Nutaarsiassat


2019 2018 2017 Flere år...

14-02-2011

Agnethe Nielsenimut Inatsisartut Siulittaasuannit eqqaniut

"Agnethe Nielsenip sulinermini silaqassuseq inoqammullu ataqqinninneq aallaavigai"

 

Ikinngutaalluartoq, qinikkatut inoqatitullu ataqqisaasoq, inuiaqatigiinni atukkatsigut naliginnerusumik atugaqalernissatsinnut ilungersuutiginnittuarsimasoq Agnethe Nielsen inuiaqatigiit nakoqqutitta nuimanerpaat ilaat annaavarput.

 

Inuusuttunngulerninnili kommunalbestyrelsimi ilaasortatut nunaqarfitsinnut qinikkatut suleqatini arnartatuaaffigalugit tikikkaangat isumatussutsi isumassuiumassutsilu sulinermini pingaartitani ilisarnaatigigai eqqaamavara.

 

Kingorna ukiorpassuit qaangiunnerini Inatsisartuni ilaasortaqatitut suleqatiginerani qinersisiminut ilumoorluni sulinini allanngortinnagu nakkaannajuissusia qanimut naligisatut misigisaqarfigisimasinnaagakku qinikkatut sulininni usorsisimassutigaara.

 

Qinikkatut innuttaasunit, minnerunngitsumillu qinersisiminit, nuannarineqartuaannanngitsunik isummersortarnini Agnethe Nielsenip ataqqinaataasa ilaannaraat. Qinersisiginngikkaluakkani ilanngullugit piumasaqarfigissallugit suleriaatsini ilisarnaataasa ilagaat.

 

Ullumikkut qinikkat akornanni sulinermi qinersinissaq tulleq naleraralugulusooq sulineq Agnethip isummersorneraniinngisaannarpoq. Akerlianik pingaaritaraa isummami saqqummiunneqarnerminni tunngavilersorluagaallutik illersorneqarsinnaanissaat.

 

Soorlu Agnethe Nielsenip sulinermini pereersut siunissamilu pisussat ullumikkorpiaq sulinermigut naapisittarai.

 

Agnethe Nielsenip sulinermini silaqassuseq inoqammullu ataqqinninneq aallaavigai.

 

Torersumik peqqinnartumillu inuuneqartariaqarnerput toqussi tikillugu Narsami nunattalu sinnerani ilungersuutigalugit ilungersutigai peqataaffigiuarlugit.

 

Ataqqinnilluta qujaniarlutalu eqqaamassavarput.

 

 

Josef Motzfeldt

Inatsisartut Siulittaasuat

12. februar 2011