Nutaarsiassat


2019 2018 2017 Flere år...

25-03-2011

Islandimiut angalatitsisartut timmisartuussisarnissaannik isumaqatigiissutit

Islandimiut angalatitsisartut timmisartuussisarnissaannik isumaqatigiissutinut isummani Aningaasaqarnermut Naalakkersuisunngortup Aningaasaqarnermut Ataatsimiititaliamut ataasinngornermi ulloq 21. marts 2011-mi saqqummiuppaa. Tamanna tunngavigalugu suliaq ataatsimiititaliamit ullumi oqaluuserineqarpoq.

 

Tamannalu tunngavigalugu Aningaasaqarnermut Ataatsimiititaliamut ilaasortat ataani allassimasut suliamut isummernertik saqqummiukkumavaat.

 

Islandimiut angalatitsisartut timmisartuussisarnissaannik isumaqatigiissutit nalilersorneqartassasut paasitinneqarpugut, taamaalilluni assersuutigalugu Mittarfeqarfinnut Air Greenlandimullu siunertaanngitsumik kingunerluutaasinnaasut eqqumaffigineqartuaqqullugit. Ukioq manna qaammatini siullerni marlunni inuit 13-iinnaat isumaqatigiissutit atorlugit angalasimapput, taamaattumillu isumaqatigiissutit inuiaqatigiit aningaasaqarnerannut manna tikillugu taasarialimmik kinguneqarsimasut oqaatigineqarsinnaanani.

 

Sulinermut atatillugu angalanernut kiisalu napparsimasut ilinniartullu pisortat akiligaannik angalanerannut taamaallaat atuuttussanngorlugit pisiniarnermut isumaqatigiissutit maanna iluarsineqartut paasivarput. Pisiniarnermut politikki pillugu Inatsisartunut nassuiaasiortoqarnissaa Naalakkersuisut neriorsuutigaat, tassani inuiaqatigiit  pisariaqartitaat pingaarnerit misissorneqassallutik aammalu pissutsit soorlu CSR-imut (tassa silamut, avatangiisinut, ilinniartitaanermut isumaginninnikkullu suliniutinut tunngatillugu suliffeqarfiit akisussaanerat), nutaaliornermut il.il. tunngasut ilanngunneqassallutik. Pisortat pisiniarnermut politikkiat pillugu Inatsisartut ukioq manna ukiakkut ataatsimiinnerminni isummernissaanut nassuiaat taanna tunngavissiisussatut naatsorsuutigineqarpoq.

 

Nassuiaat taanna aqqutigalugu pisortat pisiniartarneranni allaffissornikkut periutsit paasinarsisinneqarnissaat iluarisimaaparput, tamannalu pillugu ilisimatinneqarnissarput qilanaaraarput. Islandimiunut angalatitsisartunut isumaqatigiissutit assinganik isumaqatigiissuteqarnissaq pillugu Namminersorlutik Oqartussat Air Greenlandillu oqaloqatigiinnerit aallartissimammatigit aamma iluarisimaarparput.

 

Aningaasaqarnermut Ataatsimiititaliaasimasup sulisimanera annertooq suliniutinut taakkununnga tunngavissiisoq nuannaarutigigatsigu naggasiutigalugu oqaatigerusupparput.

 

 

Nuuk, ulloq 25. marts 2011

 

 

Olga P. Berthelsen             Andreas Uldum                  Juliane Henningsen