Nutaarsiassat


2019 2018 2017 Flere år...

05-12-2017

Meeqqanut atugassarititaasut pillugit pitsanngoriaataasussanik Inatsisartut aalajangiineri

Inatsisartut Siulittaasorigallagaannit Mimi Karlsenimit allaaserisaq

 

Inatsisartut ukiuni kingullerni amerlasuuni meeqqanut atugassarititaasunik meeqqallu pisinnaatitaaffii pillugit pingaartitsisimaqaat. 

 

Ulloq 20. november Inatsisartut ukiaanerani ataatsimiinneranni ullut ataatsimiiffiusut kingullersaraat ullorlu taanna Naalagaaffiit Peqatigiinnit nunat tamat akornanni meeqqanut ulloritinneqarluni. Soorluttaaq ukioq 2017 Naalakkersuisut Siulittaasuannit meeqqat ukiuattut suaarutigineqarsimasoq. 

 

Taamaalillutik Inatsisartut 2017-imi aalajangigaanni amerlasuuni meeqqanut atugassarititaasut pingaartinneqarsimaqaat qitiutinneqarsimallutillu.

 

Inatsisartunittaaq oqaluuserisassat qulequtaasa takutippaat, siunnersuutit meeqqanut atugassarititaasut pitsanngorsarneqarnissaannik siunertaqartut amerlasimasut. Ilamininnguinik oqaatigisaqassaguma takuneqarsinnaassaaq:

 

  • Meeqqat tapersersorneqarnissaannut inatsimmik nutaamik sivisuumik ujartorneqarsimasumik Inatsisartut akuersissuteqarput.

 

Meeqqat inuusuttullu Kalaallit Nunaanni peroriartortut tamarmik Naalagaaffiit Peqatigiit Meeqqat pillugit Isumaqatigiissutaat naapertorlugu pitsaasumik toqqissisimasumillu peroriartornissamut toqqammavissinneqarnissaannik naalakkersuinikkut anguniakkanik tapersiinissaq meeqqat tapersersorneqarnissaannut Inatsisartut inatsisaannik siunertaavoq. Inatsit pingaarnertut meeqqanut isumaginninnikkut sumiginnagaasunut meeqqanullu taperserneqarnissamik illersorneqarnissamillu immikkut pisariaqartitsisunut sammitinneqarpoq, kisiannili erseqqissaatigissallugu pingaaruteqarpoq inatsit meeqqanut tamanut atuuttuummat.

 

Meeqqat inuusuttullu tamarmik pisinnaatitaaffiisa maleruarneqarnissaannik qulakkeerinissamik, taamatullu taperserneqarnissaannik illersorneqarnissaannillu nunatsinni kommuninut erseqqilluinnartumik inatsit akisussaaffiliivoq. Kommunit pisussaaffimminnik naammassinnissinnaanerisa qulakkeerneqarnissaanut kommunit inatsit malillugu arlalinnik atugassinneqarput.

 

Inatsit ulloq 1. juli 2017-imi atortuulersinneqarpoq, inatsisillu atuutsilerneqarnissaa maleruarneqarnissaalu, taamaalillunilu Inatsisartut naalakkersuinikkut siunniussaat anguniarlugit Naalakkersuisuni kommuninilu sullittoqaleruttorpoq. Inatsisit nutaat atuutsilerneqarnissaannut piffissamik atuisariaqartarneq eqqaamaneqassaaq, Inatsisartulli inatsisip akuersissutigineqarnissaanik piummassuseqarnerat, meeqqat inuusuttullu atugaasa nukittorsarneqarnerisa pisariaqarneranik kiisalu meeqqat inuusuttullu atugaasa naalakkersuinikkut annertuumik isumakuluutigineqarnerinut isiginiarneqarnerinullu takussutissiisutut nalilerneqassaaq.

 

  • Meeqqat inuusuttullu 18-it inorlugit ukiullit hashimik atuisut immikkut katsorsarneqarnissamut neqeroorfigineqarnissaannut pilersaarummik Naalakkersuisut 2018-imi suliaqassasut Inatsisartunit aalajangiunneqarpoq.

 

Hashi akiorniarlugu nuna tamakkerlugu iliuusissatut pilersaarummut 2016-imi Inatsisartut Naalakkersuisunut saqqummiuteqqullugu pisussaaffiliissutaannut atasutut siunnersuut isigineqassaaq.

 

  • Ineqarnermut tapiissutit meeqqanullu tapiissutit annertussusilerneqartarnerannut toqqammavissaq nutaaq inatsisartunit taperserneqarpoq.

