Nutaarsiassat


2020 2019 2018 Flere år...

03-07-2020

Inatsisartut siulittaasuata tulliata pingajuat Jens Danielsenip ulloq 3. juli 2020 Hans Jensen, Qaanaami sølviusumik Nersornaaserpaa

Inatsisartut Siulittaasoqarfiata Hans Jensen, Qaanaaq, sølviusumik Nersornaaserpaat nunatsinni namminersortutut, sivisuumik malunnaatilimmillu tunniusimalluni maligassiuisimanera tunngavigalugu.

 

Inatsisartut Siulittaasuata tulliata pingajuat Jens Danielsenip, Hans Jensimut oqaaseqarnermini ilaatigut erseqqissarpaa:

 

Hans, Dundas-imi inunngorputit 19. Juni 1950 ataataralugu Ajoqi Landsrådemullu Ilaasortaasimasoq Peter Jensen, anaanaralugulu Theresa Jensen. 1953-imi Thule Air Base pilersinneqarneranut atatillugu ilaqutariit 30-it allat peqatigalugit Dundas-imiit nuutsitaasunut ilaavusi. Qaanaamiilli Siorapalunnut utimullu ilaquttasilu arlaleriarlusi nuuttarsimavusi ataatavit ajoqiunera peqqutaalluni.

 

Ikast Handelsskolemi ilinniarnerit naammassigakku KGH-mi, kingornagut KNI-ngortumi sulisimavutit niivertut aappaattut ilaatigut inissisimasarlutit, sulinerpillu saniatigut takornariat sumiiffissaannik ataqatigiissaarisutut inissisimasarsimallutit. Ataqatigiissaarisarnerit namminersulernissarnut isummamik pilersitsimapput, kingornagullumi 1992-imi unnuisarfimmik Qaanaami siullerpaallutit kisiartaallutillu nuliallu ingerlatsilersimallusi.

 

Unnuisarfimmik ingerlatsinerit Qaanaami takornariaqarnikkut siuarsaasimavoq innuttaasut aningaasarsiornerannut malunnaataalluartumik. Inughuittaaq suleqatigalugit takornariat puigunaatsumik misigisassinnerisigut nunarput avammut nittarsaalluartarsimavat.

 

Avataaniillu misissuiartorlutik, immiussiartorlutik allatigulluunniit paasisassarsioriartorlutik tikittut tamaasa, tikilluaqqullugit sapinngisat tamaat ikiorniartarsimavatit ilaatigut unnuiffissaqartinnerisigut, angallanneqarnissaannik isumassornerisigut kiisalu inughuit inooriaasiannik nittarsaassilluarnikkut.

 

Siulittaasoqarfik sinnerlugu

 

Jens Danielsen

Inatsisartut siulittaasuata tulliata pingajuat