Nutaarsiassat


2019 2018 2017 Flere år...

28-03-2019

Ullumi Inatsisartut ataatsimiinneranni nal. 12.40-mit nal. 13.10-mut unillatsiarneq pillugu erseqqissaaneq

Ullumi Inatsisartut ataatsimiittarfianni immikkoortoq 28-p Inatsisartunit oqaluuserineqarnerani unikkallarnissaq pisariaqalersimavoq.

 

Tassunga atatillugu ataatsimiinnermik aqutsisup paasissutissiissutigaa akunnerup affaani unikkallartoqassasoq, tamatumalu kingorna isiginnaarummi unikkallarnermut assiliartaliunneqartartoq saqqummersillugu atortut matuneqarallarput.

 

Atortulli ajoquteqarsimagunarmata unikkallarnermut assiliartaq isiginnaarutikkut saqqummernani matoqqasumik ataatsimiinnermut assiliartaliunneqartartoq saqqummerpoq. Tamanna soorunami isiginnaartunut apeqqutissaqalersitsisimassaaq.

 

Atortulli nammineerluni matoqqasumik ataatsimiinnermi assiliartaliunneqartartoq unikkallarnermi assiliartaliunneqartartumut nuuppaa.

 

Atortutigut ajutoorneq taanna ajuusaarnarpoq aammalu immikkoortoq pillugu matoqqasumik ataatsimiittoqarneranik internetikkut attaveqatigiittarfikkut saqqummiussineq ajuusaarnarluni. Tamannami eqqunngilaq.

 

Inatsisartulli ataatsimiittarfianni unikkallartoqarnissaata paasissutissiissutigineqarata kinguninngua partiini aammalu siulittaasoqarfimmi ataatsimiittoqarpoq.

 

Tamannalu ilaasortanit ataatsimiittarfimmiittunit aamma uppernarsarneqarsinnaavoq aammalumi ilaasortat peqataaffiginngisaannik ataatsimiittarfimmi matoqqasumik soorunami ataatsimiittoqarsinnaanngilaq.

 

Taamaalillunilu isiginnaarutikkut allassimaneratut Inatsisartut ataatsimiittarfianni matoqqasumik ataatsimiittoqanngilaq, atortutigullu ajutoorneq taanna paasiniarlugu maanna misissuisoqarpoq.

 

Kiisalu immikkoortoq 28-p oqaluuserineqarnera Inatsisartut nittartagaanni www.ina.gl-imi isiginnaarneqarsinnaavoq.

 

Siulittaasoqarfik sinnerlugu

 

Vivian Motzfeldt

Inatsisartut Siulittaasuat