Nutaarsiassat


2019 2018 2017 Flere år...

06-09-2011

Nunat Avannarliit Killiit Siunnersuisoqatigiiffiata Islandimi Bifrostimi ukiumoortumik ataatsimiinnera

 

Nunat Avannarliit Killiit Siunnersuisoqatigiiffiata 27-issaanik ukiumoortumik ataatsimiinnera aggustip ulluisa 22-anniit 25-iannut Islandimi Bifröstimi ingerlanneqarpoq. Kalaallit Nunaanniit peqataapput Inatsisartut Siulittaasuat Nunat Avannarliit Killiit Siunnersuisoqatigiiffiannut Kalaallit Nunaata aallartitaanut siulittaasuujutigisoq Josef Motzfeldt kiisalu Nunat Avannarliit Killiit Siunnersuisoqatigiiffiannut aallartitat sinneri Ruth Heilmann, Doris Jakobsen, Jane Petersen, Sivert K. Heilmann aamma Justus Hansen.

 

Ukiumoortumik ataatsimiinneq Nunat Avannarliit Killiit Siulittaasoqarfianni siulittaasuusumit Ólína Þorvarðardóttir Islandimeersumit ammarneqarpoq, ataatsimiinnerlu Bifröstip Universitetiani alianaaqisunik avatangiiseqartumi ingerlanneqarluni.

 

Ukiumoortumik ataatsimiinnerup ammarneqareernerani norgemi inatsisartunit stortingemit sinniisut siunnersuisoqatigiiffiup ukiumoortumik ataatsimiinnerani peqataasut ataqqiniarlugit angutip silanngajaartup Oslomi Utøyamilu inunnik 77-inik qaammat ataaseq sioqqullugu toqutsineratigut norgemi alianartumik pisoqarsimanera minutsi ataaseq nipangersimanermik malunnartinniarneqarpoq. Pisoq tamanna nunanit pingasunit aallartitanik tamanik qamuuna annertuumik attuisimavoq.

 

Nunat Avannarliit Killiit Siunnersuisoqatigiiffiat nutaamik siulittaasoqalerpoq

Nunat Avannarliit Killiit Siunnersuisoqatigiiffiannut islandip siulittaasuutitaqarnera ileqquusoq malillugu ukiumoortumik ataatsimiinnermi naammassivoq, siulittaasuuffillu Savalimmiunut ukiumi aggersumi siulittaasuutitaqartussamut tunniunneqarluni, taamaalillunilu aamma Savalimmiut aallartitaasa siulittaasuat Kári P. Højgaard Nunat Avannarliit Killiit Siunnersuisoqatigiiffiannut nutaamik siulittaasunngorluni. Tullianik ukiumoortumik ataatsimiittoqassaaq 2012-imi Savalimmiuni.

 

Siunnersuisoqatigiit siunissami ataatsimiittarnerisa aaqqissuussaanissaat

Ukiumoortumik ataatsimiinnermut siulittaasoqarfik siunissami siunnersuisoqatigiiffiup ataatsimiittarnerminik aaqqissuussisarnissaa eqqarsaatigalugu oqallisissiamik saqqummiussaqarpoq. Siunnersuisoqatigiiffiup sulinerata pingaartinneqarnerulernissaanik,

 

 

tassuunalu nunat killeqarfii pitarlugit nunanilu ataasiakkaani suleqatigiinnerup sakkortusarneqarnissaanik, ukiuni arlalinni kissaateqartoqartareersorlu Siunnersuisoqatigiiffiup siulittaasoqarfia Siunnersuisoqatigiiffiup ataatsimiittarnerisa aaqqissuunneqartarnerannut allannguutaasinnaasunik siunnersuutinik saqqummiussaqarpoq.

 

Aallartitaniit immikkut maluginiarneqarsimavoq aggustip qaammataani ukiumoortumik ataatsimiinnermi Siunnersuisoqatigiiffiup ataatsimiinneraniit Siunnersuisoqatigiiffiup aalajangersimasumik qulequtaqartitsilluni ataatsimeersuartitsinerani naapeqqinnissamut, juunip qaammataani inissinneqakkajuttumut, piffissaq sivisuallaartartoq. Nalinginnaasumik ataatsimiittarnerit akornanni qaammatit qulingiluat taakku aamma isumaqarput ukiup annersarujussua nunat avannarliit killiit suleqatigiinnerat ilaasortat amerlanerit annerusumik eqqarsaataaniinneq ajormat, soorlu aamma Siunnersuisoqatigiiffiup aggustimi ukiumoortumik ataatsimiittarneri nunani pingasuni inatsisartuni tamani ulappusileruttornerup nalaaniittartut, taamaattumillu aamma kissaatigineqarluni nalilerneqassasoq ataatsimiittarnerit taakku piffissaq eqqarsaatigalugu inissisimasarfii allanngortinneqarsinnaanersut inatsisartuni pingasuni sulinernut naleqqussarneqarlutik.

