Nutaarsiassat


2019 2018 2017 Flere år...

14-10-2011

Inatsisartut Nunanut allanut Sillimaniarnermullu Ataatsimiititaliaata Naalakkersuisut isumaqatigai

Nunarput qulaallugu CIA-ip timmisartuussisarsimanerisa arlaannaannulluunniit attuumassuteqanngitsumik misissuiffigineqarnissaat suli piumasaqaataavoq

 

Nunanut allanut Sillimaniarnermullu Ataatsimiititaliaq ullumi Naalakkersuisut Siulittaasuannik Kuupik Kleistimik apersuilluni isumasioqateqarpoq. Tamatumani sammineqarpoq tigusanik timmisartuussisarnermut atatillugu CIA-ip nunatta silaannartaanik nunatsinnilu mittarfinnik atuisarsimaneranik arlaannaannulluunniit attuumassuteqanngitsumik misissuisitsinissamik danksit naalakkersuisuisa nutaat itigartitsinerannut Naalakkersuisut qanoq isumaqarnersut.

 

Apersuinermi Naalakkersuisut Siulittaasuata ilisimatitsissutigaa Nunat Avannarliit Siunnersuisoqatigiiffiata Københavnimi ataatsimiinneranut atatillugu danskit nunanut allanut ministeriannik ataatsimeeqateqarnissani isumaqatigiissutigisimallugu, ilaatigullu apeqqut manna oqallisiginiarlugu. Ataatsimiititaliap ataatsimiinnermi angusat pillugit Kuupik Kleistimit ilisimatinneqarnissani qilanaara.

 

Apersuinermi arlaannaannulluunniit attuumassuteqanngitsumik misissuisitsinissap danskit naalakkersuisuinut aalajangiusimaneqassasoq tamanit isumaqatigineqarpoq. Taamaalilluni Inatsisartut Naalakkersuisullu apeqqummi matumani ataatsimoorput, danskit naalakkersuisuisa qaangiinnarsinnaanngisaannik.

 

Maanna tassa apeqqutaalerpoq danskit naalakkersuisui piareersimanersut nunatsinnit piumasaqaatip naammassinissaanut. Suliassaq manna imaalluarsinnaavoq takutitsisoq Namminersorneruneq pillugu inatsimmi siunertarineqartumik"Danmarkip Kalaallit Nunaatalu akornanni peqatigiinnermi naligiimmik ataqqeqatigiinnerup tatigeqatigiinnerullu siuarsarnissaannik kissaateqarneq"-mik danskit naalakkersuisui qanoq paasinnissimanersut.

 

Nunanut allanut Sillimaniarnermullu Ataatsimiititaliaq tallimanik ilaasortaqarpoq, siulittaasoq Justus Hansen (Demokraatit), siulittaasup tullia Juliane Henningsen (Inuit Ataqatigiit), Jane Petersen (Inuit Ataqatigiit), Aleqa Hammond (Siumut) aamma Knud Kristiansen (Atassut).

 

 

Paasissutissat sukumiinerusut Nunanut allanut Sillimaniarnermullu Ataatsimiititaliap siulittaasua Justus Hansen oqarasuaat 53 12 10 attaveqarfigalugu pissarsiarineqarsinnaapput.