Nutaarsiassat


2019 2018 2017 Flere år...

05-05-2011

GreenGems ApS pillugu sumulluunniit atuumassuteqanngitsumit inatsisilerinikkut misissuineq naammassivoq

Kukkunersiuinermut Ataatsimiititaliaq novemberimi 2010-mi aalajangerpoq Naalakkersuisut Siulittaasuata Kuupik Kleistip aamma Inuussutissarsiornermut Aatsitassanullu Naalakkersuisup Ove Karl Berthelsenip suliffeqarfimmi GreenGems ApS-imi akuunerat sumulluunniit attuumassuteqanngitsumut inatsisilerinikkut misissortinniarlugu, tassunga ilanngullugit GreenGems ApS-ip akuersissummik qinnuteqaataanik Namminersorlutik Oqartussat suliarinninnerat aamma Greenland Venture A/s-ip GreenGems ApS-imi akuunera.

 

Misissuinerup inernera aprili naanerani 2011-imi ataatsimiititaliap tiguaa.

 

Misissuinermi inerniliisoqarpoq:

- GreenGems ApS-ip aatsitassanik misissueqqissaarnissamut qinnuteqaataa Namminersorlutik Oqartussat suliarinninnerminni malittarisassat atuuttut sulianillu suliarinninnermi tunngaviusut naapertorlugit iliuuseqarsimapput,

- Suliamut attuumassuteqartoqarluni ajornartorsiutaasinnaasut pillugit malittarisassat atuuttut suliarinnernilu tunngaviusut malillugit Namminersorlutik Oqartussat iliuuseqarsimapput,

- Naalakkersuisut Siulittaasuata taassumalu inooqataata GreenGems ApS-imi akuunerat pissutsit atuuttut malillugit Siulittaasup Naalakkersuisutut sulineranut tulluartuunnginnera takuneqarsinnaanngilaq,

- Inuussutissarsiornermut Aatsitassanullu Naalakkersuisup nuliata GreenGems ApS-imi akuunera pissutsit atuuttut malillugit Inuussutissarsiornermut Aatsitassanullu Naalakkersuisup Naalakkersuisutut sulineranut tulluartuunnginnera takuneqarsinnaanngilaq,

- Greenland Venture A/S-ip GreenGems ApS-imi akuunera niueqatigiinnikkut nalinginnaasumik piumasaqaatit malillugit ingerlanneqarpoq.

 

Kukkunersiuinermut Ataatsimiititaliaq 3. maj 2011-imi aalajangiivoq eqqartuussissuserisup misissuinera tusaatissatut tigullugu, ataatsimiititaliallu tamanna tunngavigalugu suliami iliuuseqaqqinnissaa tunngavissaqanngitsoq, suliarlu naammassineqartoq.

 

Eqqartuussissuserisup misissuinerani inerniliinerit eqikkallarlugit ilanngunneqarpoq. Uani aajuk

 

Annertunerusumik paasisaqarusukkaanni Kukkunersiuinermut Ataatsimiititaliap Siulittaasua Naaja Nathanielsen telefonikkut 29 57 04 attavigineqarsinnaavoq.