 

Siunnersuisoqatigiiffiup sulinerata nunani pingasuni inatsisartut suleriaasiinut naleqqussarneqarsinnaaneranut periarfissanik Siulittaasoqarfik maanna misissuilluni aallartissaaq. Suliaq tamanna ingerlaannaq naammassinavianngilaq pineqartoq pillugu isummernissamut tunngavissiortoqaqqaartussaammat, nunani pingasuni inatsisartuni tamani aamma oqallisigineqaqqaartussamik piviusunngortinneqannginnermini. Maannali tassa suliassaq aallartippoq Siunnersuisoqatigiiffimmullu aallartitat sulinerup tamatuma qanoq inerneqarnissaa qilanaaralugu utaqqivaat.

 

Kaammattuutitut aalajangersakkat nutaat Siunnersuisoqatigiiffiullu sulineranik tapersersuinerup sakkortusarneqarnera

Nunat Avannarliit Killiit Siunnersuisoqatigiiffiata kaammattuutitut aalajangersakkat nutaat arfinillit akuersissutigai kaammattuutinillu suli ingerlasunit 14-init tallimat taamaatinneqarlutik. Kaammattuutit taamaatinneqartarput aallartitat taakku naammassineqarsimanerannik aallartinneqarsimanerannillu, naalakkersuisullu taakkununnga akissutaannik, naliliineri tunngavigalugit. Siunnersuisoqatigiiffiup maluginiarpaa minnerunngitsumik Savalimmiuni naalakkersuisunit akissutaasartut amigaateqaaluttut, tamannalu siunnersuisoqatigiiffimmut aallartitanit naammagisimaarneqarani.

 

Kaammattuutitut aalajangersagassatut nutaatut saqqummiussat kaammattuutitoqqaIlu taamaatiinnarneqarnissaannik naliliiniarnermut atatillugu Siunnersuisoqatigiiffiup oqallinneranut nangissutitut Siunnersuisoqatigiiffimmut aallartitat maluginiarpaat Siunnersuisoqatigiiffiup kaammattuutitut aalajangersagaanut nunani pingasuni naalakkersuisut tunniusimanerat nikerartorujussuusinnaasartoq ilaannikkullu peqanngivittartoq. Taamaattumik Siunnersuisoqatigiiffimmut aallartitat siunissami sulissutiginiarpaat Nunani Avannarlerni Killerni suleqatigiinnermut nunani pingasuni naalakkersuisuusut annertunerusumik erseqqinnerusumillu tapersersuilernissaat. Siunnersuisoqatigiiffiup 2010-mi Tasiilami ukiumoortumik ataatsimiinnermut atatillugu nunani pingasuni nunanut allanut tunngasunut naalakkersuisuusut naapiseriaraluarpaat, ajoraluartumik piviusunngortinneqarsinnaasimanngitsumik nunani pingasuni nunanut allanut tunngasunut naalakkersuisut allanik ulapputeqarnerat pissutigalugu. Siunnersuisoqatigiiffiup tamanna misileqqinniarpaa 2012-imi tullianik aalajangersimasumik qulequtaqartitsilluni ataatsimeersuartitsinissami Kalaallit Nunaanni ingerlanneqartussami. Siunnersuisoqatigiiffiup neriuutigaa naatsorsuutigalugulu nunani pingasuni naalakkersuisuusut suliniut tamanna tapersersorumaaraat, taamaaliornermikkullu peqataallutik Nunat Avannarliit Killiit suleqatigiinnerata nukittorsarneqarneranut nunani avannarlerni naalakkersuisut inatsisartullu suleqatigiinnerannut iluaqutaasumik.

 

Aallartitat siulittaasuat Josef Motzfeldt ima oqaaseqarpoq:

"Ulluni pingasuni unigani nunani avannarlerni killerni inatsisartunut ilaasortat akornanni ataatsimiittarnerni oqaloqatigiittarnernilu nunani pingasuni ataatsimoorutivut naqissuserneqartarput, sutigullu immitsinnut sunik suli ilinniagaqarsinnaanersugut erseqqinnerulertarlunilusooq.

