Nutaarsiassat


2019 2018 2017 Flere år...

18-10-2011

Inatsisartut Siulittaasuat Luxembourgip ambassadørianik naapeqateqarpoq

Ambassadør Pierre-Louis Lorenz oktobarip ulluisa 18-ianniit 21-iannut Nuummut tikeraartoq Luxembourgip konsulia, eqqartuussissuserisoq Jens Paulsen, peqatigalugu ullumi Inatsisartut siulittaasuannik Josef Motzfeldtimik naapeqateqarpoq, nunatta Luxembourgillu EU-mut ilaasortaasup akornanni atassuteqaatit oqallisiginissaannut periarfissaqarlutik. Piffissaq iluatsillugu ambassadøri Inatsisartut ataatsimiittarfianni oqallinnermik malinnaanissaminut periarfissaqarsimavortaaq.

 

EU-p nunattalu akornanni isumaqatigiissutit, minnerunngitsumik ilinniartitaaneq eqqarsaatigalugu, ulluinnarni atorneqarsinnaassusiat paasissallugu ambassadørip annertuumik soqutigalugu ersersippaa. Ambassadørip minnerunngitsumik eqqumaffigaa nunatsinniit ilinniartut EU-p iluani iliniarnissaminnut periarfissanik pitsaanerpaamik atuinersut imaluunniit aaqqissuussinerup allaffissornikkut oqinnerulerlunilu atoruminarnerulernissaanut EU-mut isumaqatigiissut periarfissaqarnersoq paasissallugu. Ilinniartitaanermut tunngasut nunatta EU-llu akornanni isumaqatigiissummut qitiusunut ilaapput.

 

Inatsisartut Siulittaasuat taamatuttaaq EU-p nunatsinnik soqutiginnileriartornera pillugu ilisimatitsissuteqarpoq, soorlu aamma siusinnerusukkut EU-p inatsisartuinut, Europaparlamentimut, ilaasortanik naapeqateqartarsimanerit takutissimagaat EU-p inatsisartuisa nunatsinnilu inatsisartut akornanni qaninnerusumik atassuteqartalernissap sulissutiginissaa annertuumik kissaatigineqartoq, nunatsinni pissutsinik EU-mi qinikkat paasisimasaqarnerulernissaasa qularnaarneqarnissaa siunertarerpiarlugu.

 

Siulittaasup taamatuttaaq nunat allat inatsisartuinut siulittaasoqarfiup paasisassarsiorluni angalasarneri pillugit ambassadørimut ilisimatitsissuteqarpoq. Taamatut angalasarnerit siunertaraat nunatta nunallu allat akornanni atassuteqaatinik nutaanik pilersitsinissaq naalakkersuinikkullu attaveqaatinik nukittorsaanissaq. Suliniutit tamakku siulittaasoqarfiup ingerlateqqinniarpai, tamatumunngalu atatillugu ambassadørip siulittaasoqarfiup Luxembourgip inatsisartuinut tikeraarsinnaanera tikilluaqqullugu. Luxembourg EU-mut ilaasortaavoq nunamilu isertitaasartut annerusumik aningaasalersuinermik aningaasaqarniarnerullu iluani suliffeqarfiit ingerlatsinerannik tunngaveqarlutik, soorlu aamma EU-p oqartussaqarfii arlallit Luxembourgimi inissisimasut. Luxembourg 500.000-ingajannik inoqarpoq ukiullu tallimakkaarlugit inatsisartuinut 60-inik ilaasortalimmut ilaasortassanik qinersisoqartarluni.

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.

 

2011.10.18 - 03824.jpg