Nutaarsiassat


2020 2019 2018 Flere år...

19-02-2020

Aalisarnermut, Piniarnermut Nunalerinermullu Naalakkersuisoq tatigiunnaarparput

Aalisarnermut, Piniarnermut Nunalerinermullu Ataatsimiititaliami pisortatigoortumik suliniarnerput innarlerneqarpoq. Naalakkersuinikkut suliat annertuut arlallit ingerlanneqarput, ilaatigut inuiaqatigiinni aalisarneq tunngavigalugu inuuniarnikkut atukkat, aningaasarsiornikkut pissutsit aammalu ilaqutariit aalisartukkormiut piniartukkormiullu atukkamikkut aaqqiivigineqarnissaat pillugit sulineq tukalluinnartumik Naalakkersuisumit ingerlanneqarput.

 

Ataatsimiititaliap ernummatigaa Naalakkersuisup pineqartup aalisarnermut inatsisissaq pillugu suliamik ingerlatsinera matoqqasorujussuarmik ingerlanneqartoq, aamma inuiaqatigiinni aningaasarsiornikkut sulisartoqassutsikkullu sunniuteqarluinnartoq torersumik ilisimatitseqatigiiffiusumillu ingerlanneqanngitsoq mianernarsigaluttuinnartoq. Siunnerfeqarani sulineq, aningaasarsiornikkullu soqutigisallit salliutinnerullugit taakkualu kisiisa peqatiginiarsaralugit Naalakkersuisut sulinerat isertuussinerallu ataatsimiititaliap akuerisinnaanngilluinnarpaa? Naalakkersuisut politikkikkut ersarissumik aalisarneq pillugu siunnerfeqannginnerat inuiaqatigiinnut innarliisinnaammat naluneqanngilaq.

 

Naalakkersuisut aalisarnikkut aaqqissuusseqqinnissaq pillugu politikkikkut siunnerfiat ataatsimiititaliamiit ilisimaneqanngilaq. Suut tamarmik isertuussamik ingerlanneqarput, naak politikkikkut siunertat isertuunnagit peqataatitsilluni ingerlanneqarsinnaagaluartut tamanna ulloq manna tikillugu pisimanngilaq.  Naalakkersuinikkut kisermaasserpalaartumik ingerlatsisoqassanngilaq, peqataatitsisoqartariaqarpoq. Ataatsimiititaliaq ilisimatinneqarlunilu akuutinneqartariaqarpoq. Matumani pisumi tamanna pisimanngilaq kinguneqartitsisoqartariaqarporlu. Minnerunngitsumik Inatsisartut ataatsimiititaliaat Naalakkersuisuniit eqqortumik paasissutissinneqartarlutillu torersumik sullinneqartussaapput. Aalajangersakkat malinneqartussaapput aamma Naalakkersuisuniit.

 

Ataatsimiititaliap sulianik aalajangersimasunik Naalakkersuisup suliarisassamisut ingerlataanik nakkutilliiniarnerminut ajornartorsiutigaa Aalisarnermut, Piniarnermut Nunalerinermullu Naalakkersuisup isummaminik allannguisaqattaarnera. Naalakkersuinikkut suliat qaqugukkut naammassineqarnissaat aamma politikkikkut qanoq suliarineqarnissaat pillugit Naalakkersuisumit nassuiaatigineqartut allanngoqattaaginnavinnerat angusaqarniarnermut killiliisorujussuanngorput.

 

Suliassat aallartinneqalersaartut aallartinneqareersimasulluunniit pillugit Naalakkersuisup paasissutissiissutaanik ataatsimiititaliaq tigusaqaraangat sivitsunngitsoq Naalakkersuisoq isummaminik allannguisarpoq – eqqarsaatigillannguarnagu siusinnerusukkut ataatsimiititaliamut qanoq paasissutissiisimanini aammalu aalajangiisimaneq allanngortinneqarsimappat tamatuma kingorna ataatsimiititaliamut paasissutissiinnguarnani.

 

Inatsisartut naalakkersuinikkut sullinneqarnerat pitsaasuullunilu tutsuiginartuusariaqarpoq. Naalakkersuisumit ataatsimiititaliamut paasissutissiissutigineqartut ataatsimiititaliamit tutsuigineqarsinnaasariaqarput. Taamaanngippat suliassat annertuut pingaarutillillu suliarineqartariaqartut ataatsimiititaliamit sukumiisumik suliarineqarnissaat ajornarsissaaq – tamannalu ataatsimiititaliamut innuttaasunullu naapertuuttuliornerunngilaq. Taamaattumillu pissutsit nassuiaatigineqartut Naalakkersuisut Siulittaasuannit kinguneqartinneqarnissaat ataatsimiititaliamit kaammattuutigineqarpoq. Taamaattumillu Naalakkersuisut Siulittaasuata qisuariaateqartariaqarnera avaqqukkuminaappoq.

 

Demokraatit imaattumik ikinnerussuteqarlutik oqaaseqaateqassapput:

Demokraatini isumaqarpugut Aalisarneq pillugu Ataatsimiititaliarsuaq eqqissilluni sulinissaminut naggataatigullu aalisarnermut inatsisissatut siunnersuutissamut kaammattuuteqarnissaminut periarfissinneqartariaqartoq. Inatsisartut kaammattuutaajumaartunut isummernissaminnut naammattumik periarfissaqarumaarput, soorluttaaq amerlanerussuteqartunit taperserneqarumaartoq itigartinneqarluniluunniit.

Peqatigitillugu Naalakkersuisut tungaannit aalajangersimaqqissaartunik naalakkersuinikkut piumasaqaateqartoqarsimannginnera aalajangersimasunilluunniit Aalisarneq pillugu Ataatsimiititaliarsuarmit inerniliisoqarnissaanik kissaateqartoqarsimannginnera pitsaasuuvoq.

Naalakkersuisunik isummanik allannguisaqattaartitsineraalluni pisuutitsiniaanerit tunngavissaqanngitsut Demokraatinit isummerfigiumaneqanngillat.


Demokraatit suli Aalisarnermut, Piniarnermut Nunalerinermullu Naalakkersuisumik tatiginnipput.

 

 

 

Inatsisartut Aalisarnermut, Piniarnermut Nunalerinermullu Ataatsimiititaliaat sinnerlugu

 

Siulittaasoq

Henrik Fleischer