Nutaarsiassat


2019 2018 2017 Flere år...

17-08-2011

Siulittaasoqarfiup 2011-mi Inatsisartut ukiakkut ataatsimiinnerminni oqaluuserisassaat saqqummiuppai

 

Inatsisartut Siulittaasuata Josef Motzfeldtip nuannaarutigaa ukiut aappassaa tulleriissiinnarlugu 2011-imut Inatsisartut ukiakkut ataatsimiinnissaannut UKA2011-mut oqaluuserisassat saqqummiussinnaagamigit, oqaluuserisassanik siunnersuuteqarnissamut tunniussivissamut killissarititaasumit tallimanngornermit aggustip ulluisa 12-iannit ullut tallimat qaangiutiinnartullu. Oqaluuserissat taama siusitsigisukkut saqqummiunneqarsinnaanerat nuannaarutissaavoq, taamaaliornikkummi ilaasortat allaffeqarfiillu ataatsimiinneq aallartitsinnagu piareersarnissaminnut sapinngisamik sivisunerpaamik piffissaqartinneqassammata.

 

Taamaalilluni Inatsisartut ukiakkut ataatsimiinnerat septembarimi tallimanngornerit pingajuanni 16. september aallartissaaq pilersaarutigineqartullu malillugit ulloq 15. november naammassissalluni.

 

Katillugit ullut ataatsimiiffiusut 23-unissaat pilersaarutigineqarpoq. Ulluni ataatsimiiffiusuni oqaluuserisassat ingerlaavartussaapput, taamaalillunilu immikkoortut ulluni pilersaarutigineqartutut oqaluuserineqarfissaminni naammassineqanngitsut ullormi ataatsimiiffiusumi tullermi oqaluuserineqartassallutik.

 

UKA2011-mi oqaluuserisassanut ilaasortat siunnersuutaat nutaat 66-it ilanngunneqarput Naalakkersuisullu immikkoortunik oqaluuseritikkusutaminnik 24-inik nutaanik nalunaaruteqarlutik, taakkulu saniatigut immikkoortut 17-it siusinnerusukkut ataatsimiinnernit kinguartinneqarsimasut siullermeerneqareersulluunniit oqaluuserisassaallutik.

 

Sapaatit akunnerini assigiinngitsuni ullut ataatsimiiffiusussat ima agguataarneqarput:

  • Sapaatit akunnerini 38, 39 aamma 40, 41, 42, 43-mi nal. 13.00-imiit 18.00-imut sapaatip akunneranut ullut ataatsimiiffiusartussat pingasuussapput (marlunngornerit, pingasunngornerit sisamanngornerillu).
  • Sapaatit akunnerat 44 Inatsisartuni ataatsimiiffiusussanngilaq Nunat Avannarliit Siunnersuisoqatigiiffiata ataatsimiinnera pissutigalugu. Taamaattorli ataatsimiititaliat sapaatip akunnera taanna aamma sulissapput.
  • Sapaatit akunneri 45 aamma 46 pilersaarutigineqartutut UKA2011-mi ataatsimiiffiussapput kingulliit ullut marluk ataatsimiiffiusarlutik, sapaatip akunnerani 45-mi marlunngorneq pingasunngornerlu ataatsimiiffiullutik sapaatillu akunnerani 46-mi ataasinngorneq marlunngornerlu ataatsimiiffiullutik.

 

Inatsisartut Suleriaasianni § 37 malillugu sapaatip akunnikkaartumik akunnermik apeqquteqarfiusinnaasoqassasoq Siulittaasoqarfiup taamatuttaaq pilersaarutigaa. Akunneq apeqquteqarfiusinnaasoq taanna pingasunngornerit tamaasa nal. 11:00-imiit 12:00-imut ingerlanneqartassaaq, tamannalu pereeraangat nal. 13:00 ataatsimiinnerup aallarteqqinneqarnissaanut unillatsiartoqartassalluni.

 

UKA2011-mut atatillugu atortussat tamarmik Inatsisartut nittartagaanni inatsisartut.gl-imi takuneqarsinnaalissapput. Ingerlaavartumik atortussat qarasaasiakkut allakkatigut pisartagarineqarsinnaapput. Tamanna kissaatigigaanni Laila Kristensen lkri@inatsisartut.gl attaveqarfigineqarsinnaavoq.

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq +299 55 76 41 attaveqarfigalugu pissarsiarineqarsinnaapput.