Nutaarsiassat


2020 2019 2018 Flere år...

23-01-2020

Aningaasaqarnermut Akileraartarnermullu Ataatsimiititaliap pinngitsoorani soraarnerussutisiaqalernissamut katersinissamut aaqqissuussineq pillugu tamanut ammasumik siunersiuinissaa

Aningaasaqarnermut Aatsitassanullu Naalakkersuisoq tamanut ammasumik siunersiorneqarnissamut Aningaasaqarnermut Akileraartarnermullu Ataatsimiititaliamit aggersarneqarpoq. Tamanut ammasumik siunersiuineq pinngitsoorani soraarnerussutisiaqalernissamut katersinissamut aaqqissuussinermut akilersuisitsinerup aqunneqarnerani Naalakkersuisut maannamut misilittagariligaannut tunngassuteqassaaq. Tamanut ammasumik siunersiuineq pissaaq ataasinngornermi ulloq 27. januar 2020, nal. 15.00.

 

Ataatsimiititaliap nammineerluni aalajangiineratigut siunersiuineq tamanut ammasumik imaluunniit matoqqasumik siunersiuinertut ingerlanneqarsinnaavoq. Manna tikillugu Inatsisartut ataatsimiititaliaasa siunersiuisarneri matoqqasumik, tassalu tamanit najuuffigineqarsinnaanngitsumik ingerlanneqartarsimapput. Ataasinngorpat siullerpaamik ataatsimiititaliamik tamanut ammasumik siunersiuisoqassaaq. Tamanut ammasumik siunersiuisoqartillugu kikkulluunniit siunersiuinermut malinnaanissamut periarfissaqarput. Inatsisartunili inissakilliorneq pissutigalugu siunersiuinermut inuit amerlanerpaamik 15-it najuussinnaapput. Tamatuma saniatigut inissat tallimat tusagassiortunut immikkut atugassiissutigineqarput. Inissat Inatsisartut Allattoqarfiannut inatsisartut@inatsisartut.gl-imut imaluunniit 34 61 25-mut saaffiginninnikkut inniminnerneqarsinnaapput, tamatumani siulliullutik saaffiginnittut inissanik pissarsisinnaallutik.

 

Siunersiuinermut najuussinnaassagaanni inissamik inniminneereernissaq pisariaqarpoq. Tusarnaariartut siunersiuinissaq kingusinnerpaamik minutsinik 15-inik sioqqullugu Inatsisartut saaffiginnittarfiannut apuutereersimassapput. Tassani allagartat saqqarmiut Inatsisartuniinnerup nalaani ersarissunngorlugit atorneqartussat tunniunneqassapput. Siunersiuineq kalaallisut danskisullu malinnaaffigineqarsinnaassaaq.

 

Ammasumik siunersiuineq Inatsisartut nittartagaanni ”Nutaarsiassat” ataani nalunaarutigineqassaaq. Tassani aamma siunersiuinerup qulequtaa siunersiuinissamullu apeqqutit piareerunik saqqummiunneqassapput.

 

Siunersiuinissamut tusarnaariat inissamik neqeroorfigineqarsimasut, siunersiuinerup ingerlanneqarnerata akornuserneqarnissaa pinaveersaarniarlugu malittarisassanik arlalinnik malitassaqarput. Taakku Inatsisartut nittartagaanni ”Ataatsimiititaliat/Tamanut ammasumik siunersiuinerit” ataani atuarneqarsinnaapput.

 

Tamanut ammasumik siunersiuinerit pillugit apeqqutinut tunngatillugu Inatsisartut Allattoqarfiat mailikkut ugguuna saaffigineqarsinnaavoq; inatsisartut@inatsisartut.gl.

 

 

Paasisaqarnerujumalluni Aningaasaqarnermut Akileraartarnermullu Ataatsimiititaliap Siulittaasua Hermann Berthelsen oqarasuaatikkut ugguuna; +299 52 75 56 saaffigineqarsinnaavoq.