Nutaarsiassat


2019 2018 2017 Flere år...

22-09-2011

Inatsisartut ataatsimiititaliaat inissititerput

 

Inatsisartut ataatsimiititaliaat ullumi inissititerput.

 

Nutaamik inissititertoqarpoq ullumi siusinnerusukkut Inatsisartut suleriaasiata allanngortinneqarnissaa Inatsisartunit akuerineqarmat. Suleriaatsimi § 9, imm. 1 allanngortinneqarpoq, tassani pineqarluni Inatsisartuni ataatsimiititaliat tallimanik nutaatullu arfineq-marlunnilluunniit ilaasortaqarsinnaalernerat.

 

Ataatsimiititaliaqarnikkut aaqqissuussaaneq siusinnerusumut sanilliullugu aamma immikooruteqarpoq, ataatsimiititaliammi arlallit ataatsimut katinneqarmata. Ullumimiit atuutilersumik Inatsisartut ukuninnga ataatsimiigiaqalerput:

 

  • Aningaasaqarnermut Akileraartarnermullu Ataatsimiititaliaq (ilaasortat 7)
  • Nunat allanut Sillimaniarnermullu Ataatsimiititaliaq (ilaasortat 5)
  • Kukkunersiuinermut Ataatsimiititaliaq (ilaasortat 5)
  • Inatsisinut Ataatsimiititaliaq (ilaasortat 5)
  • Qinigaanerup misilinneqarnissaanut Ataatsimiititaliaq (ilaasortat 5)
  • Sanaartornermut Avatangiisinullu Ataatsimiititaliaq (ilaasortat 7)
  • Ilaqutariinnermut Peqqissutsimullu Ataatsimiititaliaq (ilaasortat 7)
  • Aalisarnermut, Piniarnermut Nunalerinermullu Ataatsimiititaliaq (ilaasortat 7)
  • Inuussutissarsiornermut Ataatsimiititaliaq (ilaasortat 7)
  • Kultureqarnermut, Ilinniartitaanermut, Ilageeqarnermut Ilisimatusarnermullu Ataatsimiititaliaq (ilaasortat 5)

 

Nunami namminermi pissutsinut ataatsimiititaliaq Inatsisinut ataatsimiititaliamut ilanngunneqarpoq. Attaveqarnermut Ineqarnermullu Ataatsimiititaliaq kiisalu Eqqissisimatitsinermut Avatangiisinullu Ataatsimiititaliaq Sanaartornermut Avatangiisinullu Ataatsimiititaliamut ilanngunneqarlutik. Inuussutissarsiornermut Ataatsimiititaliaq, Aatsitassanut Ataatsimiititaliaq aamma Kalaallit Nunaanni aluminiumik aatsitsiviliorsinnaaneq pillugu Ataatsimiititaliaagallartoq Inuussutissarsiornermut Ataatsimiititaliami nutaami kattunneqarput.

 

Nunat tamalaat inatsisartuisa akornanni siunnersuisoqatigiiffiit eqqarsaatigalugit ullumi taamaallaat Nunat Avannarliit Siunnersuisoqatigiiffiannut aallartitassanik qinersisoqarpoq. Nunat Avannarliit Killiit Siunnersuisoqatigiiffiannut tunngasut ataatsimiinnermi ingerlasuni kingusinnerusukkut sammineqassapput.

 

 

Ataatsimiititaliani nutaani ilaasortanngortunut sinniisussaannullu kiisalu ataatsimiititaliani siulittaasunngortunut siulittaasullu tullinngortunut takussutissiaq ilanngussatut ilanngunneqarpoq.

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.