Nutaarsiassat


2021 2020 2019 Flere år...

16-02-2021

Mittarfissanut aningaasartuutit suli qaffakkaluttuinnarneri ernuminarpoq.

Inatsisartut Sanaartornermut Ataatsimiititaliaanit mittarfissanut aningaasartuutissat qaffakkiartuaarneri ernumanarluinnartutut isigineqarpoq. Innuttaasunukua ataasiakkaarlutik, mittarfissat sanaartorneqarnerannut akileeqataasussat.

 

Sanaartornermut aningaasartuutissat 3,5 mia. kr.-qartussatut siunnerfigineqarnikuuvoq. Inatsisartuni mittarfissanut suliap ingerlannerani aningaasat atugassanngortinneqarsimasut, sanaartorneranut aningaasartuutissatut siunniunneqarsimasut annertuumik sipporneqassasut maannakkut aningaasanik pisariaqartitsisoqarnerata takutippaa. Peqatigitillugu inaarutaasumik akigitinneqartussap suli ilisimaneqannginnera ajuusaarnartorujussuuvoq.

 

Ataatsimiititaliaq isumaqarpoq, pissutsit qanoq inneranik innuttaasunut tamanut Naalakkersuisut nassuiaanissaat piffissanngortoq.

 

Matumuuna ataatsimiititaliamit Naalakkersuisunut kaammattuutigineqassaaq suliniutinik angisuunik suliaqartarnerminni sukumiinerusumik ingerlatsisassasut. Minnerunngitsumik suli maannamit  ammanerujussuarmik ingerlaavartumik sanaartukkat siuariartorneri pillugit aningaasarparujussuillu pineqartillugit innuttaasut ilisimatinneqartarnissaat pisariaqarpoq.

 

Tamakku tunngavigalugit Naalakkersuisut mittarfissat sanaartorneqarnerat pillugit suliarinninnerat sakkortuumik ataatsimiititaliamit isornartinneqarput.

 

 

Inussiarnersumik inuulluaqqusillunga

 

Justus Hansen

Inatsisartut Sanaartornermut Ataatsimiititaliap siulittaasua

 

 

Annertunerusumik paasiniaaniaavigineqarsinnaavoq, Sanaartornermut Ataatsimiititaliami Siulittaasoq, Justus Hansen, uunga attavigalugu: +299 53 12 10