Nutaarsiassat


2019 2018 2017 Flere år...

03-06-2011

Inatsisartunut ilaasortat aningaasatigut soqutigisaminnik nammineq piumassutsimik nalunaarsuisalernerata eqqunneqarnera

Inatsisartut Siulittaasoqarfiata ulloq 1. juni 2011 aalajangerpaat inatsisartunut ilaasortat aningaasatigut soqutigisatik pillugit nammineq piumassutsimik paasissutissiisalernissaminnut periarfissinneqassasut.

 

Paasissutissanik kikkunnit tamanit takuneqarsinnaasussanik ilaasortat immersuiffigisinnaasaannik suliaqartoqarsimavoq. Taanna Inatsisartut Allattoqarfiannut utertinneqartussaavoq, paasissutissallu paasissutissiissutigineqartut inatsisartut nittartagaanni www.inatsisartut.gl-imi tamatuma kingorna kikkunnut tamanut saqqummiunneqartassallutik.

 

Erseqqissarneqartariaqarpoq matumani pineqarmat ilaasortat aningaasatigut soqutigisaminnik namminneq piumassutsiminnik paasissutissiisarnissaminnut periarfissinneqarnerat.

 

Aaqqissuussineq atuutileqqammermat ilaasortallu suliassami aalajangiinissamut periarfissaqartariaqarmata paasissutissiissutit siulliit siusinnerpaamik 1. juli 2011-p kingorna aatsaat saqqummiunneqarsinnaassapput. Siulittaasoq eqqarsaatigalugu paasissutissat tusagassiorfinnut nalunaarutip matuma nassiunneqarnera ilutigalugu takuneqarsinnaassapput.

 

Tusagassiorfinnut nalunaarummut matumunnga immersuivissat ilaasortat paasissutissanik immersuiffigisinnaasaasa assilineri ilanngunneqarput.

 

Josef Motzfeldt

Inatsisartut Siulittaasuat

 

  Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.