Nutaarsiassat


2019 2018 2017 Flere år...

19-07-2011

Namminersornerulluni Oqartussaanerup ukiuini siullerni 20-ni qinikkatut malunnaateqarluartup Peter Ostermannip toqukkut qimagunnerani

Kommunalbestyrelsimi Inatsisartunilu ilaasortaasimasoq Peter Ostermann toqukkut qimaguppoq. Ukiuni amerlasuuni Qaqortup Kommunerisimasaani qinikkatut malunnaateqartutut sulisimavoq aamma Namminersornerulernerup ukiuni siullerni 20-ni, 1979-99, Inatsisartuni ilaasortaasimalluni.

 

Tulluussimaarutigalugu eqqaamasama ilagaat Peter Ostermann qinigaaffinni sisamani Inatsisartuni ilaasortaaqatigisimagakku, ukiunilu taakkunani qinikkatut sulinermini suliaminut tunniusimalluartutut ilisarisimalersimallugu.

 

Qinersisiminut ataqqinnittuuvoq, qinikkat akornanni partimut sumut ataneq apeqqutaatinnagu isumasioqateqarusunneq tunuarsimaarfiginngisaannaraa eqqaamasama aamma ilagaat. Inuunerli ilungersunartoqaraluarluni sulinerinnaanngimmat periarfissaqaraangami qasukkarsimaarsinnaaneq nuannaarnermik ilalik piginnaaneqarfigilluagaasa ilagaat.

 

Taamani nunarput qinersivinnut arfineq-pingasunut aggugaammat Piitap partimi nunalerinermut uumasuuteqarnermullu oqaaseqartartuatut qularnani ilungersuutaasa ilagaat inuussutissarsiutip taassuma nunatsinni neqissaqarniarnermut pingaaruteqarsinnaassusia.

 

Ilaatigut Inatsisartut Aningaasaqarnermut Ataatsimiititaliaani ilaasortaqatitut Peter Ostermann peqatigalugu nunatta immikkoortui tamaasa angalaqatigisimallugu ataqqillugu ikinngutaalluartutut eqqaamavara.

 

Inatsisartut sinnerlugit qimataanut, Oliviamut qitornaannut, Kristian, Inga aamma Henrik, erngutaanullu misiginneqatiginninnera tunniuppara.

 

Peter Ostermann eqqaamassavara Namminersornerulernerup ukiuini siullerni 20-ni qinikkat akornanni malunnaateqarluarsimasutut, suleqatigilluarsimasatut ikinngutitullu.