Nutaarsiassat


2018 2017 2016 Flere år...

10-07-2018

Inatsisartunut ilaasortaasimasoq Hans-Pavia Rosing toqukkut qimaguppoq

Inatsisartunut ilaasortaasimasoq Hans-Pavia Rosing ulloq 9. juli toqukkut qimaguppoq.

 

Hans-Pavia Rosing ulloq 12. april 1983-imit ulloq 5. juni 1984-imut Inatsisartunut ilaasortaavoq, tamatumanilu ilaatigut Aningaasaqarnermut Ataatsimiititaliamut siulittaasuulluni. Tamatuma saniatigut 1986-imit 1987-imut Aningaasaqarnermut Naalakkersuisuuvoq.

 

Hans-Pavia Rosing ukiuni arlalissuarni Folketingimi aamma politikeriuvoq, tassani Siumut sinnerlugu 1987-2001-imi ilaasortaalluni socialdemokratillu gruppiannik suleqateqarluni. Folketingimi ilaatigut Kalaallit Nunaanni Inatsisinut Ataatsimiititaliamut siulittaasuuvoq amerikamiullu Pituffimmi radarimut atatillugu rakettinut illersuusiornissamik pilersaarutaannut akerliulluni.

 

Tamatuma saniatigut Inuit Circumpular Conferencemut siullersaalluni 1980-imi siulittaasunngorpoq, taamatullu atuulluni 1986 tikillugu. Tamanna sioqqullugu World Council of Indigenous Peoplemik (nunat inoqqaavisa nunarsuarmi siunnersuisoqatigiiffiat) pilersitseqataavoq, tassanilu siulersuisunut 1977-80-imi ilaasortaalluni. Taamaalillunilu Kalaallit Nunaanni, Canadami Alaskamilu Inuit katersortinnissaat assut pingaartillugu suliniutigaa. Qalasersuup eqqaani sumiiffinnut oqartussaalernissamut Danmarkip siusinaarluni piumasaqarnissaata eqqumaffigineqarnissaa oqariartuutigisimavaa.

 

Hans-Pavia Rosing danskit tuluillu oqaasiinik nutserisutut (translatør) ilinniarsimavoq nunatsinnilu siullersaalluni IT-mik ilinniagaqarluni. Tamatuma saniatigut Danmarks Radiomi KNR-imilu namminersortutut aallakaatitassiortarpoq.

 

2007-imi sølvimik Nersornaaserneqarpoq. Inuiaqatigiinnut “tupinnaannartumik sulerusussuseqarluni piumassuseqarlunilu iliuuseqarsimanini” nunatsinni kulturikkut suliniuteqarnermigut aamma ersersinneqartoq ilisarnaatigigaa taamani Inatsisartunut Siulittaasuusup Jonathan Motzfeldtip oqaatigaa. Danmarkimi erinarsoqatigiinnut MIK-ikkunnut ukiorpassuarni aaqqissuisutut pisortaavoq angalanerannilu nunatsinni kulturimik ilisarititsisarluni. Erinarsoqatigiit N.I.P.E. pilersitseqataaffigai ukiorpassuarnilu siulittaasuuffigalugit. Kiisalu Danmarkimi kalaallit peqatigiiffianni ilaasortaavoq, tamatumanilu Danmarkimi kalaallit peqatigiiffiisa kattunnissaannut aallarnisaanermut peqataalluni. Atuuffini assigiinngitsorpassuit aqqutigalugit kulturitta ilisimaneqalernissaanut sinniisuulluarpoq.

 

Inuk nunaminik nunaqqatiminillu ukiorpassuarni sullissilluni assut ataqqisaasoq akornatsinniikkunnaarpoq. Hans-Pavia Rosing 70-inik ukioqalerpoq. Nulia ilaqutaalu eqqarsaatitsinni najorpavut.

 

Eqqaaneqarnera ataqqinartuuli.

 

 

Hans Enoksen

Inatsisartut Siulittaasuat