Nutaarsiassat


2020 2019 2018 Flere år...

21-06-2020

Inatsisartuni Siulittaasup Tulliata Justus Hansenip ulloq 21. juni 2020 Maligassiuisoq Akolu Larsen sølviusumik Nersornaaserpaa, Hotel Angmagssalimmi, Tasiilamiittumi

Akolu Larsen sølviusumik Nersornaaserneqarpoq, sivisuumik tunniusimallunilu Tasiilami maligassiuisutut suliniuteqartutullu nersortarialimmik annertuumillu iliuuseqartarsimanera tunngavigalugu.

 

Inatsisartuni Siulittaasup Tulliata, Justus Hansenip Akolu Larsenimut oqaaseqarnermini ilaatigut erseqqissarpai:

 

Dronning Ingridip meeqqeriviani ukiuni 25-ni atasuinnarmik nerisaqartitsisuusimavutit, nerisassiullaqqissuunerpit saniatigut meeqqat meeqqerivimmiittut isumassortuarsimavatit.

 

Qanorluunniit igaffimmi ulapitsigigaluaraangavit meeqqat tuppallersarneqarnissamik pakkunneqarnissamillu pisariaqartitsigaangata taamak iliornissamut piffissaqartuartarsimavutit, taamaalilluni meeqqat pillugit ikiuunnissat naatsorsuutigineqartuaannarsinnaavoq.

 

Aamma Kalaallit Nunaata kangiani silap ukiumi peqqarniitsorsuusarlunilu issittorsuusarfiani nuersaallutit pissaqanngitsunut nasaliuussisarnikkut aaqqasiuussisarnikkullu meeqqanut isumassuinerit takutittarpat.

 

Tamatuma ilaatigut takutippaa, naak uillarnerpit kingorna kisimiillutit meeqqanik sisamanik perorsaagaluarlutit qanoq meeqqanut tamanut asannitsigalutillu isumassuitiginerit.”

 

 

Siulittaasoqarfik sinnerlugu

 

Vivian Motzfeldt

Inatsisartut Siulittaasuat