Nutaarsiassat


2019 2018 2017 Flere år...

20-10-2017

Partiinut tapiissutit

Ullumi Sermitsiap nittartagaani partiinut tapiissutit pillugit siunnersuut eqqarsaatigalugu siulittaasoqarfik salloqittaasutut oqaatigineqarpoq.

 

Oqaatiginiarneqarpoq partiinut tapiissutit 2009-mi 2010-milu qaffanneqartut, qinigaatitamut ataatsimut tapiissutit 85.000 kr.-inik partiinullu tapiissutit 350.000 kr.-inik.

 

Ilumoorpoq 2009-mi 2010-milu suliassanik Inatsisartut Allattoqarfianniit partiinut nuussisoqarmat, allattoqarfiup partiinik sullissilluni suliassaasa partiinilu naalakkersuinikkut sulinerup immikkoorteqqissaarneqarnissaat siunertaralugu, naalakkersuinikkullu sulinermut aningaasatigut tapiissuteqartarneq pillugu inatsimmi piumasaqaatit naammassiniarlugit. Inatsimmi pineqartumi § 1, imm. 4-mi aalajangersarneqarpoq:

 

”Kalaallit Nunaanni Namminersorlutik Oqartussat partiinut, kattusseqatigiinnut kisimiillutilluunniit qinigaasunut aningaasatigut toqqaannartumik toqqaannanngikkaluamilluunniit tapiissuteqarsinnaanngillat, tamanna inatsimmi matumani inatsimmiluunniit allami erseqqissumik tunngavissinneqarsimanngippat.”

 

Taamaalilluni taamanikkut partiinut tapiissutit qaffanneqarnerat immini pineqarani, Allattoqarfimmiit suliassanik partiinut nuussineq pineqarpoq. Taamaattumik aamma allannguutissatut siunnersuummi takuneqarsinnaavoq iluarsiniarneqartut tassaasut partiinut tapiissutit 650.000 kr.-iusut ilaasortaatitamullu ataatsimut tapiissutit 210.000 kr.-isut.

 

Taamaattumik kisitsisit pineqartut, inatsisitigullu 2006-imiit aningaasat naleerukkiartornerannut iluarsineqarsimanngitsut, tassaapput iluarsineqarnissaat siunnersuutigineqartoq. Siulittaasoqarfiup partiinut tapiissutit iluarsineqarnissaannik siunnersuutaa taamatuttaaq partiinit saaffiginnissuteqarnermik tunngaveqarpoq. Partiit siulittaasoqarfimmut saaffiginnissuteqarneranni aningaasarsianut allaffissornermullu aningaasartuutinut qaffakkiartuinnartunut tapiissutinik akissarsiat akillu nalinginnaasumik qaffakkiartornerannut naleqqussaasoqarnissaa siunertaralugu partiinut tapiissutit iluarsineqarnissaat tunngavilersuutigineqarpoq.

 

Immikkoortoq taamaalilluni Inatsisartuni ulloq 19. oktober siullermeerneqarpoq inatsisinullu ataatsimiititalianut suliareqqinneqartussatut innersuunneqarluni. Ataatsimiititaliap suliassamik tamakkiisumik qulaajaalluni suliarinninnissaa siulittaasoqarfiup tutsuigilluinnarpaa.

 

Taamaattumik siulittaasoqarfik siunertaqanngilluinnarpoq paasissutissanik isertuussinissaminik, tamatumunngalu atatillugu partiit innersuussutissallugit, siunnersuutip imarisaasa sukumiinerusumik itisilerneqarnissaat tusagassiorfinnit allanilluunniit pisariaqartinneqassappat, apeqqummi annerusumik partiinut tunngammat.

 

Siunnersuutikkut oqaatigineqareersutut aamma suli periarfissaqarpoq partiimut tapiissutit qaffaataasa piumagaanni qinnutiginnginnissaannut.

 

 

Inatsisartut Siulittaasoqarfiat