Nutaarsiassat


2019 2018 2017 Flere år...

11-10-2011

CIA-p nunarput qulaallugu isertortumik timmisartuussisarsimasinnaaneranik arlaannaannulluunniit attuumassuteqanngitsumik misissuisitsinissaq pillugu piumasaqaat attatiinnarneqarpoq

Kalaallit Nunaata silaannartaani CIA-p tigusanik isertortumik timmisartuussisarsimasinnaaneranik arlaannaannulluunniit attuumassuteqanngitsumik misissuisitsinissap ingerlanneqarnissaanik piumasaqaatini Inatsisartut Nunanut Allanut Sillimaniarnermullu Ataatsimiititaliaata isumaqatigiittup attappaa. Taamaattumillu Naalakkersuisut siulittaasuat Kuupik Kleist apersuinissamut ataatsimiititaliamit aggersarneqassasoq aalajangiunneqarpoq.

 

Kalaallit Nunaata silaannartaani CIA-p tigusanik isertortumik timmisartuussisarsimasinnaaneranik arlaannaannulluunniit attuumassuteqanngitsumik misissuisitsinissap ingerlanneqarnissaanut danskit naalakkersuisuisa nutaat isummaminnik allanngortitsinerat ataatsimiititaliap ullumi ataatsimiinnermini oqaluuseraa. Inuit pisinnaatitaaffii tunngaviusut unioqqutillugit tigusanik timmisartuussinernut nunatta silaannartaata nunatsinnilu timmisartoqarfiit atorneqarsimasinnaanerannik apeqqut ataatsimiititaliamit ilungersunartorujussuartut isigineqarpoq. Arlaannaannulluunniit attuumassuteqanngitsumik misissuisitsinissamik piumasaqaammik nunatsinni Inatsisartut suli attassinerat danskit naalakkersuisuinit ataqqineqassasoq ataatsimiititaliamit neriuutigineqarpoq.

 

Taamaattumillu suliaq pillugu apersorneqarnissamut Naalakkersuisut siulittaasuat Kuupik Kleist aggersarneqassasoq ataatsimiititaliamit aalajangiunneqarpoq, tamatumani Naalakkersuisut danskit naalakkersuisuinut saaffiginnissuteqarsimanersut aammalu apeqqut, taamaalillunilu ataatsimiititaliamit isummiussaq Naalakkersuisunit malersorneqalersaarnersoq ilaatigut paasissutissiissutigineqassasut ataatsimiititaliamit kissaatigineqarluni.

 

Nunanut Allanut Sillimaniarnermullu Ataatsimiititaliaq tallimanik ilaasortaqarpoq; siulittaasoq Justus Hansen (Demokraatit), siulittaasup tullia Juliane Henningsen (Inuit Ataqatigiit), Jane Petersen (Inuit Ataqatigiit), Aleqa Hammond (Siumut) aamma Knud Kristiansen (Atassut).

 

 

Paasissutissat amerlanerusut kissaatigineqarpata Nunanut Allanut Sillimaniarnermullu Ataatsimiititaliap siulittaasua, Justus Hansen, tlf. +299 53 12 10 atorlugu attavigineqarsinnaavoq.