Nutaarsiassat


2019 2018 2017 Flere år...

01-02-2011

Nunat Avannarliit Siunnersuisoqatigiivisa 2011-mi sulinerat Esbomi, Finlandimiittumi ataatsimiinnernik aallarnerneqarpoq

Nunat Avannarliit Siunnersuisoqatigiivini ilaasortaq, Debora Kleist, Nunat Avannarliit Siunnersuisoqatigiivisa ukioq manna ataatsimiittarneranni siullerni ulloq 26. januar 2011-mi peqataavoq. Nunatsinni sila pissutigalugu ulloq 25. januar 2011-mi ataatsimiinnerit suliniutillu aallarnersarnerannut Debora Kleist anngussinnaassimanngliaq. Inatsisartunit Nunat Avannarliit Siunnersuisoqatigiivinut ilaasortap aappaa, Kim Kielsen, Aningaasaqarnermut Ataatsimiititaliap Inuussutissarsiornermullu Ataatsimiititaliap ataatsikkut Skotlandimut paasisassarsiorlutik angalanerannut peqataanini pissutigalugu Nunat Avannarliit Siunnersuisoqatigiivisa ataatsimiittarnissaannut peqataasinnaannani nalunaaruteqarsimavoq.

 

Atugarissaarnermut Ataatsimiititaliap 2011-mi sammisassaa pingaarneq - nunat avannarliit inissiaqarfeqarfiini inuiaqatigiinni atugarliortut najugaqalersarnerat qanoq iliorluni akiorniarneqarsinnaanera - Atugarissaarnermut Ataatsimiititaliamit aallarnersarneqarpoq. Uagut nunanut avannarlernut allanut saniulluta Nunatsinni atugarliortut najugaqarfiinik peqanngikkaluarluta taamattoq innuttaasut ajunngitsumik misigisimanissaat, atugarissaarnissaat inissiallu oqimaaqatigiissumik agguarneqarnissaat ineqarneq pillugu politikkeqarnikkut isumaliutersuutigiuartarparput.

 

Atugarissaarnermut Ataatsimiititaliap ataatsimiinnerani qiteqqakkut  ajoqusertarnerit pillugit siunnersuutissamut isumaliutissiissusiassaq suliarineqarpoq. Debora Kleistip Inatsisartut Peqqinnissamut Ataatsimiititaliaanut ilaasortaanini aqqutigalugu Nunatsinni inuit qassit qiteqqamikkut ajoqusersimanersut, taakkununnga suut neqeroorutaasarnersut  qanorlu suliarineqartarnersut pillugu annertunerusumik paasitinneqarusuppoq.

 

Nunarsuarmioqatigiinnermi nunat avannarliit atugarissaarnermut politikkissaattut siunnersuummut atatillugu nunarsuarmioqatigiinnermi unammilligassat eqqarssatigalugit atugarissaarnermik qanoq ittumik nunat avannarliit qulakkeerinnissanersut pillugu ukiuni kingullerni oqallissutaasut Atugarissaarnermut Ataatsimiititaliap nangillugit ingerlateqqippai. Nunatsinni akileraartarneq atugarissaarnerlu siunissami qanoq aaqqissuunneqassanersut pillugu Kalaallit Nunaanni annertuunik arlalinnik aalajangigassaqarpugut. Akileraartarnermut Atugarissaarnermullu Isumalioqatigiissitaq tamanna pillugu isumaliutersuutiminik kaammatuutissanillu kingusinnerpaamik 1. marts 2011-mi Inatsisartunut tunniussissaaq, tamatumalu kingorna Inatsisartut suleqatigalugit akileraartarnerup atugarissaarnerullu iluani suliniutit siunnersuutillu tamatumunnga tunngasut nangillugit suliarissallugit.

 

Nunani Avannarlerni inuusuttut amerlavallaat suli ilinniagaqarsimannginnerat ilinniakkamilluunniit aallartitsisimannginnerat aammalu suliffeqalersimannginnerat annertuumik ernumagineqartoq aallaavigalugu inuusuttut suliffissaarusimanerat akiorniarlugu nunat avannarliit ataatsimoorlutik suliniutissaat pillugu siunnersuummut tusarniaanermi Nunat Avannarliit Siunnersuisoqatigiivisa Inuussutissarsiornermut Ataatsimiititaliaata akissutaa Atugarissaarnermut Ataatsimiititaliap aammattaaq suliaraa.

 

Inuttut ingerlalluarnissaq inuttullu piginnaasanik annertusaanissaq, patajaatsumik inooqataanissaq inuiaqatigiillu imminnut napatinnissaat eqqarsaatigalugit ilinniaqarsimanissaq suliffeqarnerlu Kalaallit Nunaanni inuusuttunut pingaaruteqarluinnarpoq.

 

Imminut napatissinnaasumik inuttut piukkunnarsarnissamut inuiaqatigiillu kalaallit ineriartortinnissaannut tamat pimoorussillutik peqataasinnaaqqullugit kikkulluunniit sulisinnaasut ilinniagaqarnissamut suliffissaqarnissamullu periarfissinneqarnissaasa pingaaruteqassusia aalajangiusimasinnaaqqullugu Namminersorlutik Oqartussani iliuuseqarnissat aalajangiinissallu Debora Kleistip qilanaarai. Tamatumunnga atatillugu ilinniartitaaneq pillugu Ilulissani ataatsimeersuarnermit naammassineqaqqammersumit angusat Debora Kleistip isumalluarfigai, tassanimi ilaatigut ilinniartut suliffinnik sungiusarfissanik pissarsissunneqarnissaannut periarfissat sammineqarmata.

 

Nunat Avannarliit Siunnersuisoqatigiivi tullianik ataatsimiissapput ulluni 30.-31. marts 2011-mi Stockholmimi, Sverigimiittumi.

 

Paasissutissat annertunerusut Debora Kleistimut mobil (+299) 49 03 90 atorlugu saaffiginnikkut pissarsiarineqarsinnaapput.

 

Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit namminersorfiusunillu Ålandimit, Savalimmiunit Kalaallit Nunaanniillu 87-inik ilaasortalik.


Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnik sinniisussalinnik. Inatsisartunut ilaasortat Debora Kleist, Inuit Ataqatigiit aamma Kim Kielsen, Siumut Nunat Avannarliit Siunnersuisoqatigiiffiannut ilaasortaapput sinniisussaralugit Inatsisartunut ilaasortaq Hans Aronsen, Inuit Ataqatigiit aamma Inatsisartunut ilaasortaq Akitsinnguaq Olsen, Siumut. Debora Kleist Atugarissaarnermut ataatsimiititaliamut ilaasortaavoq Kim Kielsen Avatangiisinut Pinngortitamilu pisuussutinut ataatsimiititaliamut ilaasortaalluni.