Nutaarsiassat


2021 2020 2019 Flere år...

23-08-2021

Inatsisartut Siulittaasuata Hans Enoksenip ulloq 23. august 2021 Nuummi Inatsisartut ataatsimiittarfianni Rasmus Lyberth sølviusumik Nersornaaserpaa

Rasmus Lyberth sølviusumik Nersornaaserneqarpoq nipilersortarnikkut isiginnaartitsisarnikkullu piffissami sivisuumi annertuumillu nunatsinni kulturitsinnik malunnartumik tunniusimallunilu ingerlatitseqqiisarsimanermigut nunatsinnik nersortarialimmik sullissisimanera pissutigalugu.

 

Inatsisartut Siulittaasuata Rasmus Lyberthimut oqalugiarnermini ilaatigut erseqqissarpai:

”1970-ikkunnili nunatsinni nipilersornerup silarsuaani malunnaateqarluarlutit inissisimalersimavutit, kisiannili aamma immikkorluinnaq ittumik nunatsinniit nipilersornermik nunatta avataanit soqutiginninnermik annertuumik ammaassisimallutit – aamma kalaallisut erinarsuinnaraangavilluunniit. Tusarnaartunnik tiguaallaqqipputit, tamanna aamma inuppassuit Katuami 70-iliillutit inuuissiornerit malunnartinniarlugu tusarnaartitsininni kingullermi misigaat. Maanngaanniit aamma inuuissiorninni pilluaqquakkit.

 

Timmisartunik iluarsaasartutut flymekanikeritut isiginnaartitsisartoqatigiinnilu Tuukkakkunni isiginnaartitsisartut ilinniarsimavutit. Filmini Tukumami 1984-imeersumi, Qaamarngup Uummataani 1998-imeersumi Danmarkimilu radiup tv-kkut juullimut ammartagaanni Nissernes ø-mi 2003-meersumi aamma peqataasimavutit. Allaat 1979-imi nunatsinniit siullersaallutit danskit melodi grandprixiannut peqataavutit erinaq ”Ataatap qinnutaa” (Faders Bøn) – soorunami kalaallisut - atorlugu.

 

Namminerluinnaq pigisannik nipilersoriaaseqartutut oqaatigineqartarputit, nipilersukkatit nipikkut timikkullu oqaluttuartumik pissusilersornikkut ersersittarlugit, nipilersornerullu silarsuaanut ilunngunartumut tamatta nassartarluta. Nipilersoriaatsit taamatuttaaq aamma nunatsinniit nunarsuarmioqatigiit nipilersoriaasiattut taaneqartarpoq. Nipilersortartoq anersaalisimaartoq takusinnaasarparput, nipilersuutaani pinngortitaq misigissutsillu qitiulluinnarlutik.

 

Nipilersornerup tunuani inuttut inuunermik isiginneriaatsit nalissaqanngilaq - inuunermik qaamasumik isiginneriaaseq, kikkunnut tamanut eqqanniittunut sunniuttartoq. Inuttut naapikkaanni imaluunniit allanik nipilersoqateqarlutit kisimiillutilluunniit guitareqarlutit – ilaannikkullu nipiinnaat atorlugu – tusarnaartitsinerit tusarnaaraanni inuunerup ingerlaqqinnissaanut nukissanik nutaanik nassarluni inuunermilu pisartut annikinnerusut annertunerusullu nutaamik nuannaarutigalugit angerlartariaqartarpoq.

 

Kunngikkormiut nersornaasiuttagaannik Ridder af Dannebrogimik saqqarmiulerneqarsimavutit, piffissallu ingerlanerani nipilersornerup kulturillu iluanni arlaleriaqalutit akimasuunik akissarsisinneqartarsimallutit.”

 

 

 

 

Siulittaasoqarfik sinnerlugu

 

Hans Enoksen

Inatsisartut Siulittaasuat