Nutaarsiassat


2019 2018 2017 Flere år...

16-05-2011

Inatsisartut Siulittaasuata Illersornissamut ministeri Gitte Lillelund Bech naapeqatigaa

Illersornissamut ministerip Gitte Lillelund Bechip Nuummut tikeraarnerminut atatillugu Inatsisartut Siulittaasuat Josef Motzfeldt naapeqatigerussimavaa Kangilinnguani sakkutooqarfiup Grønlands Kommandop nuunneqarnissaanik pilersaarutit pillugit nalinginnaasumik naalakkersuinikkut isummanik paarlaateqatiginiarlugu.

Inatsisartut Siulittaasuata Nunanut allanut naalakkersuisuunerata nalaanili Kangilinnguani sakkutooqarfiup nuunneqarsinnaaneranik isumaliutit Illersornissamut ministeritut siulianik oqaloqatigiissutigalugit aallartinneqareerput. Taamaalilluni aamma maanna Illersornissamut ministeriusoq Gitte Lillelund Bech siusinnerusukkut Station Nordimut Kangilinnguanullu Illersornissamut ministeritut siulini taamanikkullu Nunanut allanut naalakkersuisuusoq ilagalugit ataatsimut paasisassarsiorlutik angalaaqatigiinnikuupput.

Taamaalilluni matumani suliaq qangali ingerlasimavoq, maanna inaarutaasumik nalunaarusiaq isummernissarlu kisimik utaqqineqarlutik, Illersornissamullu ministerip Gitte Lillelund Bechip tamatuma qanittukkut allartinneqarnissaa naatsorsuutigalugu. Taakku ilaassapput issittumi sakkutooqarnikkut qullersaqarfiup Arktisk Kommadop siunissami aaqqissuussaanissaa eqqarsaatigalugu suli nalilersuilluni misissueqqissaarnissani, aamma 2010-miit 2014-imut illersornissamut isumaqatigiissummut ilaasunut.

Tamatumunnga atatillugu illersornissamut ministerip ilisimatitsissutigaa Inatsisartut Siulittaasuattulli maluginiarsimagini tusagassiorfitsigut Pittuffik siunissami issittumi sakkutooqarnikkut qullersaqarfissap nutaap inissisimaffigisinnaasaatut taaneqartartoq.

Illersornissamut ministerip ilisimatitsissutigaa tamanna eqqunngitsoq, matumanimi periarfissat pingasuinnaat pineqarmata, tassalu massakkutut Kangilinnguit attatiinneqarneqarsinnaanera, ullumikkutut angallannikkut attaveqaqatigiinnikkullu pissutsit eqqarsaatigalugit pitsaanerpaatut isigineqanngitsup, allatulluunniit periarfissatut Narsarsuarmut Nuummulluunniit nuunneqarsinnaanera. Taamaalilluni suliniarnermi matumani Pituffik periarfissanut ilaatinneqanngilaq.

Pituffik, Canada avannaqqullugu imaatigut angallannerup annertunerulernissaanik naatsorsuuteqarneq, taamatullu aamma Tunup avannaarsuani stationeqarfiit sullinneqarnerat eqqarsaatigalugit siunissamut pilersaarutini, inissimanini pissutigalugu qanoq atorneqarsinnaaneranik nalinginnaasumik isumaliutinut taamaallaat ilaatinneqarpoq.

 

Josef Motzfeldt
Inatsisartut Siulittaasuat

 

 
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.