Nutaarsiassat


2019 2018 2017 Flere år...

15-10-2019

Inatsisartut Aalisarnermut, Piniarnermut Nunalerinermullu Ataatsimiititaliaata matumuuna uppernarsarpaa ataatsimiititaliap Aalisarnermut, Piniarnermut Nunalerinermullu Naalakkersuisoq tallimanngornermi ulloq 11. oktober 2019-imi ataatsimeeqatigimmagu.

Immikkoortoq 132-p inuussutissalerinermut uumasunullu nakorsaqarnermut suliassaqarfiup tiguneqarsinnaaneranut tunngasup kinguartinneqarnissaa Inatsisartut Siulittaasoqarfiannut qinnutiginiarlugu Naalakkersuisut nalunaarutigaat.

 

Inatsisartut ataatsimiinneranni kingusinnerusumut kinguartitsinissaq ataatsimiititaliamit isumaqatigineqarpoq, taamaalilluni tamanut toqqissisimanartumik naammassillugu suliarineqarsinnaaqqullugu.

 

Ataatsimiititaliamit erseqqissaatigineqassaaq inuussutissarsiutinik ingerlataqartunut atugassarititat ajorseriaateqartinnissaat siunertarinnginnatsigu, taamaattumillu suliaq peqqissaartumik ingerlateqqissavarput. Taamaattumik Naalakkersuisumik ataatsimeeqateqarnitsinni siusinnerusukkut taaneqartumi naaperiaassutissatut siunnersuutinik arlalinnik saqqummiussaqarpugut. Ilaatigut suliassaqarfiup tiguneqarnissaani ukiup piffissaliunneqartup allanngortinnissaa allaalluunniimmi peerneqavinnissaa siunnersuutigaarput.

 

Ataatsimiititaliap immikkoortumik suliarinninnermini Naalakkersuisut Siulittaasuata ammaanersiorluni oqalugiaataa aallaavigaa, tassani Naalakkersuisut sinnerlugit naqissusermagu inuussutissalerinermut uumasunullu nakorsaqarnermut suliassaqarfiup tiguneqarnissaa aallartinneqassasoq. Taamaattumillu ataatsimiititaliap siunertarisaralugulu anguniagaraa siunnersuutip taaneqartup suliassaqarfimmik maanna Kalaallit Nunaata tigusinissaanik Naalakkersuisut Siulittaasuata oqaaserisaanut naapertuuttunngortinnissaa.

 

Aalisarnermut, Piniarnermut Nunalerinermullu Ataatsimiititaliap siulittaasua
Henrik Fleischer

 

Annertunerusumik paasisaqarumagaanni ataatsimiititaliap siulittaasua saaffigineqarsinnaavoq ugguuna mobil +299 52 72 82