Nutaarsiassat


2019 2018 2017 Flere år...

16-01-2019

Nunanut Allanut Sillimaniarnermullu Ataatsimiititaliaq issittumi sillimaniarnermut politikkimi pissutsit pillugit Westminsterimi nunat assigiinngitsut ataatsimiinneranni peqataassaaq

Politikerit qaffasissumik inissisimasut, atorfillit aamma ilisimatuut ilaatigut USA-mit, Tuluit Nuaannit, Canadamit aamma Kalaallit Nunaannit ataatsimiissapput Londonimi issittumi niuernikkut sillimaniarnikkullu pissutsit maannakkut atuuttut oqaluuseralugit. Katillugit nunat 15-it peqataatitaqassapput.

 

Ulluni 17.-18. januar 2019 ataatsimiinneq ”Arctic Encounter Symposium” Londonimi ingerlanneqassaaq. Pisoq silittumik katitigaavoq issittoq pillugu oqaloqatigiiffiulluni nunat tamat isumasioqatigiiffiannit isumassarsiaalluni.

 

Politikerinik ilaatitaqarnikkut, atorfillit, sakkutooqarnikkut aamma ilisimatusartut aqqutigalugit, ilaatigut sammineqassapput umiarsuit angallannerat, silaannakkut angallanneq aamma sakkutooqarnikkut suleqatigiinneq – pineqartut tamarmik, Kalaallit Nunaannut annertuumik pingaaruteqarput. Pisussaq ingerlanneqassaaq ilaatigut oqaluttuassartalimmi ”The Reform Club-imi” Westminsterimi Londonip qeqqani Tuluit Nunaanni naalakkersuinerup qiterpiaani inissisimasumi.

 

Sillimaniarnikkut naalakkersuinerup ineriartornerata malinnaaviginissaa Nunanut Allanut  Sillimaniarnermullu Ataatsimiititaliap suliassaasa pingaarnerit ilagaat. Tamanna pillugu Nunanut Allanut  Sillimaniarnermullu Ataatsimiititaliaq peqataassaaq ataatsimiititaliap siulittaasuata Aleqa Hammondip aammalu siulittaasup tulliata Peter Olsenip peqataanerisigut. Ataatsimiititaliap siulittaasua Aleqa Hammond oqalugiartussatut pingaarnertut qaaqquneqarsimavoq.

 

Aleqa Hammond

Nunanut Allanut  Sillimaniarnermullu Ataatsimiititaliap siulittaasua

 

 

Paasissutissanik annerusunik piniaraanni ataatsimiititaliap siulittaasua attavigineqarsinnaavoq mobil +299 49 23 09.

 

Nunanut Allanut  Sillimaniarnermullu Ataatsimiititaliaq pillugu annerusumik paasisaqarsinnaavutit ugguuna: https://ina.gl/udvalg/lovpligtige-og-staaende-udvalg/udenrigs-og-sikkerhedspolitisk-udvalg/?lang=kl

 

Arctic Encounter Symposium pillugu annerusumik uani atuagaqarsinnaavutit: https://www.arcticencounter.com/arctic-encounter-london