Nutaarsiassat


2020 2019 2018 Flere år...

15-11-2020

Inatsisartuni illutatigut avatangiisit

Inatsisartuni illutatigut avatangiisit aammalu Inatsisartuniilluni peqqissutsikkut ulorianartorsiortoqarsinnaanera pillugit tusagassiorfinni oqaatigineqartut isumakulunnarsinnaasut erseqqissaaviginissaat Siulittaasoqarfimmit tunngavissaqartinneqarpoq.

 

Inatsisartut illutatigut avatangiiserisaannik pitsanngorsaanissaq qinersivinni arlalinni Siulittaasoqarfiusartut aallartinniartarsimagaluaraat ilisimaneqarpoq, tamannali naalakkersuinikkut tamakkiisumik taperserneqarsinnaasarsimanani.

 

Taamaattumillu illutatigut avatangiisit piusut aallaavigalugit Siulittaasoqarfik sulisariaqarpoq aammalu iluarsaasariaqarnerit pisariaqartut ingerlaavartumik aallartittariaqartarlugit.

 

Inatsisartuniinnerli peqqissutsimut ulorianartorsiuutaanngimmat Siulittaasoqarfimmit erseqqissarneqartariaqarpoq. Tusagassiorfiimmi paasissutissiissutigisaatigut taamaattoqarsorinarsinnaammat.

 

Taamaalillunilu misissuinerni Inatsisartuni oqoqarneranik paasisaqartoqanngilaq. Taamaattoqarsimagaluarpammi tamatuminnga iluarsaaneq Siulittaasoqarfimmit soorunami aallartinneqarsimassagaluarpoq.

 

Illorsuulli ilaata politeeqarfimmut atasup silataani iikkat iluarsaannissaat pilersaarutaavoq, tamatumunnga silataani iikkat pisoqqat igalaallu ussissaataanni PCB-eqarneranik uuttortaaneq tunngaviulluni.

 

Taamatut iluarsaanissamik pilersaarut ingerlanneqarpoq, tamatumanili illorsuup ilaa matumani taaneqartoq kisimi pineqarpoq, tassaniipput inimi allermi Demokraatit Partii Naleqqallu allaffii taakkulu allatseqarfii, Inuit Ataqatigiit ilaasortaat amerlanngitsut aatsisartoqarfik kiisalu ini qullermiipput Inatsisartut Siulittaasuata kiisalu allattoqarfiup sulisuisa ilaasa allaffii.

 

Illutatigulli avatangiisit nutarterneqarnissamik pisariaqartitsisut Siulittaasoqarfik suli isumaqarpoq.

 

Taamaalillunilu illutatigut avatangiisit ullutsinnut naleqqukkunnaarsimapput – tamatumani sulisut ilaasortalluunniit imaluunniit innuttaasut isersinnaanerat eqqarsaatigalugu – aammalu suliffeqarfiup isumassarsiornartuunissaanik imaluunniit oqartussaaqataanermi isumassarsiorfissatut akuutitsiffiusutullu katersuuffittut ullutsinni piumasaqaatinut naapertuukkunnaarsimalluni.

 

Taamaalillunilu Inatsisartut illutatigut avatangiisiini innuttaasut qinigaat kisimiinngillat, aammali sulisunut amerlasuunut suliffiuvoq aammalu suliffeqarfimmut avatangiisitigut piumasaqaatinik sukkulluunniit atuuttunik naammassinnittussaalluni.

 

 

Inussiarnersumik inuulluaqqusillunga

Vivian Motzfeldt

Inatsisartut Siulittaasuat