Nutaarsiassat


2019 2018 2017 Flere år...

29-04-2011

Inatsisartut 2010-mut ukiumoortumik nalunaarutertik saqqummiuppaat

Inatsisartut 2010-mut Ukiumoortumik Nalunaarusiaat Inatsisartut Siulittaasuata ullumikkut saqqummersippaa.

 

Isikkulersuineq nutaaq 2009-mut ukiumoortumik nalunaarummi atuutilersoq attatiinnarneqarpoq, 2010-mullu ukiumoortumik nalunaarusiaq annertunerulerpoq.

 

Siulittaasup ingerlatai immikkut kapitalilerneqarput, tassani ukiup ingerlanerani ingerlatai sukumiisumik pasissutissiissutigineqarlutik, siulittaasoqarfiullu ingerlatai siusinnerusumut sanilliullugu sukumiinerullutik.

 

Ukioq 2010 pisoqarfioqaaq, tassani inatsisartuni arlalinnik annguisoqarluni. Ilaatigut suleriaaseq nutaaq akuersissutigineqarpoq, ataatsimiittarfiillu aammalu paasissutissiinermi tusagassiorfinnullu ini allanngortiterneqarlutik aammalu atortut elektroniskit arlallit Inatsisartut atugaannik pitsaanerulersitseqataasussat atorneqalerlutik.

 

Ukiumoortumik nalunaarummi nutaami aammattaaq pingaartinneqarpoq aningaasatigut pissutsit sapinngisamik erseqqarissumik saqqummiunneqarnissaat. Paasissutissat taakku aamma sanilliunneqarsinnaapput, tassa kisitsisit ukiut pingasut sisamat tulleriisillugit allassimammata. Taamatuttaaq §36/§37 naapertorlugu apeqqutit ukiut pingasut tulleriisillugit amerlassusaat allassimapput.

 

Annertusisitsisoqaraluartoq ukiumoortumik nalunaarummi ajornanngitsumik ujaasisoqarsinnaavoq, tassa kapitalit immikkut tamaasa qalipaaserlugit nalunaaqutserneqarnikuummata, taamaalillunilu nittartakkap inatsisartut.gl isikkua malinneqarluni. Aammattaaq Inatsisartut nittartagaanni paasissutissat amerlanerusut ukiumoortumik nalunaarummi innersuussutigineqarput.

 

Ukiumoortumik nalunaarut naqitanngorlugu ullumikkut saqqummersinneqartussaagaluarpoq, naqiterivimmili kukkusoqarnera pissutigalugu taakkunannga tunniussinissaq sapaatip akunnerata ataatsip missaani kinguuaattoorpoq. Naqitanngorlugit pissarsiarineqariarpata nunami tamarmi atuarfinnut, atuakkanik atorniartarfinnut kommuninullu nassiunneqassaaq. Soqatiginnittut Inatsisartut Allattoqarfiannut taassuminnga piniarsinnaapput inatsisartut@inatsisartut.gl imaluunniit 34 50 00 atorlugu.

 

Ukiumoortumik nalunaarusiaq elektroniskinngorlugu pdf-filitut aaneqarsinnaavoq uani inatsisartut.gl/saqqummersitat.

 

Josef Motzfeldt

Inatsisartut siulittaasuat

 

 

Annertunerusumik paasisaqarusukkaanni Inatsisartut Siulittaasuat Josef Motzfeldt mobil 55 76 41 sianerfigalugu attavigineqarsinnaavoq.