Nutaarsiassat


2019 2018 2017 Flere år...

12-10-2011

Taasisarnerit pillugit isumaqatigiissuteqartarneq innuttaasullu oqartussaaqataanerata suusupagineqarnera

Allatto Josef Motzfeldt, Inatsisartut Siulittaasuat

 

Siumup Inuusuttunut Suliniaqatigiiffiata siulittaasuata Kaalinnguaq Siegstadip oqallisissiami Sermitsiaq.ag-p nittartagaani ulloq 7. oktober 2011 ilanngunneqartumi  oqaatigaa nunatsinni innuttasut oqartussaaqataanerat atorunnaarsinneqarsimasoq Inatsisartullu siulittaasoqarfiat Inatsisartunit, allaat innuttaasut oqartussaaqataanerannit, pissaaneqarnerulersimasoq. Allaat innuttaasut oqartussaaqataanerat tunngavigalugu ingerlariaaseq avaqqullugu iliuuseqartoqarnerarpaa.

 

Oqaatsit persuarsiorpalaartut tamakku tamarmik aninneqarput Inatsisartuni taasisitsisoqarnerani Inatsisartunut ilaasortaq taasinermut peqataammat, naak ilaasortaq pineqartoq ilaasortamik allamik isumaqatigiissuteqareersimagaluartoq taasisannginnissaminik taasisarnerit pillugit isumaqatigiissuteqartarnermik aaqqissuussineq atorlugu.

 

Taamatut aaqqissuussineq atorneqartuarpoq ulluinnarnilu sulinermut oqilisaataalluni inatsisartuni naalakkersuisuutitaqartut illuatungiliuttullu akornanni oqimaaqatigiinneq innarlerniarnagu. Akerlianik aamma matumani Inatsisartunut ilaasortat marluk akornanni isumaqatigiissut kisimi pineqarpoq.

 

Aaqqissuussineq malittarisassatigut aalajangersagaanngilaq, inatsisinik unioqqutitsisoqanngilaq, aaqqissuussinerullu tamarmi qanoq naalakkersuinikkut naleqartinneqarnini taamaallaat tunngavigaa.

 

Taamaattumik aamma tamannarpiaq pissutigalugu pisumi matumani ataatsimiinnermik aqutsisoq ilumoorluinnarpoq oqarami taasisannginnissamik isumaqatigiissuteqareeraluarluni taasineq taasinerup inerneranut allannguutaasussaannginnami aalajangiisuunngitsoq. Aammami siulittaasoqarfiup suliassaraa suleriaasissaq malillugu ataatsimiinnerup ingerlanneqarnissaa isumagissallugu, allamik naamik.

 

Kaalinnguaq Siegstadip ajornartorsiutitut isigivaa ingerlaannaq nutaamik taasisitsisoqanngimmat. Oqarneratut ilumoorpoq siusinnerusukkut teknikikkut ajornartorsiuteqartoqartillugu nutaamik taaseqqittoqartarsimammat. Matumanili pisumi tekniki ajunngilaq, aammalu aatsaat innuttaasut qinikkat aqqutigalugit oqartussaaqataanerat avaqqunneqassagaluarluni, Inatsisartunut ilaasortat qinikkat ataatsimiittarfimmilu najuuttut taaseqataasinnaanerannik arsaassagaluarutsigit. Taamaattoqarsimassagaluarpammi Inatsisartunut ilaasortat marluk akornanni taasisarnerit pillugit isumaqatigiissut, Inatsisartuni sulinerup eqaallisarneqarnissaanik annerusumik tunngaveqartoq, Inatsisartut Naalakkersuisullu pillugit inatsimmit kiisalu Inatsisartut suleriaasiannit qulliunerusimassagaluarpoq.

 

Taamaattumik Kaalinnguaq Siegstadip oqallisissiami oqaatsimigut atukkamigut takutippaa taasisarnerit pillugit isumaqatigiissuteqartarnermik aaqqissuussineq taassumalu imarisai pillugit paasinnissimannginnini, taamaattumillu oqallisissiaa taamaallaat piviusunik tunngaveqanngitsumik saassussiniaannarluni saassussinertut isigineqartariaqarluni.

 

Siunissami taama pisoqaqqeqqunagu Kaalinnguaq Siegstad allagaqannginnermini Inatsisartut tassanilu suleriaaserineqartut pillugit paasissutissanik nittartagarput aqqutigalugu maangaluunniit tusarniaanikkut pissarsiniarnissaminut tikilluaqquneqarpoq.

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.