Nutaarsiassat


2019 2018 2017 Flere år...

01-02-2011

Sumulluunniit attuumassuteqanngitsut misissuisinneqarnissaat Nunanut Allanut Sillimaniarnermullu Ataatsimiititaliap piumasaraa

Inatsisartut Nunanut Allanut Sillimaniarnermullu Ataatsimiititaliaata Naalakkersuisut Siulittaasuat sakkortuumik kajumissaarpaa CIA-p Nunatta silaannartaa aqqusaarlugu tigusanik timmisartut atorlugit assartuisarsimagaanera pillugu sumulluunniit attuumassuteqanngitsunik misissuisitseqqullugu

 

Ataatsimiititaliaq ataasinngornermi 24. januar 2011 ataatsimiippoq, aalajangerlunilu Naalakkersuisut Siulittaasuat sakkortuumik kajumissaaniarlugu CIA-p nunatta silaannartaa aqqusaarlugu tigusanik timmisartut atorlugit assartuisarsimagaanera pillugu sumulluunniit attuumassuteqanngitsunik qallunaat naalakkersuisui misissuisitseqqullugit qinnuivigineqassasut.

 

Nunatta silaannartaa aqqusaarlugu tigusanik CIA-p timmisartut atorlugit angallassisarsimagunarnera saqqummiunneqarmat ajornartorsiut ilungersunartutut Ataatsimiititaliap isigaa. Suliaq nutaajunngilaq, tassa nunatta silaannartaa aqqusaarlugu tigusanik CIA-p angallassisarneranik nalunaarutit siulliit 2008-mi ukiakkut tusagassiutitigut saqqummiunneqarnikuummata.

 

Ataatsimiititaliaq siusinnerusukkut ataatsimiinnermini aalajangerpoq ataatsimiititaliap paasisassarsiorluni angalanerata 7. februar 2011 naammassisussap kinguninngua Naalakkersuisut Siulittaasuat isumasioqatigiinnissamut qaaqquniarlugu.

 

Tigusanik CIA-p nunatta silaannartaa aqqusaarlugu angallassisarsimagunarnera pillugu sumulluunniillu attuumassuteqanngitsunik misissuisitsinissaq aallartinniarlugu Naalakkersuisut sunik iliuuseqarsimanerannik Ataatsimiititaliaq apeqquteqalersaarpoq. Ataatsimiititaliap paaserusuppaa siunissami isumaqatigiissusiortarnissanut atatillugu kalaallit sunniuteqarnissaat anguniarlugu Naalakkersuisut sunik iliuuseqarsimanersut. Ataatsimiititaliap aamma paaserusuppaa Igalikumi Itillimilu isumaqatigiissutit unioqqutinneqarsimanersut CIA-llu tigusanik nunatta silaannartaa aqqusaarlugu timmisartut atorlugit angallassisarneratut ilimagineqartunut atatillugu qallunaat naalakkersuisui USA-mut immikkut isumaqatigiissusiorsimanersut. Ajornartorsiut ilungersunartutut Ataatsimiititaliap isigaa, eqqaasitsissutigalugulu suliaq qallunaat naalakkersuisuisa Naalakkersuisullu akornanni ataatsimoorullugu suliassaasoq,

 

Naalakkersuisunut apeqqutit akineqarnissaannut Ataatsimiititaliaq qilanaarpoq, taassumalu kingorna Naalakkersuisut Siulittaasuannik isumasioqatigeereernerup kingorna suliaq isummerfigeqqissallugu.

 

Nunanut Allanut Sillimaniarnermullu Ataatsimiititaliamut ilaasortaapput Justus Hansen (Demokraatit), Jane Petersen (Inuit Ataqatigiit), Hans Aronsen (Inuit Ataqatigiit), Aleqa Hammond (Siumut) aamma Kim Kielsen (Siumut).

 

 

Justus Hansen

Ataatsimiititaliamut siulittaasoq

 

 

Ataatsimiititaliap siulittaasuanit Justus Hansenimit annertunerusunik paasissutissanik pissarsisoqarsinnaavoq, attaveqarfigineqarsinnaavoq mobilikkut +299 53 12 10.