Nutaarsiassat


2020 2019 2018 Flere år...

31-10-2020

Uummannap Qeqertarsuullu Tunuani sinerissamut qanittumi umiatsiaararsorluni qaleralinniarnerup ulloq 28. oktober 2020-mi unitsinneqarnera pillugu Aalisarnermut, Piniarnermut Nunalerinermullu Ataatsimiititaliap ammasumik siunersiuinera

Aalisarnermut, Piniarnermut Nunalerinermullu Naalakkersuisoq ammasumik siunersiuinissamut Aalisarnermut, Piniarnermut Nunalerinermullu Ataatsimiititaliamit aggersarneqarpoq. Ammasumik siunersiuineq Uummannap Qeqertarsuullu Tunuani sinerissamut qanittumi umiatsiaararsorluni qaleralinniarnerup ulloq 28. oktober 2020-mi unitsinneqarneranut tunngassaaq.

 

Siunersiuineq ataasinngorpat ulloq 2. november 2020 nal. 14.15 ataatsimiittarfik Erling Høeghimi ingerlanneqassaaq.

 

Ammasumik siunersiuinerit nalinginnaasumik tusagassiortut saniatigut sioqqutsilluni nalunaarnikkut tamanit najuuffigineqarsinnaasaraluarput. Coronalli ajornartorsiortitsinera pissutigalugu sapinngisamik najuuttut killilersimaarniarlugit ulloq 2. november 2020 siunersiuinermi tusagassiortut kisimik najuunnissamut qaaqquneqassasut aalajangiunneqarsimavoq.

 

Paasisaqarnerujumalluni Aalisarnermut, Piniarnermut Nunalerinermullu Ataatsimiititaliap Siulittaasua Henrik Fleischer oqarasuaatikkut ugguuna; +299 52 72 82 saaffigineqarsinnaavoq.

 

Siunersiuinerup qanorpiaq ingerlanneqarnissaa pillugu paasisaqarumalluni Inatsisartut Allattoqarfiat oqarasuaatikkut uunga saaffigineqarsinnaavoq: 34 62 48

 

 

Henrik Fleischer

Aalisarnermut, Piniarnermut Nunalerinermullu Ataatsimiititaliap Siulittaasua