Apeqquteqaat aallaavigalugu oqallinnissamik siunnersuut


Apeqquteqaat aallaavigalugu oqallinnissamik siunnersuutit - Eqqaamasassat

  1. Tunniussivissatut killiliunneqartoq.

Apeqquteqaat aallaavigalugu oqallinnissamik siunnersuutit Inatsisartut ataatsimiinnerini ingerlaavartumik tunniunneqarsinnaapput. Nalinginnaasumilli siusinnerpaamik oqaluuserisassanut ilanngunneqarsinnaapput tunniunneqarnerminniit siulittaasoqarfimmilu oqaluuserineqareernerminniit ullut suliffiusut aqqaneq-marluk qaangiutereerpata.

 

  1. Ilusiliinissamut piumasaqaatit eqquutsinneqarsimanissaat.

Allannissaanut najoqqutassiaq atoruk partiillu allaffeqarfiinik ataatsimiititaliallu allattaanik ikiorteqarsinnaaneq atorluaruk. Ilusiliinissamut piumasaqaatit eqquutsinneqarsimanngippata siunnersuutip oqaluuserisassanut ilanngunneqarnissaa Inatsisartut Siulittaasoqarfiannit akuerineqarnavianngilaq.

 

  1. Oqallisigitikkumasat maannakkorpiaq pisunut attuumassuteqarnersoq inuiaqatigiillu eqqarsaatigalugit pingaaruteqarnersoq isumaliutigilluaruk.

Oqallisigitikkumasaq maannakkorpiaq pisunut annertunerpaamik attuumassuteqarpat  inuiaqatigiinnullu siamasissumik pingaaruteqarpat Inatsisartut ataatsimiinnerminni oqaluuserisassaannut ilanngunneqarnissaa ilimanarnerussaaq. Siunnersuutit najukkami pissutsinut taamaallaat tunngasut aallavittut isigalugu Inatsisartut Siulittaasoqarfiannit itigartitsissutigineqarnissaat naatsorsuutigineqartariaqarpoq. Aamma taamaappoq siunnersuutit "imakippallaat" pillugit. Assersuutigalugu Siorapalummi mannissarniartarneq pillugu oqallinnermit timmissat imarmiut nungutaanissaminnut ulorianartorsiortut qanoq pitsaanerpaamik ikiliartorunnaarsinneqarsinnaanerat apeqquteqaat aallaavigalugu oqallisissiatut siunnersuutigissallugu pitsaanerussaaq.

Pissutsit apeqquteqaat aallaavigalugu oqallinnissamut naammattumik tunngaviliisuunngitsut sammineqarnissaat kissaatigigukku taarsiullugu Naalakkersuisunut allakkatigut apeqquteqarnikkut pissutsit pineqartut soqutigineqalersissinnaavatit. Apeqqutip taamatullu Naalakkersuisut akissuteqaataasa nuutinneri Inatsisartunut ilaasortanut tusagassiorfinnullu nassiunneqartarput.

 

  1. UKA2016-imiit apeqquteqaat aallaavigalugu oqallinnissamik siunnersuutit Inatsisartut oqaaseqaatissaannut siunnersuummik ilaqartinneqartarnissaat piumasaqaataajunnaarpoq. Siunnersuulli inatsisartut oqaaseqaatissaannut siunnersuummik ilaqartinneqarsinnaavoq.

Inatsisartut oqaaseqaataat apeqquteqaat aallaavigalugu oqallinnermik inerniliinerussaaq, nalinginnaasumik Naalakkersuisunut kaammattuummik inuiaqatigiinniluunniit pissutsinut tunngaviusumik isummernermik imaqassalluni. Siunnersuutip Inatsisartuni oqallisigineqarnerani oqaaseqaatissamut allannguutissatut siunnersuuteqartoqartarsinnaavoq. Oqaaseqaat Naalakkersuisunik pituttuisinnaanngilaq.

 

  1. Sammineqartoq Inatsisartunit siusinnerusukkut oqallisigineqarsimanersoq misissoruk. Sammisat ukiuni kingullerni Inatsisartuni oqallisigineqarsimasut oqaluuserisassatut ilannguteqqinneqarsinnaanerat aallaavittut isigalugu naatsorsuutigineqarsinnaanngilaq. Pisariaqartikkukku ataatsimiititaliami allatsi aperisinnaavat.