 

Ukiumoortumik ataatsimiinnermi Bifröst Universitetimi sulisunit imaannaanngitsumik sullinneqarpugut, akunnittarfinni nalinginnaasuni sullissinermit eqaassuseq eqqarsaatigalugu pitsaanerungaartumik sullinneqarluta. Sulisunik oqaloqateqartarnikkut aamma paasivara ullut pingasut ataatsimiinneq malinnaavigeqqissaarsimagaat. Naallu aallartitanut ilaanngikkaluarlutik aamma ersersittarpaat pissutissaqartoq nunani pingasuni innuttaasut akornanni maannakkornit suli annertunerungaartumik suleqatigiittoqartariaqartoq, taamatullu aamma isumaqasrlutik apeqqutit Siunnersuisoqatigiiffimmit kaammattuutitut aalajangersakkani sammineqartut qanilluinnarlutillu ilisarnartorujussuusut. Sulisut maluginiarneqarsimavortaaq nunanit pingasunit aallartitat akornanni peqatigiinneq pitsaallunilu sakkortusoq. Nuannerpoq tamanna aamma inunnit ukiumoortumik ataatsimiinnermik malinnaasunit aallartitanullu ilaanngitsunit takuneqarsinnaallunilu misigineqarsinnaasimammat.

 

Pingaaruteqarportaaq aamma maluginiassallugu nunani pingasuni innuttaasut inuuniarnerminnik isiginninnerminni assigiinngitsunik aallaaveqarmata, minnerunngitsumik immut inuiaqatigiinnullu piumasaqaatit eqqarsaatigalugit. Taamaalilluni maluginiagassaavoq imaannaanngitsoq paasillugu pinngortitap pissusiisa malitsigisaanik ajunaarnersuit innermik anitsinertut ittut illuatungaanilu imaaliallaannaq qaangerneqarsinnaanngitsumik aningaasaqarniarnikkut ajornartoorneq piffissap sivikitsuinnaap ingerlanerani islandimiut nalaassimasaat, annerusumik peqataasimammata innuttaasut imminnut piumasaqarfiginissaminnut nukissaqarnerulernerannik innuttaasullu ataasiakkaat pissutsinut nutaanut naleqqussartariaqalernerannik aqqutissanik nutaanik nassaarniarnikkut, pissutsit attatiinnarneqarsinnaanngitsut attatiinnarneqarnissaannik pisortanut piumasaqarnernit tamakku salliutillugit. Oqaloqatigiinnerni taamaattuni imminut apereqqajaananngitsuunngilaq ass. sooq Kalaallit Nunaanni benzinap akianik qaffaanerit ingerlaannaq aningaasartuutaanerusussamut tamatumunnga matusissutissanik tapiissuteqartoqarnissaanik piumasaqaateqarnernik ingerlaannaq malitseqartinneqartarnersut. Inunnut ataasiakkaanut orniginarnerpaasussaagaluarpoq pissutsinut nutaanut naleqqussarniarneq namminerlu pilersitsisinnaassutsip atorneqarnera immut piumasaqarnermut immaqalu nammineq pilersitsisinnaassutsip upperinera atorlugu aqqutissanik nutaanik ingerlavigineqarsinnaasunik periarfissanik misissuinermut.

 

Aamma erseqqilluinnarpoq islandimiut suliniutit qanoq annikitsigigaluaraangataluunniit taakkuninnga isertitaqarnissamut nutaanik periarfissanngortitsisarnermikkut isumassarsiullaqqissusertik attatiinnarsimagaat. Tamannalu takussutissaqarluarpoq filmiliornikkut, atuakkiornikkut, qalipaanikkut, ilusilersuinikkut nipilersornikkut, eqqumiitsuliornikkut, qiperuisarnikkut allarpassuartigullu kulturikkut annertuumik pilersitaareersimasutigut.

 

Immitsinnut ilinniarfigisinnaaqaagut nunatsinni isummanik suliniutinillu pikialaartitsinerulernermut aamma aqqutaasinnaasunik inuiaqatigiittullu taamaallaat pisuunnguutigisinnaasatsinnik."

 

Aalajangersimasumik qulequtaqartitsilluni ataatsimeersuarneq 2012

Nunat Avannarliit Killiit Siunnersuisoqatigiiffiata aalajangersimasumik qulequtaqartitsilluni ataatsimeersuartitsinera Kalaallit Nunaanni 2012-imi maajimi juunimiluunniit ingerlanneqassaaq, eqqarsaataalluni ataatsimeersuartitsinerup Qeqertarsuup Tunuani ingerlanneqarsinnaanissaa. Ataatsimeersuarnerup qaqugu sumilu ingerlanneqarnissaa novembarimi Københavnmimi Nunat Avannarliit Siunnersuisoqatigiiffiata ataatsimiinneranut atatillugu siulittaasoqarfiup ataatsimiittarnerini aalajangerneqarumaarpoq.

 

 

Josef Motzfeldt

Inatsisartut Siulittaasuat Kalaallit Nunaatalu Nunat Avannarliit Killiit Siunnersuisoqatigiiffiannut aallartitaanut siulittaasoq

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq +299 55 76 41 attaveqarfigalugu pissarsiarineqarsinnaapput.