 

Iluarsartuusseqqinneq ilaqutariit meerartallit isertitakitsut akunnattumillu isertitallit aningaasaqarnikkut inissisimanerannik ataatsimut iluaqusiisussaassaaq. Aammattaaq qulakkeerneqarpoq meeqqanut tapit siunissami akit qaffakkiartornerannut malinnaatinneqarnissaat, taamaalilluni meeqqanut tapit pisissutaasinnaanerat qarajarneqarani.

 

  • 1. januar 2018-imi atuutilersumik angajoqqaarsiat paaqqinninnermut aningaasarsiarisaasa akit aningaasarsiallu qaffakkiartornerannut naleqqussarneqarnissaat ujartorneqarsimasoq Inatsisartut qularnaarpaat. Ilaqutariit angajoqqaarsiaasartut pillugit ataatsimut periusissiamik suliaqarneq 2017-imi aallartinneqarpoq 2019-imilu naammassineqarnissaa ilimagineqarluni.

 

Ilaqutariit angajoqqaarsiaasartut meeqqanik paarsaqalersinnaanermut pitsaanerusumik atugassaqartinneqarnissaat pingaarnertut anguniagaavoq. Ilaqutariit angajoqqaarsiaasartut piginnaasatigut qaffassaavigineqassapput, soorluttaaq aningaasarsiaritinneqartut meerarsiaasut pisariaqartitaannut ajornartorsiutaannullu tulluarsarnerullugit naleqqussarneqarnissaat isumaasoq.

 

Nerisassarsiutissat, atisassarsiutissat, kaasarfimmiussallu 1. januar 2018-imiit iluarsiivigineqarnissaat 2018-imut Aningaasanut Inatsisissap suliarineqarnerani qulakkeerneqarpoq, taamaalilluni taakku ullutsinnut tulluarsagaanerusunngortillugit.

 

  • Inatsisartut 2017-imi imigassaq pillugu inatsisissatut siunnersuut akuersissutigaat, taannalu 1. marts 2018-imi atortuulissaaq.

 

Imigassaq pillugu inatsit meeqqat inuusuttullu siunissami imigassamik atornerluisunngornissaannik pinaveersaartitsinermut ilapittuutaassaaq. Imigassap tamanit orninneqartartuni pissarsiarineqarsinnaanera takuneqarsinnaaneralu inatsisikkut killilerniarneqarpoq. Imigassanik aalakoornartortalinnik nittarsaassisarneq inerteqqutaalerpoq (ussassaarinermut inerteqqut) kiisalu imigassat aalakoornartortallit pisiniarfimmi nioqqutissanit allanit assiaqutserneqarnissaannik piumasaqaat attatiinnarneqarpoq. 

 

Inatsit nuna tamakkerlugu kommuninilu iliuuseqarnernik paasisitsiniaanernillu, aalakoorniarluni killeqanngitsumik imertarnermik imigassamillu aalakoornartortalimmik torinngitsumik atuisarnermik akiuiniarnermi inatsimmut tapiutaasunik malitseqartinneqassaaq. Inatsit imaaliallaannarluni sunik tamanik iluarsiisussatut nalilerneqarani innutaasulli imigassamik aalakoornartortalimmik atornerluinnginnissaat killeqanngitsumillu atuinnginnissaat anguniarlugu siumut isigisumik periusissamut ilaasutut nalilerneqassaaq. Siunnersuut meeqqat siunissami toqqissisimallutik ilaqutariittullu pitsaasunik sinaakkuteqarlutik peroriartortarnissaat anguniarlugu sulissuteqarnissamik siunertalik.

 

  • Meeqqat atuarfiat pillugu inatsimmut allannguutissaq Inatsisartunit akuersissutigineqarpoq, taamaalilluni atuartut angerlarsimaffiini perorsaanikkut sinaakkutiliussanik minnerpaaffiliussassanik maannakkut sulissuteqartoqarsinnaanngorluni. Tamanna pingaartumik meeqqanut nunaqarfimmiunut illoqarfinni atuarfinnut nuutsinneqartunut atuuppoq.  

 

Kiisalu

 

  • Tamataqanngitsunik assilisat internettikkut attaveqaatitigut avitseqatigiissutigisarnerisa ulorianaataasa meeqqat atuarfianni ilinniartitsissutigisalernissaat Inatsisartut akuersissutigaat.

 

Aalajangiussanit tigulaakkat taakku meeqqat atugaat pitsanngorsaaviginiarlugit iliuutsit sunniuteqartussat pingaarutillit isiginiarneqarnissaannik Inatsisartut kissaateqarnerannik ersersitsisuupput.

Inatsisartut taamaalillutik suleqataasut suliffeqarfiillu inatsisinik aqutsisussat meeqqanut iluaqutaasumik pitsaanerpaanik atugassinneqarnissaat qulakkeerniarsimavaat.

 

 

Ikinngutinnersumik inuulluaqqusillunga

Mimi Karlsen