Nutaarsiassat


2019 2018 2017 Flere år...

07-09-2011

Elisa Nuko aamma Torben Harald Alne sølviusumik Nersornaaserneqarput

 

Inatsisartut Siulittaasuata ullumi ulloq 7. september 2011 Nuummi Hans Egedep Illuani nalliuttorsiualaarnermi Elisa Nuko aamma Torben Harald Alne sølvimik Nersornaaserpai.

 

Inatsisartut Siulittaasoqarfiata Elisa Nuko sølvimik Nersornaaserpaa, nunatsinni kulturikkut tunngasutigut piffissami sivisuumi annertuumik pingaaruteqartumillu tunniussaqarsimanera tunngavilersuutigalugu.

 

Siulittaasup Elisa Nukomut oqaaseqarnermini makku erseqqisarpai:

 

"Tasiilami erinarsoqatigiinni assigiinngitsuni ukiut ingerlanerini peqataasarsimavutit kingullertigullu erinarsoqatigiit Kangiata Akisunnera aamma ilaasortaaffigilersimallugit. Erinagilluinnartumik tusarnersumillu nipeqarnerit erinarsoqatigiinni immikkuullarissutigaat tamannalu Tunumiut nipaannut tusarningaartumut tiguartinnartumik tusarnaartakkatsinnut ilisarnaatitut oqaatigisariaqarpoq."

 

Inatsisartut Siulittaasoqarfiata Torben Harald Alne sølviusumik Nersornaaserpaat, perorsaanermik suliaqarnermini kulturitta paasineqarnissaa eqqarsaatigalugu nunatsinnut piffissami sivisuumi annertuumik pingaaruteqartumillu tunniussaqarsimanera tunngavilersuutigalugu.

 

Siulittaasup Torben Harald Alnemut oqaaseqarnermini makku erseqqisarpai:

 

"1972-imi Nuummi ilinniartut ineqarfianni nunatsinni atorfineqqaarninniilli meeqqat pitsaanerusunik atugaqalernissaat qasujuillutit sulissutigisimavat. 1975-imi Nuummi Meeqqat Illuata pilersinneqarneraniit taamatuttaaq angerlarsimaffimmut tassunga pisortatut perorsaariaatsimik ineriartortitsisimavutit. (...)  Nunatsinni perorsaariaatsimik ineriartortitsininni nunatta pinngortitaassusianit inuiaqatigiinnilu kulturikkut pingaartitanit sunnerneqarsimavutit. Tamanna aamma pissutaaqataanngitsuugunanngilaq sulinikkut meeqqap qitiutinnissaa aamma iluatsissimagakku, tamannalu aqqutigalugu (...) meeqqat kulturikkut kinaassusiat kinaassutsiminnillu tulluusimaarutiginninnerat aalajangiusimallugulu nukittorsartarsinnaasimavat. Pitsaanerpaavorlu tamanna maani nunami namminermi ingerlanneqartarsimammat." 

 

 

Josef Motzfeldt

Inatsisartut Siulittaasuat  

 

Paasissutissat allat Inatsisartut Siulittaasuat Josef Motzfeldt mobilikkut 55 76 41 attaveqarfigalugu pissarsiarineqarsinnaapput.