Nutaarsiassat


2018 2017 2016 Flere år...

05-11-2018

Qimmit qimuttut qimminik allanik akuneqarsimasinnaanerannik pasitsaassineq pillugu Naalakkersuisoq apeqqummut tassunga akuleruttariaqarpoq

Aalisarnermut, Piniarnermut Nunalerinermullu Ataatsimiititaliap kalaallit qimmiisa qimminik allanik akuneqarsimasinnaanerannik pasitsaassineq ilungersunartutut isigaat. Aalisarnermut, Piniarnermut Nunalerinermullu Ataatsimiititaliap Aalisarnermut, Piniarnermut Nunalerinermullu Naalakkersuisoq Nikkulaat Jeremiassen isumaqatigaat, pisoq qimuttup oqarmat sananeqaatimigut taannaajuaannarnissaa pillugu, siunissaq eqqarsaatigalugu aarlerinartorsiortoq attanneqarsinnaananilu.

 

Nalinginnaasumik ilisimaneqarpoq, qimmit allat qimminik qimuttoqarfiusunut eqquteqqusaannginnerat, sulinermut atatillugu qimmit atorneqartut kiisalu innarluutillit qimmit ikiortigisaat eqqarsaatigissanngikaanni, tamakkulu immikkut ittumik piumasaqaatitaqarput Namminersorlutik Oqartussat akuerseqqaartussaammata. Taamaakkaluartoq pisoq imaalerpoq, tassunga tunngasut qimmeqarfinni marluusunut tunngassuteqalermata, Qeqertarsuarmit, Kangerlummiit, Sisimiuniit, Itillimiit, Sarfanguaniit Kangerlussuarmiillu qimmit qimuttut Avannaata Qimussersuanut killiligaanngitsumik ilaaqqusaajunnaarmata.

 

Taamaammat Aalisarnermut, Piniarnermut Nunalerinermullu Naalakkersuisoq Ataatsimiititaliap ilungersorluni piaartumik pisup qulaajarneqarnissaanik kaammattussavaa, kiisalu kommunit, qimussertartullu kattuffiat KNQK, pisimasoq pillugu kiisalu qaqugu ersarinnerusunik paasiaqarfigineqarumaarnera naatsorsuutigineqarsinnaanersoq pillugu paasissutisseeqqullugu. Kiisalu Naalakkersuisut suliaq kinguarsassanngikkaat, piaartumik aaqqiissutissamik suliaqarnissaat  ataatsimiititaliap inassutigaa.

 

 

Henrik Fleischer

 

Aalisarnermut, Piniarnermut Nunalerinermullu Ataatsimiititaliaq

 

Annertunerusumik paasissutissanik pissarsiniartoqarsinnaavoq ataatsimiititaliami siulittaasup attavigineqarneratigut +299 52 72 82