Nutaarsiassat


2020 2019 2018 Flere år...

06-04-2020

Inatsisartut upernaakkut ataatsimiinnerata kinguartinneqarnissanik aalajangerneq allanngortinneqanngilaq

KNR-ip nittartagaani ulloq 2. april allaaserisami ima allassimasoqartoq Siulittaasoqarfiup assut tupigusuutigalugu paasivaa ”Inatsisartut upernaakkut ataatsimiissanngitsut.” Tamanna eqqunngilaq. Upernaakkut ataatsimiinneq taamaatinneqanngilaq, taamaallaalli kinguartinneqarallarpoq.

 

Taama oqarneq Inatsisartunut ilaasortat akornanni, Siulittaasoqarfimmi aammalu tusagassiorfinni pisariaqanngitsumik assut nalornisitsilersimammat Siulittaasoqarfimmit aallarniutigalugu oqaatigineqassaaq. Tamanna ajuusaarnarpoq.

 

Taamaattumillu aamma aallarniutigalugu naqissuserneqassaaq upernaakkut ataatsimiinnissaq taamaatinneqassanersoq taamaattoqassannginnersorluunniit Inatsisartut kisimik aalajangersinnaammassuk. Taamaattumillu upernaakkut ataatsimiinnissap pilersaarutaasup kinguartinneqarnera suli atuuppoq aammalu taamaatinneqarnani.

 

COVID19-imut tunngatillugu pissutsit qanorluunniit ineriartoraluarpata Inatsisartut inatsisartutigoortumik suliassaminnik isumaginninnissamut mattunneqartariaqanngillat.

 

Inatsisartut ataatsimiinnissaannik taamaatitsinissaq Inatsisartut kisimiillutik aalajangiiffigisinnaavaat.

Suleriaaseq malillugu upernaakkut ataatsimiinnermi Aningaasaqarnermut Ataatsimiititaliamik aammalu Kukkunersiuinermut Ataatsimiititaliamik Inatsisartut pilersitsissapput, soorluttaaq assersuutigalugu Naalagaaffiit Peqatigiit ataatsimeersuarnissannut aallartitassanik toqqaasoqartussaasoq. Taakku aammalu pissutsit allat amerlasuut ataatsimiinnermut tunngasut Inatsisartunit aamma isumagineqartariaqarput Inatsisartullu ataatsimiinnissaat taamaativinneqassagaluarpat Suleriaaseq pillugu Ataatsimiititaliamut saqqummiunneqartariaqarlutik. Taamaattumillu Inatsisartut ataatsimiinnissaat tusagassiortunik katersortitsinermi Naalakkersuisut Siulittaasuannit taamaatinneqarsinnaanngilaq.

 

Illoqarfiit pingaarnersaanni, COVID19 pillugu pissutsit immikkorluinnaq atuunnerat pissutigalugu, piffissami matumani ilungersunartorsiorfiusumi illoqarfiillu pingaarnersaanni innuttaasut kiffaanngissuseqarnerminni amerlasuutigut killilersuiffigineqarneranni aammalu pisortani atorfillit amerlasuut inuiaqatigiinnit suliakkiutigineqartunik pingaarutilinnik isumaginninneranni allallu angerlarlutik sulisariaqarfianni inatsisartutigoortumik sulinerup attatiinnarneqarnissaanut Inatsisartut assinganik piareersimanerminnik takutitsisariaqarput. Soorluttaaq pissaanerup pingasunut avinneqarsimaneranut ataqqinninnermik paasinninnermillu ersersitsinissaq pisariaqartoq.

 

Ataatsimoortumik anguniagaqarnissamik Naalakkersuisut innuttaasunut kaammattuutaat kingulliit COVID19 pillugu tusagassiortunik kingullermik katersortitsinermi oqaatigineqartut uku ataatsimoorluta malitsigit: “Eqqissisimaannassaagut, immitsinnut paarissaagut, oqartussat kaammattuutaat malissavavut”.