Nutaarsiassat


2019 2018 2017 Flere år...

18-02-2011

2010-mi ukiakkut ataatsimiinneq maanna DVD-mi tusarnaarneqarsinnaalerpoq

Siorna Inatsisartut ukiakkut ataatsimiinnerat maanna DVD-mi tusarnaarneqarsinnaalerpoq. Taamaalilluni Inatsisartut Ataatsimiittarfianni ataatsimiinnerit siullermeersumik qarasaasiakkut isiginnaarutikkut takuneqarsinnaangorlugu saqqummersinneqarpoq. 2010-mi ukiakkut ataatsimiinnermi tamarmiusumi oqaluuserisat tamarmik ataasiakkaarlugit nipitalerlugit naqitanngorlugillu pigineqalerput. Ataatsimiinneq tamakkerlugu DVD-mi ataasiinnarmi toqqorneqarsinnaalersimavoq.

Ataatsimiinnermi kingullermi Inatsisartut oqaluuserisaasa soqutiginnittunit - innuttaasunit, tusagassiorfinnit, atorfilittanit naalakkersuinermillu sulialinnit ilisimasaqarfigineqalernissaat DVD-mi uani siunertarineqarpoq. Internetimut isernissaq periarfissaatinnagu DVD-p atorneratigut tamanna aamma ajornarunnaarpoq. Naqeqqaakkanik saqqummersitsisarunnaarnermut taarsiullugu naqeqqaakkanit periarfissanik annertunerujussuarnik DVD ullutsinnut naleqquttumik ammaassivoq.

DVD nunatsinni tamani tamaani tigusisussanut maanna agguaanneqassaaq, kommunit, atugaateqarfiit, ingerlaqqiffiusumik ilinniarfiit soqutigisaqaqatigiiffiillu ilanngullugit. DVD Inatsisartut Attaveqaqatigiinnermut immikkoortortaani pissarsiarineqarsinnaavoq una attaveqarfigalugu komm@inatsisartut.gl.

Josef Motzfeldt
Inatsisartut Siulittaasuat


Annertunerusumik paasiniaaffigineqarsinnaavoq Inatsisartut Siulittaasut Josef Motzfeldt mobil 55 76 41.