Nutaarsiassat


2020 2019 2018 Flere år...

15-05-2020

Isiginnaagassiaq Inatsisartunit immikkut inuulluaqqussut

2020-ip upernaavani politikikkut ingerlatsineq coronap ajornartoortitsineranik sunnigaavoq nunatsinnilu tamarmi ulluinnarni nalinginnaasumik inuunerput allanngorluinnarluni.

 

Inatsisartullu nalinginnaasumik katersuunnissaminnut aamma mattunneqarput. Qinikkat amerlasuut Inatsisartuni sulinertik maqaasisimavaat, soorluttaaq innuttaasut amerlasuut innuttaasut qinigaannit tusagaqarnissartik maqaasisimagaat.

 

Innuttaasut qinigaat upernaakkut ataatsimiinnissamut sivikitsuaraasussamut maajimi katersuutissapput, tamatumanilu inersuarmi piffissaq atorneqartussaq killeqassalluni.

 

Inatsisartut 2020-mi apriilimi immikkut ittumik ataatsimiinneranni naalakkersuinikkut oqaaseqartartut inersuarmi oqaaseqaataat aallaavigalugit isiginnaagassiaq naatsoq, COVID19-eqarnerani ataatsimoorluta aqqusaakkavut sulilu atukkavut  pillugit Inatsisartunit innuttaasunut immikkut inuulluaqqussutitut suliarineqarpoq.

 

Sooq taama ilusilerlugu suliarineqarpa?

Piffissaq immikkut ittoq maanna atugarput isiginnaagassiami aallaavigineqarpoq aammalu tusagassiorfiit Inatsisartuni qinikkat sulinerannik ingerlaavartumik saqqummiuttagaannut tapertatut eqqarsaatigineqarluni. Qinikkat nunatsinnik soqutiginninnerat soorunami nutaarsiassaanngilaq, politikikkulli oqallinnermi ilaatigut puigorneqarsinnaasarluni. Taamaattumillu IIA20-mi partiit oqaaseqartartuisa oqaaseqaataat, coronap ajornartoortitsineranit atukkagut pillugit politikerit eqqarsaatersuutaannik ersersitsisut, isiginnaagassiami katersorneqarput.

 

Isiginnaagassiornerup suna siunertaraa?

Politikikkut sulinermi innuttaasut peqataallutillu malinnaanerat annertusiartortillugu isumaqarpugut innuttaasut politikerillu akornanni oqaloqatigiinneq pitsaanerulertartoq. Politikikkut sulineq pillugu paasissutissiilluni ingerlatitseqqinnermut peqataaneq aammalu nunatsinni tamat oqartussaaqataanerannik taassuminngalu aqutsinermik innuttaasut piginneqataatinnissaat Inatsisartut suliassaraat pingaarnerpaaq. Taamaalillunilu corona pillugu ajornartoornerup nalaani pisut aallaavigalugit politikerit sulinerannik innuttaasut annertunerusumik paasisaqarnissaannut periuserineqarsinnaasut ilaattut isiginnaagassiakkut inuulluaqqussut eqqarsaataavoq.

 

Isiginnaagassiaq kimit suliarineqarpa?

Isiginnaagassiaq Inatsisartut sulisuinit suliarineqarpoq. Coronamut tunngatillugu killilersuutit pissutigalugit Inatsisartut apriilimi immikkut ittumik ataatsimiinnerat tamanut matoqqavoq. Taamaattumillu immiussat amerlanersaat ataatsimiittarfimmi immiussissutineerput, tassa assiliisartumik Inatsisartut ataatsimiittarfimmiititsisinnaannginnerat pissutigalugu.

 

Isiginnaagassiami erinarsuut kimit suliarineqarpa?

Erinarsuut ”Eqqissineq” Heidinnguaq Jensenimit 17-inik ukiulimmit allanneqarsimavoq Uummannamilu Meeqqat Angerlarsimaffiannit akuerineqarluni atorneqarpoq. Heidinnguaq nammineq erinarsorlunilu nipilersorpoq. Nipilersornermik isiginnaagassiaq Kalaallit Nunaanni innuttaasunut Uummannami Meeqqat Angerlarsimaffiannit tunissutinngortinneqarpoq.

 

Isiginnaagassiap atorneqarnissaa

Isiginnaagassiaq 9:30 minutsinik sivisussuseqarpoq. Isiginnaagassiaq Inatsisartut nittartagaanni takuneqarsinnaavoq aammalu danskisut tuluttulluunniit allagartalersuuteqarnissaa toqqarneqarsinnaalluni. Taamatuttaaq isiginnaagassiaq tusagassiorfinnit allanit atorneqarsinnaavoq.

 

 

 

Filmi danskisut allagartalersugaq

 

 

 

 

 

Filmi tuluttut allagartalersugaq

 

 

 

 

 

 

 

Vivian Motzfeldt

 

Inatsisartut Siulittaasuat