Nutaarsiassat


2019 2018 2017 Flere år...

22-11-2017

Isumaginninnikkut sumiginnaanermut atornerluinermullu akiuiniarneq pillugit iliuusissat suli amerlanerusariaqarput

Inatsisartut 2017-imi ukiaanerani ataatsimiinnerisa naammassinerani imigassaq pillugu inatsit nutaaq, 1. marts 2018-imi atortuulersussaq akuersissutigineqarpoq. Inatsit namminerminik angajoqqaat imigassamik atornerluineri silatusaanngitsumillu atuineri pillugit meeqqat inuusuttullu ajornartorsiutaannik iluarsiisinnaanngilaq. Siullertulliuna sumiiffimmi inuiaqatigiit atornerluinermik akiuiniarlutik suleqatigiinnerisigut atornerluisut atueriaatsiminnik allannguinissaat anguniarneqartariaqartoq.

 

Imigassamut inatsisip ataatsimiititaliamit suliarineqarnerani ilusilerneqarnera ataatsimiititaliami isumaqatigiinngissutigineqarpoq, taamaattorli imigassaq pillugu naalakkersuinikkut ingerlatsineq ataatsimiititaliamit qanimut malinnaaffigineqassaaq, ingerlatsinermi qanoq annertutigisumik naleqqussaanerit iliuusissallu allat pisariaqarnersut nalilersorniarlugu.

 

Imigassamik atornerluineq, minnerunngitsumillu hashimik atornerluineq nunami maani meeqqanik inuusuttunillu isumaginninnikkut sumiginnaanernut annertuunut toqqaannartumik pissutaavoq, atornerluinerlu meeqqat inuusuttullu amerlavallaartut ilaqutariinnikkut toqqissisimasumik, qanilaassuseqartumik makittarissumillu peroriartortannginnerannik nassataqartarpoq.  

 

Ilaqutariinnermut Peqqissutsimullu Ataatsimiititaliaq isumakuluutigilluinnakkaminik suli nalunaarusianik, misissuinernik paasissutissiinernillu tigusaqartarpoq, tamarmik nunami sumi tamani atornerluinermik ajornartorsiutinik isumaginninnikkut sumiginnaanernik kanngutsaatsuliorfiginninnernillu malitseqartartunik takutitsisunik.

 

Isumaginninnikkut sumiginnaanerit, tassani aamma kinguaassiuutitigut allatullu kanngutsaatsuliorfiginninnerit artornartunik kingusissukkut saqqummersartunik kingunerlutsitsisarput, nalaataqartumut, ilaqutaannut inuiaqatigiinnullu sivisuumik sunniuteqarumaartunik.

 

Iliuuserineqartut tamarmiullutik qanoq naammatsiginerannik pissusissamisoortiginerannillu paasinninnissaq ilisimasaqalernissarlu ataatsimiititaliamit pingaartinneqarpoq. Pisortat ataatsimoorussillutik Innuttaasunik atornerluinermit aniguiniartunik tapersiisinnaanerat kanngutsaatsuliorfigineqarnermillu kingunerluutit pillugit pisarialik naapertorlugu katsorsaasinnaanerat aalajangiisuusumik pingaaruteqarpoq.

 

Ataatsimiititaliap isumaa malillugu pinaveersaartitsinerit siunissamullu ungasissumut isigisumik iliuuserineqartut attanneqartariaqarput pisarialillu naapertorlugu suli siunertamut naleqqussarneqartuartariaqarlutik.

 

Ataatsimiititaliaq suliassaqarfik inunnik isumaginninnermut tunngassutilik pillugu Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisumik, suliassaqarfimmi inunnik isumaginninnermut tunngassutilimmi ajornartorsiutit pillugit kommuninik toqqaannartumik oqaloqateqartartumik toqqaannartumillu suleqatiginnittumik, taamaalillunilu kommunini nukissaqarniarnikkut pisariaqartinneqartut pillugit ilisimasaqarluartumik ingerlaavartumik oqaloqateqartarpoq.

 

Oqaatigineqassaaq aamma ataatsimiititaliaq inatsisiliortut aallartitaattut kommuninik, peqatigiiffinnik, kattuffinnik, innuttaasunik suliassaqarfimmilu inunnik isumaginninnermut tunngasumi puissutsit pitsanngorsaaviginiarlugit suleqataasunik allanik toqqaannartumik oqaloqateqarnissaminut piareersimajuaannarmat.

