Nutaarsiassat


2019 2018 2017 Flere år...

22-12-2011

Nunat Avannarliit Suleqatigiissitaat 2011-imi naggataarnersiorneqarpoq, Inatsisartunut kiisalu Nunat Avannarliit Siunnersuisoqatigiivinut ilaasortamit Kim Kielsenimit isumasioqatigiinnerni marlunni ingerlanneqartuni peqataaffigineqartumik

Isumasioqatigiinneq Norsket ilisimatusarnermut ingerlaqqiffiusumillu ilinniartitaanermut ministeriaannit Tora Aaslandimit ammarneqarpoq. TFI pillugu nunat avannarliit suleqatigiinnissaasa pingaaruteqartuunera Tora Aaslandip oqaatigaa, tassami nunat avannarliit suleqatigiikkunik akerlianik pinnatik nukittunerusumik inissisimassammata. 

Kalaallit Nunaanni Pinngortitaleriffiup isumasioqatigiinnermut peqataatitaqarnera Kim Kielsenip nuannaarutigaa, taamaaliornikkut ilisimatusarnikkut attaveqatigiinnerit nukittorsaavigineqarlutillu ineriartortinneqassammata.

Kalaallit Nunaata ilisimatusarnikkut tapersiisarnissaa inuussutissarsiortitigullu suleqatigiinnikkut pinngortitamillu atorluaanissamik unammilligassatigut peqataanissaa Kim Kielsenip pingaartippaa, tamatumanilu aamma silamut, avatangiisinut nukissiuteqarnermullu tunngasut ilaapput.     

2011-imi novemberip 30-ani Nunat Avannarliit Siunnersuisoqatigiivini Svensket aallartitaat nunat avannarliit naalagaaffiisa Nunat Killeqarfii Pitarlugit Suleqatigiissitaat peqatigalugu isumasioqatigiinnermi 140-inik peqataaffigineqartumi qaaqqusisuuvoq, nunani avannarlerni innuttaasut noorarnikkut, ilinniagaqarnikkut, niuernikkullu nunat avannarliit killeqarfii nunallu namminersortut pitarlugit ajornartorsiutaasinnaasut aningaasartuutillu pillugit isumasioqatigiinnermi. Nunani avannarlerni innuttaasutut ajornanngitsumik sulisinnaasariaqarpugut, ilinniarsinnaasariaqarpugit, niuersinnaasariaqarpugut pisariaqarfiisigullu atugarissaarfiusutigut atueqatigiittarluta, tamatumali pisinnaanissaa arlalinnik ajornartorsiuteqartitsivoq, tamannalu nunat avannarliit naalagaaffiisa Nunat Killeqarfii Pitarlugit Suleqatigiissitaanut oqallisigisassanngorlugu suliassanngortinneqarpoq, taamaalilluta nunat akornanni nunat avannarliit suleqatigiilluarnissaannut akimmisaaruteqarata ingerlatsisinnaaqqulluta.  

Inatsisartuni inatsisiliortutut Naalakkersuisunilu inatsisinik nalimmassaasutut atuutsitsisutullu nunat avannarliit suleqatigiinnerisa sutigut tamatigut ajornaquteqanngitsumik ingerlanneqarnissaata eqqumaffigineqartuarnissaa, aammalu nunat avannarliit suleqatigiinnissamik isumaqatigiissutaasa ataqqineqartarnissaat kiisalu Nunani Avannarlerni ineriartortitsinikkut akimmisaaruteqartoqannginnissaa Kim Kielsenip kaammattuutigaa.       

Isumasioqatigiinnerni marluusuni tamani Kalaallit Nunaata qinikkamik eqqummaarissumik peqataatitaqarnera maluginiarluarneqarpoq.
Nunat Avannarliit Siunnersuisoqatigiivinut Kalaallit Nunaata Aallartitaa sinnerlugu Nunat Avannarliit Siunnersuisoqatigiivinut ilaasortat, innuttaasut Nunanilu Avannarlerni suleqatigut tamaasa Juullimi pilluaqquagut Ukiumilu nutaassami tamanik ajunngitsunik kissaallugit.

Nunat Avannarliit Siunnersuisoqatigiivisa ukioq 2012-imi ataatsimiinnissaat siulleq  Oslomi, Stortingemi januarip 24.-25-ani Norsket parlamentianni aallarnerneqassaaq.

Paasissutissanik allanik piniaraanni Kim Kielsen mobilikkut 54 86 92 attavigineqarsinnaavoq

Nunat Avannarliit Siunnersuisoqatigiivi suleqatigiiffiuvoq 87-inik ilaasortaqartoq Norgemit, Danmarkimit, Sverigemit, Finlandimit, Islandimit kiisalu Ålandimit, Savalimmiunit Kalaallit Nunaanniillu ilaasortaatitaqartoq.

Inatsisartut Nunat Avannarliit Siunnersuisoqatigiivini marlunnik ilaasortaatitaqarput. Inatsisartunut ilaasortaq Andreas Uldum Demokratineersoq, kiisalu Jane Petersen Inuit Ataqatigiinneersoq sinniisuulluni, aamma Inatsisartunut ilaasortaq Kim Kielsen Siumumiit, Akitsinnguaq Olsen Siumumeersoq sinniisuulluni.  Inatsisartuniit ilaasortaatitat taakkua marluk Kultureqarnermut Ilinniartitaanermullu Ataatsimiititaliami - kiisalu Ilinniartitaanermut Avatangiisinullu Ataatsimiititaliami ilaasortaapput.