Nutaarsiassat


2019 2018 2017 Flere år...

11-04-2019

Inatsisartunut inissiassanut aningaasanik nutaanik atuisoqassanngilaq

Inatsisartut inissiassaannik piffissami sivikitsumi attartugassanik akisuunik attartornissamik attartortitsisartunut namminersortunut Inatsisartut ullumikkut isumaqatigiissuteqartarput. Siunissami qanoq akeqarnissaat ilisimaneqanngitsunik Inatsisartut ataatsimiinneranni ilaasortanut inissiassanik namminersortunit attartornissamut pituttugaajunnaarnissaq Inatsisartunit kissaatigineqarpoq. Soorluttaaq pisariaqarnera naapertorlugu akuttussusilimmik sivisussusissaatullu pisariaqartutut nalilerneqartumi ataatsimiigiaqqusinissamut eqaassuseqarnissaq kiffaanngissuseqarnissarlu Inatsisartunit kissaatigineqartoq.

 

Taamaattumillu inissianik attartortitsisartuni namminersortuni akigitinneqartunut nikerartunut taarsiullugu ukiuni amerlasuuni ilisimaneqartunik ineqarnermut akiliuteqarfiusussanik inissianik akikinnerusunik pisortanillu pigineqartunik qulakkeerinninnissaq Inatsisartunit kissaatigineqarpoq.

 

Inatsisartunut ilaasortat siunissami inissiassaannik, ilisimaneqartumik siunissamullu qulakkeerussamik ineqarnermut akiliuteqarfigineqartussamik, sivisuumik attartornissamut Inatsisartut Illuummut isumaqatigiissuteqarnissaat Suleraaseq pillugu Ataatsimiititaliami amerlanerussuteqartut ulloq 29. marts ataatsimiinnermi akuersissutigaat.

 

Attartornissamut Illuummik isumaqatigiissuteqarnikkut Inatsisartut aningaasanik nutaanik akiliuteqassanngillat akiliuteqanngitsoorsinnaanatilluunniit, Inatsisartummi attartortitsisartut namminersortut inissiaataannik attartornermut aningaasanik amerlasuunik atuisareermata. Pisortat inissiaataannik attartortittakkanik akikitsunik atorneqanngitsunillu peqanngimmat Inatsisartut inissianik attartortitsisartunit namminersortunit attartortariaqartarput.

 

Ilanngussat

 

Inatsisartut ullumikkut inissianik sanaartornatillu pigisaqanngillat aammalu attartornissamik Illuummut nutaamik isumaqatigiissuteqarnissami inissianik sanaartortoqalernavianngilaq pigisaqartoqalernaviaranilu.

 

 

Siulittaasoqarfik sinnerlugu

 

Vivian Motzfeldt

Inatsisartut Siulittaasuat