 

Pissutsit pitsaanerulernissaat anguniarlugu ilisimasaqarneq, ammasuuneq, oqaloqatigiinneq suleqatigiinnerlu tamarmik tamanit pisariaqartinneqarput. Taamaammat ataatsimiititaliap pisarialik naapertorlugu nuna tamakkerlugu toqqaannartumik attaveqarsinnaanera aamma pisariaqarpoq. Ataatsimiititalialli toqqaannartumik oqaloqateqarniarluni qanoq annertutigisumik nunamut tamarmut angalasinnaaneranut piffissaqarniarneq nukissallu killiliisuupput. 

 

Ataatsimiititaliaq kingullertigut Qeqqata Kommuniani nunaqarfimmut Atammimmut tikeraarpoq, tassani sumiiffimmi inunnik isumaginninnikkut peqqissutsikkullu ajornartorsiutaasut, ilaatigut atornerluisoqarneranik ajornartorsiutit taakkulu qanoq iliuuseqarfiginiarneqarneri kiisalu pisortanik suleqateqarneq qanoq ingerlanersoq erseqqinnerusumik tusagaqarfigiumallugit.

Ataatsimiititaliap Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisumik, sumiiffimmi ajornartorsiutaasut pillugit misilittakkat aallaavigalugit iliuuserineqartut pillugit nassuiaateqartumik ataatsimeeqateqarnermigut tikeraarneq taanna kingulleq kinguneqartippaa. Siunertaqartumik oqaloqatigiinnerit, ilisimasanik avitseqatigiinnerit kiisalu iliuuseqarnissaq siunertaralugu ataatsimeeqateqarnerit taamaattut ataatsimiititaliamit iluarineqarput.

 

Namminersorlutik Oqartussat atornerluisarnermut kanngutsaatsuliortarnermullu tunngatillugu neqeroorutaannik iliuusaannillu eqqumaffiginneqqullugit kommunit innuttaasullu kaammattorneqarput, pisariaqartinneqartunullu tulluarsaanissaq siunertaralugu iliuuserineqarsinnaasunik saqqummiussinissaminnik tunuarsimaarusseqquneqaratik.

 

Soorlu ataatsimiititaliamit siusinnerusukkut oqaatigineqartoq innuttaasunut najukkamilu oqartussaasunut tamanut kaammattuutigineqarpoq taakku erseqqissaateqarnerminnik, ammasuunerminnik, oqaloqateqarnerminnik kiisalu sumiiffimmi nukissat unammilligassanut ajornartorsiutinillu iliuuseqarfiginninnissamut naammanngippata Namminersorlutik Oqartussanit iliuuseqartoqarnissaanik piumasaqaatiminnik attassiinnassasut.

 

Ataatsimiititaliap naggasiutigalugu kommunini sullissisunut, najukkami naalakkersuinermik sulialinnut innuttaasunullu, meeqqanik inuusuttunillu sumiginnaanermik akiuiniarlutik annertuumik suliaqartunut qujassuteqarumavoq, taakku angajoqqaat allallu perorsaasussaatitaasut angajoqqaatut pisussaaffimmik naammassinninnissamut paaqqutarinninnissamillu piginnaanngorsaqqinniarlugit tapersersuiniarsarinerannut.

 

Ilaqutariinnermut Peqqissutsimullu Ataatsimiititaliaq maannangaaq Inatsisartunut ilaasortanik ukuninnga inuttaqarpoq:

 

Laura Táunâjik (S), Siulittaasoq, Nivi Olsen (D), Siulittaasup tullia, Mala Høy Kuko (S), Jess Svane (S), Bendt B. Kristiansen (IA), Debora Kleist (IA) kiisalu Peter Olsen, sinniisoq (IA).

 

Paasisaqarnerujumalluni Ilaqutariinnermut Peqqissutsimullu Ataatsimiititaliap Siulittaasua, Laura Táunâjik, oqarasuaatikkut ugguuna attavigineqarsinnaavoq; 52 65 74 imaluunniit mailikkut; laura@inatsisartut.gl