Nutaarsiassat


2019 2018 2017 Flere år...

15-06-2011

Tusagassiorfinnut nalunaarut

Inatsisartut Siulittaasuat Josef Motzfeldt Greenland Contractor's (GC-p) Pituffimmi ukiunik 25-inngortorsiorneranut atatillugu nalliuttorsiortitsinermi qaaqqusatut peqataavoq. Angalaneq GC-mit aaqqissuunneqarsimavoq juunillu ulluisa qulingiluaanniit 13-iannut 2011 ingerlanneqarluni.

 

Nalliuttorsiornermut atatillugu tikeraarnermi Pituffimmi ingerlatat ataatsimut isigalugit GC-llu Pituffimmi sulinera, GC-p siunissami periarfissai Kalaallit Nunaatalu siunissami isertitaqarnerunissaa qanoq qularnaarneqarsinnaanersoq ilanngullugit, pillugu tikeraanut, Naalakkersuisut aamma peqataaffigisaannik, ilisimatitsiffiusunik arlalinnik ataatsimeeqatigiittoqartarpoq. GC-mik isumaqatigiissut 2015-imi isumaqatigiinniutigeqqinneqartussaavoq, taamaattumillu GC-p pingaartillugu Pituffimmi ingerlatani pillugit sukumiisumik paasissutissiinissani, tassuunami ilinniartoqartarnissamut periarfissatsialaat ammaanneqarsimammata taamatullu aamma nunatta karsia nalinginnaasumik pitsaasunik isertitaqarnissamut periarfissinneqarsimalluni

 

Aamma amerikamiut ikilisaanernit sipaarniuteqarnernillu eqqorneqarsimanerat malunnarpoq taamaattumillu Kalaallit Nunaata, USA-p Danmarkillu akornanni Igalikumi isumaqatigiissutip inerneratut ataatsimut ataatsimiititaliap pilersinneqarsimasup Joint Commiteep atorneqarnerata tassungalu innersuussisarnerup eqqumaffigineqarnerunissaa pisariaqarpoq. Tassani aalajangersarneqarpoq Pituffimmi suliassat tamaasa eqqarsaatigalugit suliumanittussarsiuussinerni Kalaallit Nunaanni Danmarkimilu suliffeqarfiit salliutinneqartassasut suliassat amerikarmiut suliffeqarfiinut neqeroorutigineqannginnerani. Aatsaat Kalaallit Nunaanni Danmarkimiluunniit suliffeqarfiit suliassaq neqeroorutigineqartoq naammassisinnaanngikkaangassuk suliffeqarfinnut amerikameersunut saattoqarsinnaavoq. Tamannalu USA-mi aningaasaqarniarnikkut kinguariarneq tunngavigalugu Kalaallit Nunaanni Danmarkimilu suliffeqarfinnut, GC ilanngullugu, unammillernartorujussuuvoq, taamaattumillu tullianik sullissisussarsiornissami GC-ip tamatuminnga ingerlatsisuuginnarnissaa qularnaarniarlugu annertuumik suliniartoqartariaqarluni.

 

Tikeraarnermissaaq GC-mi suliffeqarfinnut, katersugaasivimmut Uummannamilu Peter Freuchenip illuani siusinnerusukkut niuertup illorisimasaani Knud Rasmussen pillugu assinik saqqummersitsinermut alakkarterisoqarpoq, soorlu aamma Cafe Coolimi Dorit Olsenip qalipagaanik saqqummersitsisoqartoq.

 

Inatsisartut Naalakkersuisullu pisortatigoortumik aningaasanik ilinniartut angalanerinut imaluunniit Pituffimmi najugalinnut iluaqutaasumik ingerlatanut allanut atorneqarsinnaasunik GC-mut tunissuteqarput.

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq mobil 55 76 41 attaveqarfigalugu pissarsiarineqarsinnaapput.