Nutaarsiassat


2019 2018 2017 Flere år...

04-02-2019

Inatsisinut Ataatsimiititaliaq paasisassarsiorluni angalasoq

Inatsisinut Ataatsimiititaliap sapaatip akunnerani matumani Folketingip Retsudvalgianik, Saqitsaattoqarnerani isumaqatigiissaarisartunik Inuillu Pisinnaatitaaffii pillugit Ilisimatusarfimmik naapitsinerani kiisalu Herstedvesterimi paarnaarussivimmut Århusimilu Riskovimi tarnikkut nappaatilinnut immikkoortortamut pulaarnerani inissinneqarsimasut tigummisaasullu atugaat, saqitsaattoqarnerani isumaqatigiissaarisartoqarneq kiisalu inunnik aalajanersimasunik nikassaasarneq (hatecrime) qulequtarineqarput. 

 

Herstedvesterimiinnermini Nuummi inissiisarfissap ammmarneqarneranut atatillugu inissinneqarsimasut nuunneqarnissaat ataatsimiititaliap erseqqinnerusumik misissuiffigiumavaa. Killiligaanngitsumik inissinneqarnissamut pineqaatissinneqarsimasut Nuummi pineqaatissiissumminnik atuinissamik toqqaasut Nuummiinnerminnik toqqissisimanerinninngitsut kingusinnerusukkut Herstedvesterimut uteqqinnissamik toqqaasinnaanerat pillugu inatsisissatut siunnersuut Inatsisartut 2017-imi ukiaanerani ataatsimiinnerminni akuersissutigaat. Ataatsimiititaliap Herstedvesterimut pulaarnermi saniatigut Risksovimi inissinneqarsimasut atugaat paasisassarsiorfigiumavai tarnikkullu nappaatilinnut immikkoortortap Skejbymi napparsimavissuarmut nuunneqarneranut tunngaviusut erseqqinnerusumik tusagaqarfigiumallugit.

 

Danskit Saqitsaattoqarnerani Isumaqatigiissaarisartuinik naapitsinermini, Kalaallit Nunaanni saqitsaattoqarnerani isumaqatigiissaarisartoqarnikkut misiliuteqarsinnaaneq siunertaralugu danskit misilittagaannik ataatsimiititaliaq pissarsiniassaaq, tamannami eqqartuussisarnermik inatsisikkut atuuttukkut periarfissiissutaavoq. Saqitsaattoqarnerani isumaqatigiissaarisitsineq tassaavoq pillaatissiissutaasinnaasumik pinerluuttoqarsimatillugu isumaqatigiissaarisartup arlaannaannilluunniit illersuinngitsup najuunnerani pillaatissiissutaasinnaasumik pinerlussimaneq pillugu oqallisiginninnissamut pinerlineqarsimasup pinerliisullu imminnut naapisinneqarsinnaanerat. Taamaalilluni pinerlineqartup pinerluutip nassataanik kamamminik ilerasuuteqarnerminillu iliuuseqarfiginnissinnaaneranut Saqitsaattoqarnerani Isumaqatigiissaarisartoq ikiorsiisinnaavoq.

 

Inatsisinut Ataatsimiititaliaq kingusinnerusukkut, inuusuttut 15-it 18-illu akornannik ukiullit kinguaassiuutitigut atornerlunneqarsinnaanermut pitsaanerusumik illersorneqarsinnaanerat pillugu Folketingip inatsisinut ataatsimiititaliaanik ataatsimeeqateqassaaq, pinerluuteqarsimasunik nalunaarsuisarnermut nalunaarummi meeqqanik pinerliisimannginnermut uppernarsaatit pillugit aaqqissuussinermik taaneqartup annertusarneqarnissaa tamatumunnga piumasaqaataavoq – suliassaqarfik danskit naalagaaffianni oqartussaasunit tigummineqartoq.

 

Tamakku saniatigut ataatsimiititaliaq inuit pisinnaatitaaffiinut ilisimatusarfimmut pulaassaaq, tassani inunnik aalajanersimasunik nikassaataasumik pinerluuteqartarneq pillugu ilisimatusarfiup suliaqarnera annerusumik tusagaqarfigiumallugu.

 

Angalaarneq katillugu ullunik pingasunik sivisussuseqassaaq innuttaasullu kalaallit pinerluttulerinermi inatsisitigut maannakkut nalaattagaannik paasisaqarnissamik qulakkerissalluni.  

 

 

Sofia Geisler

Siulittaasup tullia, ataatsimiititaliap angalanerani Siulittaasuugallartoq

 

Ataatsimiititaliaq pillugu uani paasisaqarnerugit: https://ina.gl/udvalg/lovpligtige-og-staaende-udvalg/lovudvalg/