaq. Matumani siunnersuisoqatigiiffimmit qulequtariniarneqartoq “Nunani Avannarlerni Killerni silaannaap pissusaanik iliuuseqarfiginninneq mingutsitsinngitsuunermullu ikaarsaarneq”, qulequtaavoq nunagisatsinni inuusuttunit soqutigineqartorujussuusoq. Taamaammat pissutsit iliuuseqarfigineqarnissaat nukingernartut siunnersuisoqatigiiffimmit maannangaaq qisuariarfigineqartariaqarput, Nunallu Avannarliit Killiit Siunnersuisoqatigiiffianni ukiumi suliffiusumi tullermi taamak iliorniarpugut.

 

Silaannaap pissusaa Nunat Avannarliit Killiit Siunnersuisoqatigiiffiannit periarfissat tamaasa atorlugit oqaluuserisassanngortinniarneqarpoq, nunat ataasiakkaat Naalakkersuisui nunanilu tamalaani suleqatigisat qulequtaq pillugu suleqatiseriniarneqarput.

 

Aammattaaq siunnersuisoqatigiiffimmi isumaqartoqarpoq nunani avannarlerni killerni Naalakkersuisut akunnerminni suleqatigiinnermik annertusaanikkut aammalu avatangiisit silaannaallu pissusaa pillugit suliassaqarfimmi ataatsimoorullugu iliuuseqarnermikkut nammineerlutik silaannaap pissusaa pillugu suliassaqarfimmi akisussaaffimmik tigusinerusariaqartut. Tamanna ukioq manna ukiumoortumik ataatsimiinnermi kaammattuutitut aalajangersakkakkut nr. 1/2021-kkut nunani ataasiakkaani Avatangiisunut Silaannaallu Pissusaanut Naalakkersuisunut kaammattuutikkut naqissuserneqarpoq.

 

“Silaannaap pissusaanik iliuuseqarfiginninneq mingutsitsinngitsuunermullu ikaarsaarneq” qulequtaralugu januar 2022-mi Akureyrimi qulequtaqartitsilluni ataatsimeersuarnermi Silaannaap Pissusaa Pillugu Naalakkersuisut siunnersuisoqatigiiffimmit qaaqquniarneqarput, suleqatigiinnissamik isumaqatigiissuteqarnermut aallarnisaataasumillu Naalakkersuisutut akunnermi ataatsimeeqatigiinnermut periarfissamik atuinissaat naatsorsuutigineqarluni.

 

Nunat Avannarliit Killiit Siunnersuisoqatigiiffiata 2022-mi ukiumoortumik ataatsimiinnera Ilulissani ulluni 30. -31. august ingerlanneqassaaq.

 

 

 

Kalaallit Nunaannit aallartitat sinnerlugit

Siverth K. Heilmann

Kalaallit Nunaannit Nunat Avannarliit Killiit Siunnersuisoqatigiiffiannut aallartitat Siulittaasuat

 

 

 

 

Paasisaqarnerujumalluni saaffissaq:

Sigurdur Olafsson, allattaaneq, Nunat Avannarliit Killiit Siunnersuisoqatigiiffiat, sigurduro@althingi.is, oqarasuaat: +354 6629922