Nutaarsiassat


2018 2017 2016 Flere år...

17-11-2018

HIV-mik tunillaassuunneq annikillisarneqartariaqarpoq kinguaassiuutitigullu nappaatinut akiuiniarnermi suliniutit Nukittorsarneqassapput siunnerfilerneqarlutillu

Nunatsinni inuit tallimat HIV-mik tunillanneqarsimanerisa paasineqarnerat Inatsisartut Ilaqutariinnermut Peqqissutsimullu Ataatsimiititaliamit ilungersunartutut isumaqarfigineqarpoq. Matumani pineqarpoq HIV-mik tunillatsissimasut nutaat, taakkulu inuusungaatsiarlutik 20-iniit 40-nut ukioqartut, tamarmik Qeqqata Kommunianut attuumassuteqasorinarlutik.

 

Nunatsinni Nakorsaanerata tusagassiuutitigut kalerrisaarilluni nalunaaruteqareersimanera ataatsimiititaliamit naammagisimaarlugu maluginiarneqarpoq. Ajoraluartumilli peqatigisaanik maluginiarneqarpoq kinguaassiuutitigut nappaassuup syfilisip ukioq manna aamma annertuumik qaffakkiartormat.

 

Naak ullutsinni isumannaatsumik atoqatigiittoqarsinnaagaluartoq innuttaasunillu usuup puui akeqanngitsumik pissarsiarineqarsinnaagaluartut ataatsimut isigalugu ernumanartoqarpoq.

 

Ilungersunartorsiornerup nalaani Qeqqata Kommuniani nammineq piumassuseq aallaavigalugu HIV isumannaatsumik atoqatigiittarneq pillugit aamma innuttaasunik paasisitsiniaanermik immikkut suliniuteqarsimanera ataatsimiititaliamit ilanngullugu naammagisimaarluarneqarpoq.

 

Suliani taamatut ilungersunartigisuni oqartussat suleqatigiinnerata annertusineqarnissaa ataatsimiititaliamit kaammattuutigineqarpoq, taamaaliornikkut peqqinnissaqarfiup kommunillu ataatsimut suliniutit annertusarneqarsinnaaqqullugit ataqatigiissaarneqarsinnaaqqullugillu.

 

 

Laura Táunâjik

Ilaqutariinnermut Peqqissutsimullu Ataatsimiititaliap siulittaasua

 

Paasissutissat annertunerusut ataatsimiititaliap siulittaasua mobil +299 28 51 71-imut attavigalugu pissarsiarineqarsinnaapput.