 

  1. Apeqquteqaat aallaavigalugu oqallinnissamik siunnersuutip suliarineqarneranut atatillugu partiivit allaffeqarfianik ataatsimiititaliamilu allatsimik ikiorteqartarit, eqqaamalluguli ulloq tunniussereerfissaq sioqqulluarlugu ataatsimiititaliami allatsimut saaffiginnittariaqaravit (Inatsisartut ataatsimiinnissaata aallartinnissaa minnerpaamik sapaatit akunnerinik arfineq marlunnik sioqqullugu, ajornanngippalli siusinnerujussuakkut).

 

  1. Eqqaamajuk apeqquteqaat aallaavigalugu oqallinnissamik siunnersuutit Inatsisartut Allattoqarfiannut qarasaasiakkut emailikkut pappiaranngorluguluunniit nassiutissagakku. Tamanna partiivit allaffeqarfia aqqutigalugu nalinginnaasumik pisarpoq.

 


Nassuiaatit

  1. Ulluliunneqartoq tassaavoq ulloq siunnersuutip Inatsisartut Allattoqarfiannut nassiunneqarfia.

 

  1. Siunnersuummut oqaluuserisassani normuliunneqartoq ilanngullugu partiip allaffeqarfianit Inatsisartulluunniit Allattoqarfiannit immersorneqassaaq. UPA tassaavoq upernaakkut ataatsimiinneq, UKA tassaalluni ukiakkut ataatsimiinneq.

 

  1. Apeqquteqaat aallaavigalugu oqallinnissamik siunnersuutip qulequtaa ima aallartinneqassaaq "...pillugu apeqquteqaat allaavigalugu oqallinneq" apeqquteqaallu aallaavigalugu oqallisigineqartussatut siunnersuutigisami sammineqartup naatsumik ersarissumillu nalunaarneqarneranik siuleqartinneqassalluni. Qulequtaa silittumik allanneqassaaq.

 

  1. Siunnersuuteqartup taaguutaa, aqqa partiilu ilaasortaaffia apeqqutip sammineqartup qulequtaata atinnguani ungaluusap iluani nalunaarneqassapput. Partii ilaasortaaffittut nalunaarneqartoq tassaasinnaavoq ass. "Siumut", "Inuit Ataqatigiit", "Atassut", "Demokraatit", "Partii Naleraq" imaluunniit "attaviitsoq".

 

  1. Itisiliisutaasumik nassuiaat immikkut qulequtsernagu aallartinneqassaaq. Itisiliissutaasumik nassuiaatip apeqqutinut aalajangersimasunut Naalakkersuisut oqaaseqaateqarnissaannik kaammattuut imarigajuppaa (Taamaattumillu "apeqquteqaat aallaavigalugu oqallinnissamut siunnersuummik" taaguuteqarpoq).

 

  1. UKA 2016-imiit aallartittumik Inatsisartut oqaaseqaatissaannut siunnersuummik ilanngussisoqartassasoq piumasaqaataajunnaarpoq. Oqaaseqaat oqallinnermut inerniliissutaassaaq, nalinginnaasumillu Naalakkersuisunut kaammattuuteqarnermik inuiaqatigiinniluunniit pissutsinut tunngaviusumik isummernermik imaqartarluni.

 

  1. Inatsisartut Allattoqarfiannit immersorneqassaaq.

 

  1. Inatsisartut Allattoqarfiannit immersorneqassaaq.

 

Apeqquteqaat aallaavigalugu oqallinnissamik siunnersuutip aallartissutigisinnaasaatut assersuut:

21. august 2015                                                                                                                                    UKA 2015/XX

                                                                                                                                                      

 

 

Inatsisartut Suleriaasianni § 36 naapertorlugu apeqquteqaat aallaavigalugu oqallinnissamik siunnersuut imaattoq matumuuna saqqummiuppara:

 

Sinerissap qanittuani aalisarnermi ajornartorsiutit pillugit apeqquteqaat aallaavigalugu oqallinneq
(Inatsisartunut ilaasortaq Karline Eliassen, attaviitsoq)    

 

Naluneqanngitsutut issittup raajaasa nunarsuarmi akiisa ukiuni kingullerni appariarnerisa nassataraa.....